ރައީސް އަބްދުﷲ ޔާމީން، ރިޔާސީ އިންތިޚާބުގެ ބަލި ގަބޫލުފުޅުކުރައްވައި، ބޮޑު ތަފާތަކުން އެމަނިކުފާނުގެ މައްޗަށް ކުރި ހޯއްދެވި އިދިކޮޅު ކެންޑިޑޭޓު އިބްރާހިމް މުހައްމަދު ސޯލިހް (އިބޫ)އާ މިއަދު ރައީސް އޮފީހުގައި ބައްދަލު ކުރައްވައި މަރުހަބާ ވިދާޅުވެއްޖެ އެވެ.
އިލެކްޝަންސް ކޮމިޝަން (އީސީ) އިން އާއްމުކޮށްފައިވާ ރަސްމީ ވަގުތީ ނަތީޖާ އިން ދައްކާ ގޮތުގައި އިބޫ އިންތިޚާބު ކާމިޔާބުކުރެއްވީ، 134،616 ވޯޓުންނެވެ. އެއީ 58.4 ޕަސެންޓެވެ. ރައީސް ޔާމީނަށް ލިބިވަޑައިގަތީ، 96،123 ވޯޓެވެ. އެއީ 41.6 ޕަސެންޓެވެ.
ވޯޓުލުމުގެ ހައްގު ލިބިފައިވާ 262,135 މީހުންގެ ތެރެއިން 89 ޕަސެންޓު މީހުން މި އިންތިޚާބުގައި ވޯޓުލާފައިވެ އެވެ.
މި ނަތީޖާ ގަބޫލުކުރެއްވި ކަން ރައީސް ޔާމީން އިބޫ އަށް ދެންނެވީ، ރައީސް އޮފީހުގައި އިބޫއާ އެކު ބޭއްވެވި ބައްދަލުވުމުގަ އެވެ. މިއީ އިންތިޚާބަށް ފަހު ދެ ބޭފުޅުން ބައްދަލުވި ފުރަތަމަ ފަހަރެވެ.
ރައީސް ޔާމީންގެ ދައުވަތަށް، އިބޫ ރައީސް އޮފީހަށް ވަދެވަޑައިގެންނެވީ ކާރުގަ އެވެ. ބައިގަޑިއެއްހާ އިރަށް ކުރިއަށް ދިޔަ ބައްދަލުވުމަށް ފަހު އިބޫ، އެނބުރިވަޑައިގަތީ ވެސް ކާރުގަ އެވެ. ރައީސް އޮފީހުގެ ބޭރުގައި، ނޫސްވެރިން ތިބި ނަމަވެސް ބައްދަލުވުމާ ގުޅޭ ގޮތުން އިބޫ ވާހަކައެއް ނުދައްކަވަ އެވެ.
އިބޫއާ ބައްދަލުކުރެއްވުމަށް ފަހު، ގައުމާ މުޚާތަބުކުރައްވައި ރައީސް ވިދާޅުވީ އެމަނިކުފާނު ގައުމާއި ރައްޔިތުންނަށް އިޚްލާސްތެރި މަސައްކަތްޕުޅެއް ކޮށްދެއްވަމުން ގެންދެވި ނަމަވެސް އިއްޔެގެ ވޯޓުގައި "ރައްޔިތުންގެ ބަސް އިއްވައިފި" ކަމަށެވެ. އެހެންކަމުން އެ ނިންމުން ގަބޫލުފުޅުކުރައްވާ ކަމަށް ވިދާޅުވި އެވެ.
ނޮވެމްބަރު 17 ގައި ރިޔާސީ އާ ދައުރު ފަށަންވާއިރަށް، ސަރުކާރު ބަދަލުކުރުމުގެ އެންމެހާ ކަންކަން ގާނޫނީ އިމުގެ ތެރެއިން ކުރިއަށް ގެންދަވަން އެއްބާރުލުން ދެއްވައި އެކަންކަން ކުރިއަށް ގެންދަވާނެ ކަމުގެ ޔަގީންކަން ވެސް ރައްޔިތުންނަށް އެމަނިކުފާނު ދެއްވި އެވެ.
އިބޫ އިންތިޚާބު ކާމިޔާބު ކުރައްވައި، ރައްޔިތުންނަށް ޝުކުރު އަދާކުރައްވަމުން ރައީސް ޔާމީނަށް ދެ ހުށަހެޅުމެއް ހުށަހެޅުއްވި އެވެ. އެއީ ލަސްނުކޮށް ސަރުކާރު ބަދަލުކުރުމުގެ ކަންކަން ކުރިއަށް ގެންދެވުމާއި ޖަލުގައި ތިއްބެވި ސިޔާސީ ބޭފުޅުން ވަގުތުން ދޫކޮށްލެއްވުމެވެ.