މި މަހު 23 ގައި ބާއްވާ ރިޔާސީ އިންތިޚާބުގައި ވާދަކުރައްވާ ކެންޑިޑޭޓުންގެ މެދުގައި ބާއްވަން ރާއްޖެ ޓީވީން ނިންމާފައިވާ ބަހުސްގެ ދައުވަތު ގަބޫލުފުޅު ކުރެއްވެން ނެތް ކަމަށް ޕީޕީއެމްގެ ކެންޑިޑޭޓް ރައީސް އަބްދުﷲ ޔާމީން އަންގަވައިފި އެވެ.
އަންނަ ހުކުރު ދުވަހު ބާއްވަން ނިންމާފައިވާ ބަހުސްއާ ގުޅޭގޮތުން، ރާއްޖެ ޓީވީގެ ސީއޯއޯ ހުސައިން ފިޔާޒް މޫސާ މިއަދު ވިދާޅުވީ، އިދިކޮޅު ކޯލިޝަންގެ ކެންޑިޑޭޓް އިބްރާހިމް މުހައްމަދު ސޯލިހް (އިބޫ) ދައުވަތު ގަބޫލް ކުރެއްވި ނަމަވެސް ވަގުތު ދެއްވެން ނެތް ކަމަށް ރައީސް ޔާމީން އަންގަވާފައިވާ ކަމަށެވެ.
އެކަމަކު، ބަހުސްގައި ބައިވެރިވެވަޑައިގަންނަވަން ރައީސް ޔާމީން ބޭނުންފުޅު ނުވި ނަމަވެސް، އެ އިވެންޓަށް ޚަރަދުތަކެއް ކޮށްފައި ވާތީ، އިތުރަށް ވިސްނާވަޑައިގެން ޖަވާބެއް ދެއްވުމަށް އެދި ޕީޕީއެމަށް ފަހުން ސިޓީއެއް ފޮނުވާފައިވާ ކަމަށް ފިޔާޒް ވިދާޅުވި އެވެ. ނަމަވެސް އެ ސިޓީގެ ޖަވާބެއް އަދިއެއް ނުލިބެ އެވެ.
ރާއްޖެ ޓީވީގެ އިތުރުން ގައުމީ ޔުނިވަސިޓީން ވެސް ރިޔާސީ ކެންޑިޑޭޓުންގެ ބަހުސެއް ބާއްވަން ވަނީ ނިންމައިފަ އެވެ. އެ ބަހުސްގައި ރައީސް ޔާމީން ބައިވެރިވެވަޑައިގަންނަވަން ނިންމާފައިވީ ނަމަވެސް އިދިކޮޅު ކެންޑިޑޭޓް އިބޫ އެއާ ދެކޮޅެވެ. އެހެންވެ، ގައުމީ ޔުނިވަސިޓީގެ ބަހުސް ބޭއްވިދާނެ ކަމާ މެދު ވެސް ވަނީ ސުވާލު އުފެދިފަ އެވެ. އެކަމަކު ބަހުސް ނުބާއްވާނެ ކަމަކަށް ގައުމީ ޔުނިވަސިޓީން އަދިއެއް ނުބުނެ އެވެ.
ގައުމީ ޔުނިވަސިޓީން ބާއްވާ ބަހުސްގެ ދައުވަތު އިބޫ ގަބޫލު ކުރެއްވުމަށް ފަހު، އެކަން ވަކި ހިސާބަކުން ބަދަލުކުރެއްވި ސަބަބެއް ކަމަށް އޭނާގެ ތަރުޖަމާން މާރިޔާ އަހްމަދު ދީދީ ވިދާޅުވެފައި ވަނީ ރައީސް ޔާމީނާއި ސަރުކާރުގެ އަމަލުތަކަށް ބަލާއިރު، އެ ބަހުސް ވެސް މިނިވަންކަމާ އެކު ކުރިއަށް ގެންދާނެ ކަމުގެ އެއްވެސް ޔަގީން ކަމެއް ނެތް ކަމަށެވެ.