ޕީޕީއެމްގެ މެނިފެސްޓޯ: ރާއްޖޭގެ ދެކޮޅުގައި ދެ "މާލެ"

މާލެ ފަދަ ދެ އާބަން ސެންޓަރު، ރާއްޖޭގެ އުތުރާއި ދެކުނުގައި ގާއިމުކުރުމަށް ޕީޕީއެމްގެ މެނިފެސްޓޯގައި ހިމަނައިފި އެވެ.

މިދިޔަ އަންގާރަ ދުވަހުގެ ރޭ ޕީޕީއެމުން ބޭއްވި ބިޔަ ޖަލްސާގައި ނެރުނު އެ ޕާޓީގެ މެނިފެސްޓޯގައި ބުނެފައިވާ ގޮތުން، ރައީސް ޔާމީން ދެ ވަނަ ދައުރަކަށް އިންތިޚާބުވެއްޖެ ނަމަ ރާއްޖެ އަށް އުމްރާނީ ތަރައްގީ ގެންނާނީ ތިން ޒޯނަކަށް ބަހާލައިގެންނެވެ. އެއީ "ގްރޭޓާ މާލެ" ނުވަތަ މާލޭ ސަރަހައްދުގެ އިތުރުން، ހއ. އަތޮޅާއި ހދ. ހިމެނޭ "ނޮދަން ޑިވެލޮޕްމެންޓް ޒޯން" އާއި ރާއްޖޭގެ އެންމެ ދެކުނުގެ ހަތަރު އަތޮޅު ހިމެނޭ، "ސަދަން ޑިވެލޮޕްމެންޓް ޒޯން" އެވެ.

އިނގިރޭސި ބަހުން ލިޔެފައިވާ މެނިފެސްޓޯގައި ބުނެފައިވާ ގޮތުގައި މި ތިން ޒޯނަކީ، ސަރަހައްދީ ތަރައްގީގެ މައި ހަބެވެ.

މިދިޔަ ފަސް އަހަރުގެ ތެރޭގައި ވެސް ތަރައްގީ ކުރަން މަސައްކަތް ކުރި "އައިހެވަން" މަޝްރޫއު ހިމަނައިގެން، އެންމެ އުތުރުގެ ދެ އަތޮޅުގައި ބޮޑެތި މަޝްރޫއުތަކެއް ހިންގަން މެނިފެސްޓޯގައި ވެ އެވެ. އެގޮތުން، އެ ދެ އަތޮޅުގެ ޓޫރިޒަމަށް 3،000 އެނދު އިތުރުކޮށް، ހއ. މާފިނޮޅުގައި އެއާޕޯޓެއް އަޅަން ނިންމާފައި ވެ އެވެ. އަދި ހދ. ކުޅުދުއްފުށީގައި ޑޮމެސްޓިކް އެއާޕޯޓަކާއި ބައިނަލްއަގްވާމީ ކަނޑުގެ ބަނދަރަކާއި ސިޓީ ހޮޓާތައް އަޅާނެ ކަމަށް ބުނެފައިވާ އިރު، އެ ރަށުގެ ހޮސްޕިޓަލް، މަލްޓިސްޕެޝަލިޓީ ހޮސްޕިޓަލަކަށް ބަދަލުކޮށް، ބޮޑެތި އުޅަނދުތައް ޖެއްސޭވަރަށް ހަނިމާދޫ އެއާޕޯޓް ބޮޑު ކުރާނެ ކަމަށް މެނިފެސްޓޯގައި ބުނެފައި ވެ އެވެ.

އޭގައި ބުނެފައިވާ ގޮތުން، ކުޅުދުއްފުށި ތަރައްގީ ކުރާނީ އެ ސަރަހައްދުގެ ވިޔަފާރީގެ މައި ހަބުގެ ގޮތުގަ އެވެ. އެކަމަކު އެއީ ރައީސް އަބްދުﷲ ޔާމީންގެ މި ދައުރުގެ ވެސް ވައުދެކެވެ. އަދި އައިހެވަން މަޝްރޫއު ފެށުމަށް، ދެ އަހަރު ބަޖެޓްގައި ފައިސާ ހިމަނައި، މާސްޓާ ޕްލޭން ހެދި ނަމަވެސް އެ މަޝްރޫއު އޮތީ ހުއްޓިފަ އެވެ.

މި މަޝްރޫއުގެ ދަށުން، ދެކުނުގެ ބޮޑެތި ރަށްތައް ތަރައްގީ ކުރަން ސަރުކާރުން ވަނީ ވައުދުވެފަ އެވެ. އެގޮތުން ގދ. ކާޑެއްދޫ އެއާޕޯޓު، އިންޓަނޭޝަނަލް ތަނަކަށް ބަދަލުކޮށް، ކައިރި ރިސޯޓުތަކާ ގުޅުވާލުމަށް، އެ ރަށުގައި ސީޕްލޭން ހަބެއް ހެދުމަށް ވަނީ ނިންމާފަ އެވެ. މެނިފެސްޓޯގައި ވާ ގޮތުން، ރައީސް ޔާމީންގެ ވެރިކަމުގެ ފުރަތަމަ ދެ އަހަރުގެ ތެރޭގައި އެކަން ކުރާނެ އެވެ.

