އެމްޑީޕީގެ ވިސްނުން ރިޔާސީ އިންތިޚާބުގައި ވަކިން ވާދަކުރުމާ ދިމާލަށް!

ރައީސް އަބްދުﷲ ޔާމީން ބަލިކުރަން، އިދިކޮޅު ޕާޓީތަކުން އެއް ކެންޑިޑޭޓަކު ކަނޑައަޅުމުގެ ޚިޔާލާ އެކު ކުރި މަޝްވަރާތަކާއި ދިން އުއްމީދުތަކާއި މަސައްކަތް މިހާރު އެދަނީ ފޭލްވަމުންނެވެ. ފިކުރުގެ ގޮތުން ތަފާތު ޕާޓީތަކަށް އެއްބަސްވެވޭ، ހުރިހާ ލީޑަރުންނަށް ރުހެވޭނެ ފޯމިއުލާއެއް ހޯދަން އުނދަގޫވުމުން، އެމްޑީޕީން ވެސް ވަކިން ވާދަކުރުމުގެ ވިސްނުން މާ ފައްކާވެއްޖެކަމުގެ ހުރިހާ ނިޝާނެއް އެބަ ފެނެ އެވެ.

ޖުމްހޫރީ ޕާޓީން ވެރިކަން ކުރަން ތައްޔާރަށް އޮތް ކަން އިއުލާންކޮށް މެނިފެސްޓޯ އާއްމުކުރި ނަމަވެސް، އެމްޑީޕީ އޮތީ އެ މަގަށް ދޫދޭން ތައްޔާރަށް ނޫން ކަން ރޭ ސާފުކޮށްދެއްވީ، އެ ޕާޓީގެ ރިޔާސީ ޓިކެޓު ދީފައިވާ ކުރީގެ ރައީސް މުހައްމަދު ނަޝީދެވެ. އެމަނިކުފާނު ވިދާޅުވި ގޮތުގައި، 2018 ގެ ރިޔާސީ އިންތިޚާބު އެމްޑީޕީން ކާމިޔާބު ކުރުމަކީ ގުޅިފައިވާ އެހެން ޕާޓީތަކަށް "ބޭވަފާތެރިވުމެއް ނޫނެ"ވެ.

ރާއްޖޭގައި އެންމެ ފުރަތަމަ އުފެއްދި ސިޔާސީ ޕާޓީ، އެމްޑީޕީ އަށް 13 އަހަރު ފުރުމާ ގުޅޭ ގޮތުން، ނަޝީދު ދެއްވި މެސެޖުގައި ވިދާޅުވީ އެއް ކެންޑިޑޭޓަކު ކަނޑައަޅަން އެ ޕާޓީން މަސައްކަތް ކުރި ކަމަށެވެ. އެކަމަކު ގުޅިފައިވާ ޕާޓީތަކުގެ ޚިޔާލު އެއްގޮތްވެ، ނަތީޖާއެއް ނުފެންނާނެ ކަމުގެ ކުލަވަރުތަކާ އެކު އެ ޕާޓީން އިންތިޚާބަށް ގޮތްތަކެއް ކަނޑައަޅަން ވެއްޖެ ކަމަށް ވިދާޅުވި އެވެ. އެއީ އެމްޑީޕީން ވަކިން ވާދަކުރުންތޯ ނުވަތަ ކެންޑިޑޭޓު ކަން ދޫކޮށްލައި، އެހެން ޕާޓީއަކަށް ރިޔާސީ ކެންޑިޑޭޓު ކަން ދިނުންތޯ ސީދާ ވިދާޅެއް ނުވެ އެވެ.

އެމްޑީޕީގެ ރިޔާސީ ކެންޑިޑޭޓު ކަމަށް ނަޝީދު ހަމަޖައްސާފައިވީ ނަމަވެސް ކްރިމިނަލް ކޯޓުގެ އިސް ގާޒީ އަބްދުﷲ މުހައްމަދު ބަންދުކުރި މައްސަލައިގައި އިއްވާފައިވާ 13 އަހަރުގެ ޖަލު ހުކުމާ އެކު އެމަނިކުފާނު އިންތިޚާބުގައި ވާދަކުރެއްވުމުގެ ޝަރުތު އުނިވެފައިވާ ކަމަށް އިލެކްޝަންސުން ވަނީ ބުނެފަ އެވެ. އެހެންކަމުން އެމަނިކުފާނު ވާދަކުރުމުގެ ފުރުސަތެއް އެ ކޮމިޝަނަކުން ނުދޭނެ އެވެ. ނަޝީދަށް އެމްޑީޕީގެ ރިޔާސީ ޓިކެޓް ދޭން އެ ޕާޓީން ކުރިއަށް ގެންދިޔަ ޕްރައިމަރީއަކީ ވެސް ގާނޫނާ ހިލާފު ކަމެއް ކަމަށް އިލެކްޝަންސް ކޮމިޝަނުން ވަނީ ނިންމައިފަ އެވެ.

