މި އަހަރުގެ ރިޔާސީ އިންތިޚާބަށް އިދިކޮޅު ކޯލިޝަންގެ ރަނިން މޭޓެއް ކަނޑައެޅުމަށް، ޖުމްހޫރީ ޕާޓީ (ޖޭޕީ)ގެ ކައުންސިލްގައި ބޭއްވި އިންތިޚާބު ސައްހަ ކަމަށާއި އަލުން އިންތިޚާބު ބާއްވަން ބޭނުން ނުވާ ކަމަށް ނާކާމިޔާބުވި، ކެންދޫ ދާއިރާގެ މެމްބަރު އަލީ ހުސައިން މިއަދު ވިދާޅުވެއްޖެ އެވެ.
ޖުމްހޫރީ ޕާޓީ އާއި ޕީޕީއެމްގެ ކުރީގެ މެމްބަރު މޫސާ އަންވަރު މިއަދު ވަނީ އިދިކޮޅު ކޯލިޝަންގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިހް (އިބޫ) ގެ ރަނިންމޭޓަކަށް ޖުމްހޫރީ ޕާޓީން ފައިސަލް ނަސީމް އިންތިޚާބު ކޮށްފައި ވަނިކޮށް، އެ އިންތިޚާބު އަލުން ބޭއްވުމުގެ އަމުރަކަށް އެދި ސިވިލް ކޯޓަށް ހުށަހަޅައިފަ އެވެ. މޫސަ ހުށަހަޅާފައިވާ މައްސަލާގައި ބުނަނީ އެއް ވޯޓުގެ ތަފާތުން އަލީ ހުސައިނަށް ނާކާމިޔާބުވީ އަލީ ހުސައިނަށް ދީފައިވާ ވޯޓެއް ބާތިލް ވޯޓެއް ކަމަށް ބެލުމުން ކަމަށެވެ.
މޫސަ އެ މައްސަލަ ސިވިލް ކޯޓަށް ހުށަހެޅުމާ އެކު، އިދިކޮޅު ޖޮއިންޓް ޕާލަމެންޓްރީ ގުރޫޕުގެ ވަޓްސްއެޕް ގުރޫޕްގައި ބައެއް މެމްބަރުން ކަންބޮޑުވުން ފާޅުކުރެއްވުމާ ގުޅިގެން، އަލީ ހުސައިން އެ ގުރޫޕްގައި ވިދާޅުވީ، ރަނިންމޭޓު ހޮވުމުގެ އިންތިޚާބު އެ ހިސާބުން ނިމުނީ ކަމަށް ގަބޫލު ކުރައްވާ ކަމަށެވެ. އަދި އެ ހިސާބުން، އިބޫ އާއި ފައިސަލްއާ އެކު ކުރިއަށް ދާންވީ ކަމަށް އަލީ ހުސައިން ވިދާޅުވެފައި ވެ އެވެ.
ސިވިލް ކޯޓަށް ހުށަހަޅާފައިވާ މައްސަލަ އަށް އިޝާރާތް ކުރައްވަމުން އަލީ ހުސައިން ވިދާޅުވީ، ރައީސް އަބްދުﷲ ޔާމީނަށް ފައިދާވާނެ އެއްވެސް ކަމެއްގައި އޭނާގެ ބައިވެރިވުމެއް ނޯންނާނެ ކަމަށެވެ.
އިދިކޮޅު ރަނިންމޭޓު ހޮވުމުގެ އިންތިޚާބާ ގުޅިގެން، މޫސަ ސިވިލް ކޯޓަށް ހުށަހެޅި މައްސަލަ އަދި އެ ކޯޓުގައި ރަޖިސްޓަރީ އެއް ނުކުރެ އެވެ.
ރަނިންމޭޓަކަށް، ކާށިދޫ ދާއިރާގެ ޖޭޕީގެ މެމްބަރު ފައިސަލް އިންތިޚާބުވި ކަން އިއުލާން ކުރުމުން އަލީ ހުސައިން ވަނީ ފައިސަލަށް މަރުހަބާ ދަންނަވައި ނަތީޖާ ގަބޫލު ކުރައްވާ ކަމަށް ވިދާޅުވެފަ އެވެ. އަދި އޭގެ އަނެއް ދުވަހު ފައިސަލާއި އިބޫއާ އެކު އައްޑު އާއި ފުވައްމުލަކަށް ކެމްޕެއިން ގައި އަލީ ހުސައިން ވަޑައިގަތެވެ.
ރަނިންމޭޓު ހޮވުމަށް ޖޭޕީގެ ކައުންސިލް ގައި ބޭއްވި އިންތިޚާބުގައި ބާތިލް ވޯޓެއްގެ ގޮތުގައި އެއް ވޯޓު އޮތްއިރު، އެ ވޯޓުގައި އަލީ ހުސައިންގެ ނަމާ ދިމާލުގައި އޮތް ގޮޅީގައި އެއްވެސް ފާހަގައެއް ނުޖަހައި، އެކަމަކު ދެން ތިބި ތިން ކެންޑިޑޭޓުންގެ ނަމާ ދިމާލުގައި ނުބައި ފާހަގައެއް ޖަހާފައި އޮތެވެ. އެހެންވެ، މޫސަ އެދެނީ އެއީ އަލީ ހުސައިނަށް ލިބުނު ވޯޓެއްގެ ގޮތުގައި ނިންމައި، އިންތިޚާބުގެ ދެވަނަ ބުރަކަށް ދާން ޖެހޭނެ ކަމަށް ކަނޑައެޅުމަށެވެ.
ސެޕްޓެމްބަރު 23 ގައި ބާއްވާ މި އަހަރުގެ ރިޔާސީ އިންތިޚާބަށް އިދިކޮޅުން ނެރޭ ރަނިންމޭޓަކު ހޮވުމުގެ އިންތިޚާބު ގައި ފައިސަލް އާއި އަލީ ހުސައިންގެ އިތުރުން ޖޭޕީގެ ޑެޕިއުޓީ ލީޑަރުން ކަމަށްވާ އަބްދުﷲ އަމީނާއި ޑރ. ހުސެއިން ރަޝީދު ހަސަން ވެސް ވާދަކުރެއްވި އެވެ.
އެ އިންތިޚާބު، ފައިސަލް ކާމިޔާބު ކުރައްވައި ރަނިންމޭޓަކަށް ވީ 15 ވޯޓުންނެވެ. އަލީ ހުސައިނަށް ލިބިވަޑައިގަތީ 14 ވޯޓެވެ. އަމީނަށް ނުވަ ވޯޓު އަދި ޖުމްހޫރީ ޕާޓީ ވަގުތީ ގޮތުން ހިންގުމާ ހަވާލުވެ ހުންނެވި ޑރ. ހުސެއިނަށް ހޯއްދެވުނީ އެންމެ ދެ ވޯޓެވެ.