ހައްޔަރު ކޮށްފައި ހުރި ޔަމަނު މީހާގެ ހާލަތާ މެދު އާއިލާ ކަންބޮޑުވެއްޖެ

ދިވެހި އަންހެނަކާ ކައިވެނި ކޮށްގެން ރާއްޖޭގައި ދިރިއުޅެމުން އަންނަނިކޮށް، ދައުވާއެއް ވެސް އަދި ޝަރީއަތެއް ވެސް ކުރުމަކާ ނުލައި މިދިޔަ އަހަރުން ފެށިގެން ހައްޔަރު ކޮށްފައި ހުންނަ ޔަމަނު މީހާ ބަންދުގައި ހުންނަ އިރު އޭނާ އަށް ހައްގުތައް ނުލިބޭ ކަމަށް ބުނެ އާއިލާ އިން ކަންބޮޑުވުން ފާޅުކޮށްފި އެވެ.

މާލޭގައި ޓީޗަރެއްގެ ވަޒީފާގައި ހުރި ޔާސިރު ޔަހްޔާ ސާލިހް މިދިޔަ އަހަރު ކޯޓު އަމުރެއްގެ ދަށުން ހައްޔަރުކުރީ ޑީޕޯޓް ކުރުމަށް ފަހު އިމިގްރޭޝަނާ ހަވާލު ކުރަން ކަމަށް އޭރު ފުލުހުން ބުނެފައިވެ އެވެ. އެކަމަކު އޭނާ މިހާރު ހުރީ ކަރެކްޝަނަލް ސާވިސްގެ ބެލުމުގެ ދަށުގައި ހުންނަ ހުޅުމާލޭ ޑިޓެންޝަން ސެންޓަރުގަ އެވެ.

ޔާސިިރުގެ އަންހެނުން ނެރުނު ބަޔާނެއްގައި ބުނެފައި ވަނީ ޔާސިރު ބަންދުގައި ބަހައްޓާފައި ހުންނަނީ އެކަހެރިކޮށް ކަމަށާއި އެކަމުގެ ސަބަބުން ނަފްސާނީ ގޮތުންނާއި ސިއްހީ ގޮތުން އޭނާ ބަލިކަށިވެފައިވާ ކަމަށެވެ. އޭނާ ގޮޅިން ނެރެނީ ވެސް ބިޑި އަޅުވައިގެން ކަމަށާއި އޭނާ ބަހައްޓާފައި ހުންނަ ގޮޅިއަކީ ހޫނު ގަދަ ތަނަކަށް ވާއިރު، އެ ތަނުގައި އޭނާ ބަހައްޓައިގެން އެކި މަސައްކަތްތައް ކުރުމުގެ ސަބަބުން އޭނާގެ ނޭވާލުމުގެ ނިޒާމަށް އުނދަގޫވާ ކަމަށް އެ ބަޔާނުގައިވެ އެވެ.

"ޖަލު ބަލަހައްޓާ ފަރާތްތަކުން މުއާމަލާތު ކުރުމުގައި އެބިއުސިވް ބަހުރުވަ ބޭނުން ކުރުމާއި ޖަލުގައި ތިބޭ އެހެން ގައިދީން ލައްވައި، ފުރައްސާރަ ކުރޭ. މިކަމުގެ ޝަކުވާ ވާނީ މޯލްޑިވްސް ކަރެކްޝަނަލް ސާވިސް އަދި މޯލްޑިވްސް އިމިގްރޭޝަނަށް އެކި ފަހަރު މަތިން ހުށަހެޅިފައި،" އެ ބަޔާނުގައިވެ އެވެ.

