އަންނަ މަހު 23 ގައި އޮންނަ ރިޔާސީ އިންތިޚާބުގައި ވާދަކުރައްވާ ކެންޑިޑޭޓުންގެ މެދުގައި ބާއްވާ ރިޔާސީ ބަހުސްގެ ދައުވަތު އިދިކޮޅު ކޯލިޝަންގެ ކެންޑިޑޭޓު އިބްރާހިމް މުހައްމަދު ސޯލިހު (އިބޫ) ވެސް ގަބޫލުކުރައްވައިފި އެވެ.
ގައުމީ ޔުނިވަސިޓީ އާއި ޕަބްލިކް ސާވިސް މީޑިއާ (ޕީއެސްއެމް) އިން އިންތިޒާމްކުރާ ބަހުސްގެ ދައުވަތު، އިންތިޚާބުގައި ދެން ވާދަކުރައްވާ، ރައީސް އަބްދުﷲ ޔާމީން ވެސް ވަނީ ގަބޫލުފުޅު ކުރައްވާފަ އެވެ.
ގައުމީ ޔުނިވަސިޓީން ވަނީ އެތަނުގެ ދައުވަތު، ދެ ކެންޑިޑޭޓުން ވެސް ގަބޫލުކުރެއްވުމުން ޝުކުރު އަދާކޮށްފަ އެވެ. އަދި ބަހުސްގެ ތަފްސީލު ވަަރަށް އަވަހަށް އާއްމު ކުރާނެ ކަމަށް އެތަނުން ބުންޏެވެ.
އަންނަ މަހުގެ ތެރޭގައި ބަހުސް ބާއްވަން ހަމަޖައްސާފައިވީ ނަމަވެސް ތާރީޚެއް އަދި އާއްމެއް ނުކުރެ އެވެ. އެތަނުގެ ވިސްނުމަކީ، މި މަހުގެ ފަހުކޮޅު މެނިފެސްޓޯއާ ގުޅޭ ބަހުސް ބާއްވައި، އަންނަ މަހުގެ ތެރޭގައި ރިޔާސީ ކެންޑިޑޭޓުންގެ ބަހުސް ބޭއްވުމެވެ.
ގައުމީ ޔުނިވަސިޓީން، ޕީީއެސްއެމާ ގުޅިގެން ބަހުސް ބާއްވާތީ އިދިކޮޅުގެ ހިތްހަމަނުޖެހުންތައް އެބަހުއްޓެވެ. އަދި އިދިކޮޅު ޕާޓީތަކަށް ފުރުސަތު ނުދީ ހަމައެކަނި ރައީސް ޔާމީން ޕްރޮމޯޓްކުރާ ޕީއެސްއެމުން ބާއްވާ ބަހުސެއް ހަމަހަމަކާމާ އެކު ގެންދާނެ ކަމުގެ ޔަގީންކަން ނެތް ކަމަށް ޕާޓީތަކުން ބުނެ އެވެ. ރިޔާސީ ބަހުސްގައި، ކެންޑިޑޭޓުންނާ ގުޅުން ހުރި މައުލޫމާތާއި ފަސް އަހަރުގެ ދައުރެއްގައި ވެރިކަން ކުރައްވާނެ ގޮތުގެ ތަސައްވަރެއް ރައްޔިތުންނަށް ވިސްނައިދޭ ސުވާލުތައް ހިމެނޭނެ އެވެ. މި ސުވާލުތަކާއި ބަހުސާ ގުޅޭ އެހެން ހުރިހާ ކަމެއް ވެސް ކުރިއަށް ގެންދާނީ ޔުނިވާސިޓީން ކަމަށް އެތަނުން ވަނީ ބުނެފަ އެވެ.
އެމްއެންޔޫގެ ވައިސް ޗާންސެލާ އަލީ ފަވާޒް ޝަރީފް ވިދާޅުވެފައިވާ ގޮތުގައި ބަހުސްގެ މަގްސަދަކީ "ފުރިހަމަ އަށް މައުލޫމާތު ލިބިގެން ހުރެ" ރައްޔިތުން ރިޔާސީ އިންތިހާބުގައި ވޯޓުލާނެ ކެންޑިޑޭޓެއް ނިންމަން ފުރުސަތު ދިނުމެވެ. ކެންޑިޑޭޓުންނާ ކުރިމަތިކުރާނެ ސުވާލުތައް ތައްޔާރުކުރާނީ އިލްމީ ގޮތް ގޮތުން ބެލުމަށް ފަހު ދިރާސާއާ ވެސް އެކުގައި ކަމަށް ވިދާޅުވި އެވެ.