ފެރީ ނިޒާމުން މުޅި ހުވަދު އަތޮޅު ގުޅައިލާއިރު، ގއ. ވިލިނގިލީގައި އިންޓަނޭޝަނަލް އެއާޕޯޓެއް އަޅައި އެ އަތޮޅު ފަރެސްމާތޮޑާގައި ޑޮމެސްޓިކް އެއާޕޯޓެއް އަޅާނެ ކަމަށް ވެސް މެނިފެސްޓޯގައި ބުނެފައި ވެ އެވެ.

އަދި ހުވަދު އަތޮޅުގައި ޓޫރިޒަމް ފުޅާކުރުމަށް، 10،000 އެނދު އިތުރު ކުރާއިރު، އައްޑޫގައި ވެސް އެނދުގެ އަދަދު އިތުރުކުރާނެ ކަމަށް ބުނެފައި ވެ އެވެ.

ދެކުނުގެ ކަނޑުގެ ބަނދަރު އެޅުމަށް ނިންމާފައިވަނީ އައްޑޫގަ އެވެ. އެތަން ތަރައްގީ ކުރާނީ، ބޭރުގެ ބޯޓު ފަހަރަށް ވެސް ތެޔޮ އެޅޭ ފަދަ ބަންކަރިން ހިދުމަތާ އެކުގައި ކަމަށް މެނިފެސްޓޯގައި ބުނެފައި ވެ އެވެ.

މަސް ބަންދު ކުރާ ކާރުހާނާއެއް އައްޑޫގައި ގާއިމު ކުރާއިރު، ޓޫރިޒަމްގެ މަންޒިލެއްގެ ގޮތުގައި އެތަން ތަރައްގީ ކުރާނެ ކަމަށް ވެސް އެ މެނިފެސްޓޯގައި ވެ އެވެ. އަދި ހިތަދު އާއި މީދޫ ހިއްކައި ގުޅުވާލަން ނިންމާފައިވާއިރު، ސިޓީ ހޮޓާތަކާއި ރީޓެއިލް ސެންޓަރުތައް، އައްޑު އާއި ފުވައްމުލަކު އަދި ތިނަދޫގައި ގާއިމު ކުރަން ވަނީ ނިިންމާފަ އެވެ.

ގައުމުގެ ތަރައްގީގެ މައި ހަބެއްގެ ގޮތުގައި މާލޭ ޒޯން ތަރައްގީ ކުރާއިރު، މި ޒޯންގައި ހިމެނެނީ މާލެ އާއި ހުޅުމާލެ އާއި ވިލިމާލޭގެ އިތުރުން ހުޅުމާލޭ ދެ ވަނަ ފޭސް އާއި ވިލިމާލެ-2ގެ އިތުރުން ފުށި ދިއްގަރު ފަޅެވެ.

މެނިފެސްޓޯގައި ބުނެފައިވާ ގޮތުން ތިލަފުއްޓާއި ގުޅިފަޅާއި ވިލިމާލެ ހިމެނޭ ގޮތަށް، ވިލިމާލެެ-2 ތަރައްގީ ކުރަނީ 300،000 އަށް ވުރެ ގިނަ މީހުންގެ އާބާދީއަކަށެވެ. އަދި 18 އަހަރު ފުރޭ ކޮންމެ ޒުވާނަކަށް ވެސް އެ ތަނުން ބޯހިޔާވަހިކަން ފޯރުކޮށްދޭނެ ކަމަށް ބުނެފައި ވެ އެވެ.

އެ ރަށްތައް މާލެއާ ބްރިޖަކުން ގުޅާލާ އިރު، މާލޭގައި ހުރި ގުދަންތަކާއި ސަރުކާރުގެ ބޮޑެތި ސައިޓުތައް ތިލަފުއްޓަށް ބަދަލުކޮށް، މާލެއަކީ މީހުން ދިރިއުޅުމަށް އެންމެ އެކަށީގެންވާ ތަނަކަށް ހަދާނެ ކަމަށް މެނިފެސްޓޯގައި ބުނެފައިވެ އެވެ.

ކޮންމެ ރަށަކާ 50 މޭލު ދުރު ނުވާ ގޮތަށް، ސިޓީއެއް ގާއިމު ކުރާ އިރު އެ ސިޓީތަކަށް ގެންނާނެ ތަރައްގީތައް ވެސް މެނިފެސްޓޯގައި ހިމަނާފައި ވެ އެވެ. އެގޮތުން ކޮންމެ ސިޓީއެއްގައި:

- ޑޮމެސްޓިކް އެއާޕޯޓަކާއި ސިޓީ ހޮސްޕިޓަލަކާއި ސްޓޭޑިއަމެއް

- މަގުތަކުގައި ތާރު އެޅުމާއި 500 ހައުސިން ޔުނިޓާއި ބޭންކެއް

- ސިޓީ ހޮޓަލަކާއި ފަތާ ސަރަހައްދެއް

ސިޓީ ފިޔަވައި އެހެން ކޮންމެ ރަށެއްގައި:

- 30 މިނިޓުން ދެވޭ ރަށެއްގައި ޑޮމެސްޓިކް އެއާޕޯޓެއް

- ފަތާ ސަރަހައްދަކާއި ސާފު ބޯފެނާއި ނަރުދަމާގެ ހިދުމަތް

- ކުޑަކުދިންގެ ޕާކަކާއި އައުޓްޑޯ ޖިމަކާއި ކޮމިއުނިޓީ ސެންޓަރެއް