އިދިކޮޅު ކޯލިޝަންގެ ރަނިންމޭޓަކު ހޮވުމަށް އަލުން އިންތިޚާބުން ބޭއްވުމުގެ އަމުރަކަށް އެދި ސިވިލް ކޯޓަށް ހުށަހަޅައިފި އެވެ.
އިދިކޮޅު ކޯލިޝަންގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިހް (އިބޫ) ގެ ރަނިންމޭޓު ކަމަށް ޖުމްހޫރީ ޕާޓީން ފައިސަލް ނަސީމް އިންތިޚާބުކޮށްފައި ވަނިކޮށް، އެ އިންތިޚާބު އަލުން ބޭއްވުމުގެ އަމުރަކަށް އެދި ސިވިލް ކޯޓަށް ހުށަހެޅީ އިނގިރޭސި ވިލާތުން ހިމާޔަތް ހޯދައިގެން އެ ގައުމުގައި ދިރިއުޅެމުން އަންނަ އަދި ޖުމްހޫރީ ޕާޓީގެ އިތުރުން ފަހުން ޕީޕީއެމްގެ ހަރަކާތްތަކުގައި ކުރިން އުޅުނު މޫސާ އަންވަރެވެ. އޭނާ ވަނީ ކޯޓަށް މައްސަލަ ހުށަހެޅި ކަމުގެ ލިޔުން ޓްވިޓާގައި އާންމުކޮށްފަ އެވެ.
ނަމަވެސް މި މައްސަލަ އަދި ކޯޓުގައި ރަޖިސްޓްރީއެއް ނުކުރެ އެވެ.
މޫސަ ހުށަހަޅާފައި ވަނީ ރަނިންމޭޓަކު ހޮވުމަށް ޖުމްހޫރީ ޕާޓީގެ ކައުންސިލްގައި ނެގި ވޯޓުގައި ފައިސަލް ނަސީމާ އެންމެ ގާތުން ވާދަކުރެއްވި ކެންދޫ ދާއިރާގެ މެމްބަރު އަލީ ހުސައިނާ ދެ ބޭފުޅުންނަށް އެއް އަދަދަކަށް ވޯޓު ލިބިފައިވާ ކަމަށް ކަނޑައަޅައި، އެ ދެ ބޭފުޅުންގެ މެދުގައި ދެވަނަ ބުރެއް ބޭއްވުމުގެ އަމުރަކަށް އެދި އެވެ.
ރަނިންމޭޓް ކަމަށް ފައިސަލް އާއި އަލީ ހުސައިންގެ އިތުރުން ރައީސް އޮފީހުގެ ކުރީގެ މިިނިސްޓަރު އަބްދުﷲ އަމީނާއި ޖުމްހޫރީ ޕާޓީގެ ޑެޕިއުޓީ ލީޑަރު ޑރ. ހުސައިން ރަޝީދު ވާދަ ކުރެއްވި އެވެ. ފައިސަލް ރަނިންމޭޓަކަށް ހޮވުނީ އަލީ ހުސައިނާ އެއް ވޯޓުގެ ތަފާތަކުންނެވެ.
އެ އިންތިޚާބުގައި ބާތިލް ވޯޓެއްގެ ގޮތުގައި އެއް ވޯޓު އޮތްއިރު، އެ ވޯޓުގައި އަލީ ހުސައިންގެ ނަމާ ދިމާލުގައި އޮތް ގޮޅީގައި އެއްވެސް ފާހަގައެއް ނުޖަހައި، އެކަމަކު ދެން ތިބި ތިން ކެންޑިޑޭޓުންގެ ނަމާ ދިމާލުގައި ނުބައި ފާހަގަ ޖަހާފައި އޮތެވެ. އެހެންވެ، މޫސާ އަންވަރު އެދެނީ އެ ވޯޓަކީ އަލީ ހުސައިނަށް ލިބުނު ވޯޓެއްގެ ގޮތުގައި ކަނޑައަޅައި، ދެވަނަ ބުރަކަށް ދާންޖެހޭނެ ކަމަށް ބުނެ އެވެ.
މޫސާ އަންވަރު އެ މައްސަލަ ކޯޓަށް ހުށަހެޅިއިރު، އަލީ ހުސައިން ވަނީ ބަލި ގަބޫލު ކުރައްވައި، ފައިސަލާ އެކު ކެމްޕެއިން ދަތުރުތަކުގައި ވެސް ބައިވެރިވެ ވަޑައިގެންފަ އެވެ.