މި އަހަރުގެ ރިޔާސީ އިންތިހާބުގައި ވާދަ ކުރައްވާނެ ކަމަށް އިއުލާން ކުރައްވާފައިވާ ކުރީގެ ހޯމް މިނިސްޓަރު އުމަރު ނަސީރުގެ ޓުއަރިސްޓް ވޭލްސް ސަބްމެރީން މޯލްޑިވްސްގެ މައްޗަށް 1.8 މިލިއަން ރުފިޔާގެ ބޮޑު ދަރަންޏެއް ސާބިތުވެފައި ވަނިކޮށް ކުންފުނީގައި އޮތް އޭނާގެ ހިއްސާ އަނބިކަނބަލުންނާއި ދަރިފުޅުގެ ނަން މައްޗަށް ބަދަލު ކުރައްވައިފި އެވެ.
ޓުއަރިސްޓް ވޭލްސް ސަބްމެރީން ޕްރައިވެޓް ލިމިޓެޑް މުވައްޒަފުންގެ ޕެންޝަން ފައިސާގެ ގޮތުގައި 1،860،405.86ރ. ނުދީގެން، އެ ކުންފުނީގެ މެނޭޖިން ޑައިރެކްޓަރު އުމަރު ނަސީރުގެ ޕާސްޕޯޓު ހިފެހެއްޓުމަށް މިދިޔަ އާދިއްތަ ދުވަހު ވަނީ ސިވިލް ކޯޓުން އަމުރުކޮށްފަ އެވެ.
އޭގެ ފަހުން މިއަދު އުމަރު ނަސީރުގެ ފަރާތުން ނެރެފައިވާ ބަޔާނެއްގައި ބުނެފައި ވަނީ ކޯޓުން އޭނާގެ ޕާސްޕޯޓް ހިފެހެއްޓުމަށް އަމުރުކޮށްފައި ވަނީ ވޭލްސް ސަބްމެރީންގެ ހިއްސާދާރުންގެ މައުލޫމާތު ނޭނގި ކަމަށެވެ.
"މި އަހަރު ބާއްވާ ރިޔާސީީ އިންތިހާބުގައި ވާދަކުރުމަށް އަޅުގަނޑު ނިންމުމާ ގުޅިގެން ވިޔަފާރީގެ ހުރިހާ މަސްލަހަތެއް އަޅުގަނޑު ދޫކޮށްލައި، އެކިއެކި ކުންފުނިތަކުގައި ހުރި އަޅުގަނޑުގެ ހިއްސާތައް ވާނީ އެހެން ފަރާތްތަކަށް ބަދަލުކޮށްފައި،" އުމަރު ބަޔާނުގައިވެ އެވެ. "އަޅުގަނޑުގެ ހިއްސާއެއް އޮތް އެއްވެސް ވިޔަފާރިއެއް މި ވަގުތަކު ނޯންނާނެ."
އުމަރު ފޯނު ނުނަންގަވާތީ އޭނާގެ ކޮމެންޓެއް މި ޚަބަރަކަށް ނުލިބުނެވެ.
ވޭލްސް ސަބްމެރީންގެ ހިއްސާ މިހާރު ނޯންނާގެ ކަމަށް އުމަރު ވިދާޅުވެފައިވާއިރު "މިހާރު" އެނގިފައިވާ ގޮތުގައި، އުމަރުގެ އަނބިކަނބަލުންނާއި އަދި ދަރިފުޅުގެ މައްޗަށް އޭނާގެ އޮތް ހިއްސާ ބަދަލުކުރީ މިމަހުގެ ތިން ވަނަ ދުވަހު އެވެ.
އުމަރުގެ އަތުގައި އޮތް ވޭލްސް ސަބްމެރީންގެ ހިއްސާގެ ތެރެއިން އަނބިކަނބަލުންނަށް 77 ހިއްސާ އަދި ދަރިފުޅަށް 10 ހިއްސާ ވަނީ ދީފަ އެވެ.
ރަހުނެއް ނުހިމެނޭ ސާބިތު ދަރަންޏާ ބެހޭ ގަވައިދުގައި ބުނާ ގޮތުން، ކުންފުންޏެއްގެ މައްޗަށް ދަރަންޏެއް ސާބިތުވެއްޖެ ނަމަ އެ ފައިސާ ދައްކަންދެން، އެ ކުންފުންޏެއްގެ ޑިރެކްޓަރުންގެ ޕާސްޕޯޓް ހިފެހެއްޓިދާނެ އެވެ. އުމަރުގެ ޕާސްޕޯޓް ހިފަހައްޓާފައި ވަނީ މި ގަވައިދުގެ ދަށުންނެވެ.
ރިޔާސީ އިންތިހާބަށް ކުރިމަތިލުމުގެ ފުރުސަތު އިއްޔެ ހުޅުވާލާފައިވާއިރު އުމަރަކީ އެ އިންތިހާބުގައި ވާދަކުރައްވާނެކަން އިއުލާން ކުރައްވާފައިވާ ބޭފުޅެކެވެ.
އަދާކުރަން ޖެހޭ ސާބިތު ދަރަންޏެއް އޮވެ ހުކުމާ އެއްގޮތަށް ފައިސާ ނުދައްކާ މީހެއް ނަމަ ރައީސުލްޖުމްހޫރިއްޔާ ކަމަށް ޝަރުތު ހަމައެއް ނުވާނެ އެވެ.
އުމަރު ނަސީރު ވަނީ 2008 ގެ ރިޔާސީ އިންތިހާބުގައި ވާދަކުރައްވައި ނާކާމިޔާބުވެފަ އެވެ. އަދި 2013 ގެ ރިޔާސީ އިންތިހާބުގެ ޓިކެޓް ހޯދެއްވުމަށް ޕީޕީއެމްގެ ޕްރައިމަރީގައި އޭނާ ވާދަކުރެއްވި އެވެ.