އެއާއެކު، އެމްޑީޕީން މިހާރު އޮތީ، ރިޔާސީ ޓިކެޓާ މެދު ވެސް ގޮތްތަކެއް ނިންމަން ޖެހިފަ އެވެ. ބެލެވޭ ގޮތުގައި، އަންނަ ހޮނިހިރު ދުވަހު ބާއްވާ ކޮންގްރެސްގައި، ނަޝީދު ކެންޑިޑޭޓު ކަން ދޫކޮށްލައްވައި ޕާޓީގެ އެހެން ބޭފުޅަކު ރިޔާސީ ރޭހަށް ނެރުމާ މެދު ގޮތްތަކެއް ކަނޑައެޅުން އެކަށީގެންވެ އެވެ. މިއީ، ސިޔާސީ ގޮތުން އެ ޕާޓީ އޮތް ހާލަތަށް ވިއަސް، ރިޔާސީ ކެންޑިޑޭޓު ކަން އެހެން ޕާޓީއަކަށް ދޫކޮށްލަން އެމްޑީޕީ ތައްޔާރެއް ނޫނެވެ.

"އިއްތިހާދުގެ އެއް ކެންޑިޑޭޓާ އެކު އެމްޑީޕީން ނުކުމެވިއްޖެ ނަމަ، އެއީ އެންމެ ރަނގަޅު ގޮތް. އެމްޑީޕީގެ ސުވާލަކީ، މިގޮތް ހޯދުމަށްޓަކައި މި ޕާޓީ ދޫކުރަންވީ މިންވަރަކީ ކޮބައި ހެއްޔޭ؟" ނަޝީދު ސުވާލުކުރެއްވި އެވެ.

"އަދި މި ދެންނެވި ސުވާލާ ގުޅޭ އަނެއް ފުށަކީ އެމްޑީޕީން ދޫކުރީމާ، [އިންތިޚާބު] ކާމިޔާބުވޭތޯ؟ އެމްޑީޕީގެ އެދުމަކީ، ހުވަފެނަކީ، އަޅުގަނޑު ދަންނަވާނަން ތަކުރާރުކޮށް، މި ޕާޓީގެ ކެންޑިޑޭޓަކާއި ރަނިންމޭޓަކަށް އެހެން ޕާޓީތައް ތާއީދު ކުރެއްވުން."

އެމަނިކުފާނު ވިދާޅުވި ގޮތުގައި، 2008ގެ ރިޔާސީ އިންތިޚާބުގައި ރާއްޖެ އަށް ކާމިޔާބީ ހޯދައިދިނީ އެމްޑީޕީ އެ މަގުން ހިނގައިގެންނެވެ.

އެ އިންތިހާބުގައި ކުރީގެ ރައީސް މައުމޫން އަބްދުލްގައްޔޫމްގެ 30 އަހަރުގެ ވެރިކަން ނިމުމަކަށް ގެނައީ، އެމްޑީޕީން ނަޝީދު ކުރިމަތިލައްވައިގެންނެވެ.

މި އަހަރު ވެސް އެ ކާމިޔާބީ ރައްޔިތުންނަށް ހޯދައިދޭނީ އެމްޑީޕީން ކަމަށް، ބޭސްފަރުވާއަށް ރާއްޖެއިން ބޭރަށް ވަޑައިގެންނެވި ގޮތަށް އިނގިރޭސި ވިލާތުން ސިޔާސީ ހިމާޔަތް ހޯއްދަވައިގެން ބޭރުގައި އުޅުއްވަމުން ގެންދަވާ ކުރީގެ ރައީސް ވިދާޅުވި އެވެ.

ގުޅިފައިވާ ޕާޓީތަކުން އެއް ކެންޑިޑޭޓަކު ކަނޑައެޅުމުގައި، ނަޝީދު ވިދާޅުވި ގޮތުގައި، ރިޔާސީ ކެންޑިޑޭޓު ކަން އެމްޑީޕީ އަށް ދޫކޮށްލައި، އެ ޕާޓީގެ ކެންޑިޑޭޓަށް ތާއީދުކުރަން ޕާޓީތަކުގައި އެދެމުން އަންނަތާ ދުވަސްތަކެއް ވެއްޖެ އެވެ. އަދި އިސްލާހަށް އެކުގައި މަސައްކަތް ފެށި ޕާޓީތަކުން އެ މަގުން ހިނގާނެ ކަމަށް ގަބޫލުކޮށްގެން އެމްޑީޕީގެ މެމްބަރުން ތިބޭތާ ވެސް ދުވަސްތަކެއް ވެއްޖެ ކަމަށް ވިދާޅުވި އެވެ.