މީގެ އިތުރުން އެމެރިކާގެ ފެޑެރަލް ބިއުރޯ އޮފް އިންވެސްޓިގޭޝަން (އެފްބީއައި) އާއި ފުލުހުންނާއި އިމިގްރޭޝަނުން ކުރިން އެންގުމަކާ ނުލައި، ޔާސިރުގެ ބަޔާން ނަގާ ކަމަށާއި އެކަމުގެ މައުލޫމާތު އާއިލާ އާއި ވަކީލަށް ވެސް ނޭނގޭ ކަމަށް އެ ބަޔާނުގައިވެ އެވެ. އަދި އެކި ގޮތްގޮތުން ބިރު ދައްކައިގެން ކަންތައްތަކަށް އެއްބަސް ކުރުވަން މަސައްކަތް ކުރާ ކަމަށާއި އޭނާގެ ވިސާ ކެންސަލްކޮށް، ހަނގުރާމަ ހިނގަމުންދާ ޔަމަނަށް އޭނާ އާއި އާއިލާ ފޮނުވާލަން އިމިގްރޭޝަނުން މަސައްކަތް ކުރާ ކަމަށް ވެސް އެ ބަޔާނުގައި ތުހުމަތު ކޮށްފައިވެ އެވެ.

"ޔާސިރު ހައްޔަރު ކުރަން ގެނައި ވޮރަންޓްގައި، އެއީ ގައުމީ ސަލާމަތަށް ނުރައްކާވާތީ ކަމަށް ލިޔެފައި އޮޮތަސް ޔާސިރަކީ މި ގައުމުގެ އެއްވެސް ގާނޫނަކާ ޚިލާފް އެއްވެސް ކަމެއްގެ ރެކޯޑެއް ނެތް، ގާނޫނާ އެއްގޮތަށް ކައިވެނި ކޮށްގެން މި ގައުމުގައި ފަސް އަހަރު ވެފައިވާ އަދި މާލޭގެ ޕަބްލިކް ސްކޫލެއްގައި އަރަބި ލެންގުއޭޖް ކިޔަވައި ދެމުންދާ މުދައްރިސެކެވެ،" އެ ބަޔާނުގައިވެ އެވެ.

އެ ބަޔާނުގައިވާ ގޮތުން ބަންދުކުރި ފަހުން މިިއަދާ ހަމަ އަށް ވެސް އާއިލާއާ އެކު އެކަހެރި ބައްދަލުވުމެއް ޔާސިރަކަށް ނުދެ އެވެ. އަދި މަހަކު އެއް ފަހަރު ދެމުން އަންނަ އާއިލީ ބައްދަލުވުމާއި ފޯން ކޯލް ވެސް ސަބަބު ބަޔާން ކުރުމަކާ ނުލައި، ދެ މަހަށް ވެސް ހިފަހައްޓަމުންދާ ކަމަށް އެ ބަޔާނުގައިވެ އެވެ.

"މައުލޫމާތު ލިބޭނެ އިތުރު ގޮތެއް ނެތުމުން ބައެއް ފަހަރު ދެ މަސް ވަންދެން ވެސް ޔާސިރާ ބެހޭ އެއްވެސް މައުލޫމާތެއް އާއިލާ އަށް ނުލިބޭ،" އެ ބަޔާނުގައިވެ އެވެ.

ކަރެކްޝަނަލް ސާވިސްގެ ތަރުޖަމާނު އަހުމަދު ލުގުމާން ވިދާޅުވީ އެ ސާވިސްގެ ބެލުމުގެ ދަށުގައި ބަންދުގައި ހުންނަ އެއްވެސް މީހަކާ މެދު ލާ އިންސާނީ ގޮތަކަށް އަމަލު ކޮށްފައި ނުވާނެ ކަމަށެވެ. އެ ސާވިސް އިން އަމަލު ކުރަމުން އަންނަނީ ހެދިފައި ހުރި އުސޫލުތަކާ އެއްގޮތަށް ކަމަށް ވެސް ލުގުމާން ވިދާޅުވި އެވެ.

"ބަންދުގައި ތިބޭ ހުރިހާ ގައިދީންނާ މެދު ވެސް އަމަލު ކުރަމުންދަނީ އިންސާނީ ކަރާމާތަށް ގެއްލުން ނުލިބޭނެ ގޮތަަކަށް،" ލުގުމާން ވިދާޅުވި އެވެ.