އިދިކޮޅު އިއްތިހާދުގެ މެނިފެސްޓޯ ކުރިއަށް އޮތް ދެ ތިން ދުވަހުގެ ތެރޭގައި ފައިނަލްވާނެ ކަމަށް އިއްތިހާދުގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިހު (އިބޫ) މިއަދު ވިދާޅުވެއްޖެ އެވެ.
މާލޭ ސިޓީ ކައުންސިލާ ބައްދަލު ކުރެއްވުމަށް ފަހު ނޫސްވެރިންނާ ވާހަކަ ދައްކަވަމުން އިބޫ ވިދާޅުވީ މެނިފެސްޓޯ ފައިނަލް ވުމުން ވީހާވެސް އަވަހަކަށް އާންމު ކުރައްވާނެ ކަމަށެވެ.
"އެނގިވަޑައިގަންނަވާނެ މި ނިކުންނަނީ ގުޅިފައިވާ ޕާޓީތަކުގެ ކޯލިޝަނެއްގެ ތެރެއިން. އަދި އެ އޮތީ އެމްޑީޕީގެ މެނިފެސްޓޯ. ދެތިން ދުވަހެއްގެ ތެރޭގައި ކޯލިޝަންގެ މެނިފެސްޓޯ އާއި ޕޮލިސީތައް ފައިނަލްވެގެންދާނެ،" އިބޫ ވިދާޅުވި އެވެ.
އޭނާ ވިދާޅުވީ ރައީސް އަބްދުﷲ ޔާމީންގެ ސަރުކާރުގައި ލާމަރުކަޒީ ނިޒާމް ނައްތާލާފައިވާ ކަމަށެވެ. އެކަމަކު އިއްތިހާދުގެ ސަރުކާރެއްގައި ލާމަރުކަޒީ ނިޒާމަށް އަބަދުވެސް ފުރުސަތު އޮންނާނެ ކަމަށް ވިދާޅުވި އެވެ.
"ރާއްޖެ ތަރައްގީކުރެވޭނީ ރައްޔިތުންނަށް ހިދުމަތްކުރެވޭނީ ވީހާވެސް ގާތުން މަސައްކަތްކޮށްގެން. އެމްޑީޕީގެ ސަރުކާރުގައި ލާމަރުކަޒީ ނިޒާމް ތައާރަފްވެގެން ދިޔައީ. ހާއްސަކޮށް އެމްޑީޕީގެ ސިޔާސަތުގައި، އެމްޑީޕީ ހިމެނޭ ސަރުކާރެއްގައި އަބަދުވެސް ލާމަރުކަޒީ ނިޒާމަށް ޖާގަ އޮންނާނެ،" އިބޫ ވިދާޅުވި އެވެ.
އޭނާ ވިދާޅުވީ ސަރުކާރުން ސިޔާސަތުތައް ރާވާފައި ވަނީ މާލޭ ސިޓީ ކައުންސިލަށް ވެސް މަސައްކަތް ނުކުރޭ ގޮތަށެވެ.
"މިއަދު ސިޓީ ކައުންސިލްގެ އޮފީހަށް ހާޒިރުވުމުން އަޅުގަނޑުމެންނަށް ފެނުނީ ހަމައެކަނި ނަން ބޯޑެއް ހުރި ތަން. އަޅުގަނޑަށް އެނގިފައި އޮތް ގޮތުން ވެއްޖެއްޔާ މިއީ ކުރިން 1،100 އެއްހާ މުވައްޒަފުން މަސައްކަތް ކުރި ތަނެއް. މިއަދު ގާތްގަނޑަކަށް 50 ވެސް ހަމަނުވޭ،" އިބޫ ވިދާޅުވި އެވެ.
މީގެ އިތުރުން އޭނާ ވަނީ އަންނަ ސެޕްޓެމްބަރު، 23ގައި ބާއްވާ ރިޔާސީ އިންތިހާބުގައި ކޮންމެ ރައްޔިތަކު ވެސް އަމިއްލަ ކަމެއްގެ ގޮތުގައި ބަލައިގެން މަސައްކަތް ކުރުމަށް ގޮވާލައްވައިފަ އެވެ.
"މިއަދު ވެސް އަޅުގަނޑުމެން ރައްޔިތުންނަށް ގޮވާލަން ބޭނުންވަނީ ކޮންމެ ވޯޓަކީ މިކަމުގައި މުހިންމު ވޯޓެކޭ. އެހެންވީމާ މިކަމުގައި ތިބޭފުޅުން އަމިއްލަ ކަމެއްގެ ގޮތުގައި ދެކިވަޑައިގެން މިކަން ކުރުމަށްޓަކައި ވޯޓުގައި ބައިވެރިވެވަޑައިގަންނަވާށޭ،" އިބޫ ވިދާޅުވި އެވެ.
ރިޔާސީ އިންތިހާބުގައި 263،000 މީހުންނަށް ވޯޓު ލުމުގެ ހައްގު ލިބެ އެވެ. އަދި ރާއްޖެ އާއި ރާއްޖެ އިން ބޭރުގައި ޖުމްލަ 483 ވޯޓު ފޮށި ބަހައްޓާނެ އެވެ.