އަންނަ މަހު 23 ގައި އޮންނަ ރިޔާސީ އިންތިޚާބުގައި ވާދަކުރައްވާ ކެންޑިޑޭޓުންގެ މެދުގައި ބާއްވާ ރިޔާސީ ބަހުސްގެ ދައުވަތު ރައީސް އަބްދުﷲ ޔާމީން ގަބޫލުފުޅުކުރައްވައިފި އެވެ.
އާ ގާނޫނުއަސާސީ އަށް 2008 ގައި އަމަލުކުރި ފަހުން، ފުރަތަމަ ބުރުން ރައީސަކު ކަނޑައަޅާ ރިޔާސީ އިންތިޚާބުގައި ރައީސް ޔާމީންގެ އިތުރުން ވާދަކުރައްވަނީ، އެމްޑީޕީގެ ޕާލަމެންޓްރީ ގްރޫޕްގެ ލީޑަރު އިބްރާހިމް މުހައްމަދު ސޯލިހް (އިބޫ) އެވެ.
ގައުމީ ޔުނިވަސިޓީ އާއި ޕަބްލިކް ސާވިސް މީޑިއާ (ޕީއެސްއެމް) އިން އިންތިޒާމްކުރާ ބަހުސް، އަންނަ މަހުގެ ތެރޭގައި ބާއްވަން ހަމަޖައްސާފައިވީ ނަމަވެސް ތާރީޚެއް އަދި އާއްމެއް ނުކުރެ އެވެ. އެތަނުގެ ވިސްނުމަކީ، މި މަހުގެ ފަހުކޮޅު މެނިފެސްޓޯއާ ގުޅޭ ބަހުސް ބާއްވައި، އަންނަ މަހުގެ ތެރޭގައި ރިޔާސީ ކެންޑިޑޭޓުންގެ ބަހުސް ބޭއްވުމެވެ.
ޕީޕީއެމްގެ ނައިބު ރައީސް އަދި ރައްޔިތުންގެ މަޖިލީހުގެ ފޮނަދޫ ދާއިރާގެ މެމްބަރު އަބްދުއްރަހީމް އަބްދުﷲ ރޭ ކުރެއްވި ޓުވީޓެއްގައި، ރިޔާސީ ބަހުސްގެ ދައުވަތު ރައީސް ޔާމީން ގަބޫލުފުޅުކުރެއްވި ކަން އިއުލާންކުރައްވައިފަ އެވެ.
ރިޔާސީ ބަހުސްގެ ދައުވަތު އިދިކޮޅު ޕާޓީތަކުގެ ކެންޑިޑޭޓު، އިބޫ އަށް ވެސް ވަނީ ފޮނުވައިފަ އެވެ. އިބޫ ބަހުސްގައި ބައިވެރިވެވަޑައިގަންނަވާނެ ކަމެއް ރަސްމީކޮށް އެމްޑީޕީއަކުން އަދި ހާމައެއް ނުކުރެ އެވެ.
ގައުމީ ޔުނިވަސިޓީން، ޕީީއެސްއެމާ ގުޅިގެން ބަހުސް ބާއްވާތީ އިދިކޮޅުގެ ހިތްހަމަނުޖެހުންތައް އެބަހުއްޓެވެ. އަދި އިދިކޮޅު ޕާޓީތަކަށް ފުރުސަތު ނުދީ ހަމައެކަނި ރައީސް ޔާމީން ޕްރޮމޯޓްކުރާ ޕީއެސްއެމުން ބާއްވާ ބަހުސެއް ހަމަހަމަކާމާ އެކު ގެންދާނެ ކަމުގެ ޔަގީންކަން ނެތް ކަމަށް ޕާޓީތަކުން ބުނެ އެވެ.
އެކަމަކު ރާއްޖެ ޓީވީގެ ޕްރޮގްރާމެއްގައި ވާހަކަ ދައްކަވަމުން އިބޫ ވިދާޅުވެފައި ވަނީ، ރައީސް ޔާމީނާ އެކު ބަހުސަށް ވަޑައިގަންނަވަން ތައްޔާރު ކަމަށެވެ.
ރިޔާސީ ބަހުސްގައި، ކެންޑިޑޭޓުންނާ ގުޅުން ހުރި މައުލޫމާތާއި ފަސް އަހަރުގެ ދައުރެއްގައި ވެރިކަން ކުރައްވާނެ ގޮތުގެ ތަސައްވަރެއް ރައްޔިތުންނަށް ވިސްނައިދޭ ސުވާލުތައް ހިމެނޭނެ އެވެ. މި ސުވާލުތަކާއި ބަހުސާ ގުޅޭ އެހެން ހުރިހާ ކަމެއް ވެސް ކުރިއަށް ގެންދާނީ ޔުނިވާސިޓީން ކަމަށް އެތަނުން ވަނީ ބުނެފަ އެވެ.
އެމްއެންޔޫގެ ވައިސް ޗާންސެލާ އަލީ ފަވާޒް ޝަރީފް ވިދާޅުވެފައިވާ ގޮތުގައި ބަހުސްގެ މަގްސަދަކީ "ފުރިހަމަ އަށް މައުލޫމާތު ލިބިގެން ހުރެ" ރައްޔިތުން ރިޔާސީ އިންތިހާބުގައި ވޯޓުލާނެ ކެންޑިޑޭޓެއް ނިންމަން ފުރުސަތު ދިނުމެވެ. ކެންޑިޑޭޓުންނާ ކުރިމަތިކުރާނެ ސުވާލުތައް ތައްޔާރުކުރާނީ އިލްމީ ގޮތް ގޮތުން ބެލުމަށް ފަހު ދިރާސާއާ ވެސް އެކުގައި ކަމަށް ވިދާޅުވި އެވެ.
ރިޔާސީ އިންތިޚާބަށް ރައްޔިތުންގެ ރުހުން ހޯދަން ޕީޕީއެމާއި އިދިކޮޅު ޕާޓީތަކުން ކެމްޕޭން ކުރަމުން އަންނައިރު، ރައީސް ޔާމީން ދެ ވަނަ ދައުރަކަށް ހޮވަން ޕީޕީއެމުން ވިއްކަނީ، ފަސް އަހަރުގެ ތަރައްގީ އެވެ. އިދިކޮޅު ޕާޓީތަކުން ރައްޔިތުންނަށް ވިސްނައިދެނީ، މި ސަރުކާރުގެ ކޮރަޕްޝަނާއި އަނިޔާވެރިކަމާއި ހައްގުތައް އިޔާދަކުރެވޭނީ، ރައީސް ޔާމީންގެ ވެރިކަން ނިމުމަކަށް ގެނެސްގެން ކަމެވެ.