ހަމަހަމަކަމާ އެކު ރައްޔިތުންނަށް މައުލޫމާތު ފޯރުކޮށްދިނުމުގެ މާހައުލެއް ޕަބްލިކް ސާވިސް މީޑިއާ (ޕީއެސްއެމް)ގައި ނެތް ކަމަށް ބުނެ، އެ މީޑިއާގެ އެގްޒެކެޓިވް އެޑިޓަރު އަދި މަޝްހޫރު ކުޅިވަރު ނޫސްވެރިޔާ ހަފްސީ އަބްދުﷲ އެ މަގާމުން އިސްތިއުފާ ދިނުމަށް ފަހު އިދިކޮޅު ކޯލިޝަނާ ގުޅިއްޖެ އެވެ.
ހަފްސީ ބުނީ ހަމަހަމަކަމާ އެކު ރައްޔިތުންނަށް މައުލޫމާތު ފޯރުކޮށްދިނުމަށް މަސައްކަތް ކޮށްދެވޭނެ ޖާގައެއް އަދި މާހައުލެއް ވެސް ޕީއެސްއެމްގައި ނެތް ކަމަށެވެ.
ހަފްސީ ޕީއެސްއެމް ދޫކޮށްލީ އޭނާ ބަލަހައްޓަމުން އައި ސްޕޯޓްސް ޑިޕާޓްމަންޓް އުވާލައި، އާއްމު ނިއުސްރޫމުގެ ތެރޭގައި ކުޅިވަރު ނޫސްވެރިން މަސައްކަތްކުރަން ޖެހޭ ގޮތަށް، މީގެ ދެ ހަފުތާ ކުރިން ކުއްލި ގޮތަކަށް ހަމަޖައްސާފައި ވަނިކޮށެވެ.
ހަފްސީ ބުނީ މި ވަގުތު އޭނާ ފެންނާނީ އިދިކޮޅު ކޯލިޝަންގެ ތެރެއިން ކަމަށާއި އިންސާފު ގާއިމްކުރަން ވާން ޖެހުނު ކޮންމެ ގުރުބާނީއެއް ވާން މި ހުރީ ކެރިގެން ނުކުމެ ކަމަށެވެ. އަދި މީޑިއާގެ ތެރެއަށް ދެން ނުކުތަސް އެ ކަން ނިންމާނީ މި މަހު 23 ގައި އޮންނަ ރިޔާސީ އިންތިހާބަށް ފަހު ކަމަށް ވެސް ބުންޏެވެ.
ޕީއެސްއެމުން ވަކިވިކަން އިއުލާން ކުރުމަށް ހަފްސީ މިއަދު ނެރުނު ބަޔާނުގައި ބުނީ، މީގެ ބަރާބަރު 13 އަހަރު ކުރިން، އޭރު ޓީވީ މޯލްޑިވްސްގެ ނަމުގައި ހިންގަމުން އައި ދައުލަތުގެ މީޑިއާއާ ގުޅުނީ ވަކި ފަރާތަކަށް ނުޖެހޭ މިނިވަން މީޑިއާއެއްގައި މަސައްކަތް ކުރުމުގެ ނިޔަތުގައި ކަމަށެވެ. އަދި ކޮންމެ ގައުމެއްގައި ވެސް ދައުލަތުގެ މީޑިއާއަކީ ރައްޔިތުންގެ މެދުގައި އެންމެ އިތުބާރު އޮންނަން ޖެހޭ މީޑިއާ ކަމަށާއި ހަމަހަމަކަމާ އެކު ތެދު ހަބަރު ފެތުރުމާއި އިޖްތިމާއީ، ސިޔާސީ، އަދި އަހުލާގީ ސިފަތައް ކުރިއަރުވަން މަސައްކަތްކުރުމަކީ ދައުލަތުގެ މީޑިއާ އިން އަދާކުރަން ޖެހޭ އެންމެ އިސް ޒިންމާ ކަމަށް ދެކޭ ކަމަށް ވެސް ބުނެފައިވެ އެވެ.