ޖުމްހޫރީ ޕާޓީގެ ވެރިކަމެއްގައި ކެބިނެޓު އޮންނާނެ ގޮތް އެކުލަވާލިއިރު، ކޯލިޝަންގެ ހުރިހާ ބައިވެރިން ހިމަނައި އެކަމަކު އެމްޑީޕީ ބާކީކުރުމަކީ، ނަޝީދު ވިދާޅުވި ގޮތުން ނަމަ، އެ ޕާޓީ އަށް ލިބުނު "ބޮޑު ސިހުމެކެ"ވެ. މި މައްސަލައިގައި މިހާތަނަށް އެމްޑީޕީން ވާހަކަ ދައްކާފައި ނުވަނީ، އެމަނިކުފާނު ވިދާޅުވި ގޮތުގައި، އެ ޕާޓީއާ މެދު އަމަލުކުރާ އުސޫލުން ކަންކަން ކުރަން ބޭނުން ނުވާތީ އެވެ.

ނަޝީދު ވިދާޅުވީ އެމްޑީޕީގެ ސިޔާސީ ނިންމުންތައް ނިންމަން ޖެހޭނީ ވިސްނުންތެރިކަމާއި ތެދުވެރިކަމާއި އަމާނާތްތެރިކަމާ އެކު ރައްޔިތުންނަށް ފައިދާވާނެ ގޮތަށް ކަމަށެވެ. ހިތުގައި އަނދާ އުދާސްތަކުގެ ބަދަލު ހިފުމަކީ އެމްޑީޕީގެ އަމާޒަކަށް ވެގެން ނުވާނެ ކަމަށް ވިދާޅުވި އެވެ.

"ޖުމްހޫރީ ޕާޓީއާ އެކު އިއްތިހާދު ވުމަށް އެމްޑީޕީ އެދޭ އެދުން ހަގީގަތަކަށް ނުވެ، އަދި މިއޮތީ. އަޅުގަނޑުމެންގެ ކަންބޮޑުވުމަކީ އިންތިޒާރުގައި މަޑުކުރަން ތާއަބަދަށް ޖެހުން. މި ގުޅުން ކަށަވަރުކޮށް އެމްޑީޕީ އާއި އިއްތިހާދުގެ ގުޅުން، ޚާއްސަކޮށް ޖުމްހޫރީ ޕާޓީ ވެސް ހިމެނޭ ގުޅުން ކަށަވަރުކޮށް އިއުލާން ކުރެވޭނެ ދުވަހަކަށް،" ނަޝީދު ވިދާޅުވި އެވެ.

ރައީސް ޔާމީން ބަލިކޮށް، އެމްޑީޕީން ކާމިޔާބު ހޯދުމަކީ، ނަޝީދު ވިދާޅުވި ގޮތުގައި، އެހެން ޕާޓީތަކަށް ބޭވަފާތެރިވުމެއް ނޫނެވެ. އެ ޕާޓީއަކީ ބަހުގެ އިތުބާރު ހިފޭނެ ޕާޓީއެއް ކަމަށާއި އިންތިހާބުގެ ކާމިޔާބީގައި، ގުޅިފައިވާ ޕާޓީތައް ފުރިހަމަ އަށް ބައިވެރިކުރާނެ ކަމުގެ ޔަގީންކަން ދެއްވި އެވެ.

އެމަނިކުފާނު ވިދާޅުވީ ކެބިނެޓުގައި ވެސް ހުރިހާ ޕާޓީތަކާއި ރައީސް މައުމޫންގެ ބައިވެރިވުން ހިމަނުއްވާނެ ކަމަށެވެ. އެއާއެކު ރައްޔިތުންގެ މަޖިލީހުގެ އިންތިޚާބުގައި ވެސް އެމްޑީޕީ ކުރިއަށް ދާނީ ޕާޓީތަކާ އެކުގައި ކަމަށް ވިދާޅުވި އެވެ.

ނަޝީދު މި އިއުލާންކުރެއްވި، އެމްޑީޕީގެ ތަސައްވުރާ އެކު، އެއް ކެންޑިޑޭޓުގެ ބަދަލުގައި އިންތިޚާބުގައި ޕާޓީތައް ވާދަކުރާނީ ވަކިވަކިން ކަން މިއޮތީ ގާތްގަނޑަކަށް ޔަގީންވެފަ އެވެ.