ކެންޑިޑޭޓުގެ ނަމާ ދިމާލުގައި ރަނގަޅު ފާހަގަ ޖަހާފައިވާ ކަން ޔަގީން ކުރެވޭ އެއްވެސް ކަރުދާހެއް، އެއީ ގޮޅިން ބޭރުގައި ފާހަގައެއް ޖަހާފައި އޮތް ނަމަވެސް އެ ވޯޓު ބާތިލް ނުކުރާނެ ކަމުގެ ޔަގީންކަން އިލެކްޝަންސް ކޮމިޝަންގެ ރައީސް އަހްމަދު ޝަރީފް މިއަދު ދެއްވައިފި އެވެ.
އިންތިޚާބުގެ އެންމެ ފަހުގެ މައުލޫމާތު ހާމަކުރަން ބޭއްވި ނޫސް ކޮންފަރެންސްގައި އޭނާ މިގޮތަށް ވިދާޅުވީ، ވޯޓު ކަރުދާސް ގުނަން އުޅޭ ގޮތާ މެދު ކުރާ ތުހުމަތަށް ޖަވާބު ދެއްވަމުންނެވެ. އެހެން އިންތިޚާބުތަކާ ޚިލާފަށް މި އިންތިޚާބުގައި، ގޮޅިން ބޭރުގައި ފާހަގަ ޖަހާފައިވާ ނަމަ ވޯޓު ބާތިލްކުރަން ނިންމާފައިވާ ކަމަށް ވަނީ އަޑު ފެތުރިފަ އެވެ.
ޝަރީފް ވިދާޅުވި ގޮތުގައި ވޯޓު ބާތިލްކުރުމާ ގުޅޭ ގޮތުން ދައްކަނީ، ވޯޓު އޮފިޝަލުން ތަމްރީނުކުރިއިރު އެ ކޮމިޝަނުން ދީފައިވާ މައުލޫމާތުތަކެއް ނޫނެވެ. އަދި އެ ވާހަކަތަކުގައި ހަގީގަތެއް ނެތް ކަމަށް ވެސް ވިދާޅުވި އެވެ.
"ސާފުކޮށް އަޅުގަނޑު ދަންނަވާލަން ބޭނުން ވަނީ [ވޯޓު ކަރުދާހުގައި ކެންޑިޑޭޓުގެ] ނަން ހޮރިޒޮންޓަލްކޮށް، އިންނައިރު، އެ ނަމާ ދިމާލުގައި، ގޮޅިން ބޭރުގައި އިނަސް، ފާހަގަ ޖަހާ ގޮޅީގައި އިނަސް ނަން މަތީގައި އިނަސް ލޯގޯގައި އިނަސް އެއީ ނަމާ ދިމާލަށް އިންނަ ކަން ފާހަގަވާ ކަމަށްވާ ނަމަ އެއީ ވޯޓެއް ކަމަށް ގުނާނަން. ބާތިލެއް ނުކުރާނަން،" ޝަރީފް ވިދާޅުވި އެވެ.
އެކަމަކު އެ ފާހަގައެއް ޖަހާފައި އޮތީ، ކޮން ނަމަކާ ދިމާލުގައިތޯ ކަނޑައެޅިގެން ކަށަވަރު ނުވާ ނަމަ އެ ވޯޓެއް ބާތިލްކުރާނެ ކަމަށް ވިދާޅުވި އެވެ. އެކަމަކު އެ ނޫން ގޮތަށް، ފާހަގަ ޖަހާފައިވާ ހުރިހާ ވޯޓެއް ގުނާނެ ކަމުގެ ޔަގީންކަން ދެއްވި އެވެ.
"މިސާލަކަށް، [ރަނގަޅު ފާހަގަ] އާއްމުކޮށް ފާހަގަ ޖަހާނީ ތިރިން މައްޗަށްތާ ދެއްތޯ؟ ނުވަތަ މަތިން ތިރިއަށް ވެސް ޖަހާފާނެ، އަޅުގަނޑަކަށެއް ނޭނގެ. ފެށިފައި އިންނަނީ ކެންޑިޑޭޓު ނަމްބަރު ދޭއްގެ ފާހަގައަކުން ގޮސް އެ އަރާފައި މި އިންނަނީ ކެންޑިޑޭޓު ނަމްބަރު އެކަކާ ހަމައަށް. އަޅުގަނޑުމެން ގުނަން ފަށާނީ ފާހަގަ ފެށިފައި އިންނަ ހިސާބުން،" ޝަރީފް ވިދާޅުވި އެވެ.
އޭނާ ވިދާޅުވި ގޮތުގައި، ގޮޅީގައި ޖަހާފައި ވަނީ ރަނގަޅު ފާހަގައެއް ކަން ނޭނގޭ ނަމަ ނުވަތަ ހަމައެކަނި ރޮނގެއް ދަމާލާފައިވާ ނަމަ އެއީ ރަނގަޅު ފާހަގައެއް ކަމަށް ނުބެލެވޭނެ އެވެ. އަދި ރަނގަޅު ފާހަގައެއް އިނދެފައި ކުރެހުމެއް ނުވަތަ އެއްޗެއް ލިޔެ، ކަރުދާހުގައި ބޮޅެއް އަޅާފައިވާ ނަމަވެސް އެ ކަރުދާސް ގަބޫލުކުރާނެ އެވެ.
އެ މީހަކު ހޮވަން ބޭނުންވާ ކެންޑިޑޭޓާ ދިމާލުގައި ރަނގަޅު ފާހަގަ ޖަހައި މުޅި ކަރުދާހުގައި ކުރަހާފައި އޮތަސް އެ ވޯޓު ބަލައިގަންނެ ކަމަށް ވިދާޅުވި އެވެ.
އޭނާ ވިދާޅުވި ގޮތުގައި ވޯޓު ނެގުމާއި ގުނާ ވަގުތު ވޯޓުލާ މަރުކަޒުގެ ތެރޭގައި އޮބްޒާވަރުންނަށް ތިބެވޭނެ ވަކި ދުރު މިނެއް ކަނޑައަޅައިފައެއް ނުވާނެ އެވެ. އެކަމަކު އޮބްޒާވަރުން ތިބެން ޖެހޭނީ ވޯޓު ކަރުދާސް އޮފިޝަލު ދައްކާއިރު ކުއްލިއަކަށް ޖަހައިނުގަނެވޭނެ ފަދަ ދުރުމިނެއްގައި ކަމަށް ވިދާޅުވި އެވެ.