"އެހެން ނަމަވެސް މިއަދު ދައުލަތުގެ މީޑިއާ، ޕީއެސްއެމްގައި ކަންކަން ހިނގަމުންދަނީ އެ ގޮތުގެ މަތިން ނޫންކަން ހިތާމައާ އެކު ދަންނަވަމެވެ. ދައުލަތުގެ މީޑިއާގައި އަޅުގަނޑު ހޭދަކުރި ދިގު މުއްދަތުގައި މި މިންވަރަށް ދައުލަތުގެ މީޑިއާގެ ހިންގުން ހަރާބު ވެގެން ދިޔަ ފަހަރެއް ނާދެ އެވެ،" ނޫސްވެރިކަމުގެ ރޮނގުން ހިތްވަރު ދިނުމުގެ ގައުމީ އިނާމު މިދިޔަ އަހަރު ހާސިލްކުރި ހަފްސީގެ ބަޔާނުގައިވެ އެވެ.
ރާއްޖޭގައި މިވަގުތު ތިބި ކުޅިވަރު ނޫސްވެރިންގެ ތެރެއިން އެންމެ ފާހަގަކޮށްލެވޭ އެކެއްގެ ގޮތުގައި ބެލެވޭ ހަފްސީ ބުނީ ޕީއެސްއެމުން މިހާރު ފަތުރަމުން ގެންދާ ހަބަރުތަކުގައި، ދައުލަތުގެ މީޑިއާއަކުން ހަބަރު ފެތުރުމުގައި ގެންގުޅެން ޖެހޭ ސިފަތަކާ ތައާރަޒުވެ މުޖުތަމައުގެ އާއްމު އަހުލާގީ، މިންގަނޑު ހިފެހެއްޓުމުގެ ޒިންމާއާ ވެސް ހިލާފުވެފައިވާ ކަމަށެވެ.
ޕީއެސްއެމްގެ އިދާރީ ހިންގުމުގެ އުސޫލުތައް ވެސް އިންސާފުވެރި ނޫންކަން ފާހަގަކުރަމުން އޭނާ ބުނި ގޮތުގައި މުވައްޒަފުންގެ ސިޔާސީ ފިކުރަށް ބަލައި އެ މުއައްޒަފުންނާ މެދު ތަފާތުކުރުން ގެންގުޅެ އެވެ.
"އެހެންކަމުން މިއަދު ޕީއެސްއެމްގައި ހަމަހަމަކަމާ އެކު ރައްޔިތުންނަށް މައުލޫމާތު ފޯރުކޮށްދިނުމަށް މަސައްކަތް ކޮށްދެވޭނެ ޖާގައެއް އަދި މާހައުލެއް އޮތް ކަމަކަށް ގަބޫލުނުކުރެވެ އެވެ،" ބަޔާނުގައިވެ އެވެ.
ކުޅިވަރަށް ހިދުމަތް ކުރުމުގެ ދާއިރާ އިން ޒުވާނުންގެ ގައުމީ އިނާމު ވެސް ހާސިލް ކޮށްފައިވާ ހަފްސީ "މިހާރު" އާ ވާހަކަ ދައްކަމުން ބުނީ އެ ސަބަބުތަކުގެ އިތުރުން އޭނާ ވަކިވި އަނެއް ސަބަބަކީ ކުޅިވަރު ޑިޕާޓްމަންޓަށް ގެނައި ބަދަލު ކަމަށެވެ. އެއްވެސް އެންގުމެއް ނެތި ކުއްލިއަކަށް ލިބުނީ މެމޯއެއް ކަމަށާއި އޭގައި އޮތީ "މިއަދުން ފެށިގެން ކުޅިވަރު ނޫސްވެރިން ވެސް މަސައްކަތްކުރާނީ ނިއުސްޕޫލާ އެއްކޮށް" ކަމަށާއި "ހަފްސީ ވެސް ދެން މަސައްކަތްކުރަން ޖެހޭނީ އެޑިޓަރުންގެ ޕޫލުގައި" ކަމަށެވެ.
"އޭގެ ސަބަބުން ވަރަށް ގިނަ ދަތިތަކެއް ކުރިމަތިވި. ކުޅިވަރަކީ އެ ކަމަށް ހާއްސަވެގެން ތިބޭ ބަޔަކު ކަވަރުކުރަން ޖެހޭ ދާއިރާއަކަށް ވެފައި އާއްމު ޑިއުޓީގެ ތެރެއިން ކުޅިވަރު ކަވަރުކުރަން ޖެހުމަކީ ވަރަށް ބޮޑު މައްސަލައެއް،" ހަފްސީ ބުންޏެވެ.
"އަނެއްކާ އެފަދަ ބަދަލެއް ގެންނަކަން އަޅުގަނޑާ އެއްވެސް ވަރަކަށް މަޝްވަރާ ކޮށްފައެއް ނުވޭ."
