އިލެކްޝަންސް ކޮމިޝަން (އީސީ) ސާވާ އަށް ދުވާލަކު 280،000 އަށް ވުރެ ގިނަ ހަމަލާ ދެމުންދާ ކަމަށާއި އެކަމަކު އެފަދަ ހަމަލާއަކުން ނުރައްކަލެއް ނެތް ކަމަށް އިލެކްޝަންސް ކޮމިޝަން (އީސީ) އިން މިއަދު ބުނެފި އެވެ.
އީސީން ބޭއްވި ނޫސްވެރިންގެ ބައްދަލުވުމެއްގައި އެ ކޮމިޝަންގެ ރައީސް އަހްމަދު ޝަރީފް ވިދާޅުވީ ސާވާ ހެކްކުރުމަށް ގިނައިން ހަމަލާތައް ދެނީ ސިންގަޕޫރާއި ސްރީ ލަންކާ ފަދަ ގައުމުތަކުގެ އައިޕީތަކުން ކަމަށެވެ. މަދުން ނަމަވެސް ރާއްޖޭގެ އައިޕީތަކުން ވެސް ހަމަލާދޭ ކަމަށް އޭނާ ވިދާޅުވި އެވެ.
"ސާވާ ބްރޭކްކުރުމަށް ދުވާލަކު 280،000 އަށް ވުރެ ގިނަ އެޓޭކް އަޔަސް ޑޭޓާތައް ހުރީ ރައްކާތެރިކަމާ އެކު،" ޝަރީފް ވިދާޅުވި އެވެ.
އޭނާ ވިދާޅުވި ގޮތުގައި އީސީގެ ސާވާ އަށް ހަމަލާދީގެން ޑޭޓާތައް ނަގަން ކުރަމުންދާ މަސައްކަތްތައް ކާމިޔާބެއް ނުވާނެ އެވެ. އިންތިޚާބާ ގުޅޭ އެންމެހާ ކަމެއްގެ ސަލާމަތީ ކަންކަން ވަރަށް ވަރުގަދަވާނެ ކަމަށް ވިދާޅުވި އެވެ.
އިލެކްޝަންސް ކޮމިޝަންގެ ސާވާ ޕީޕީއެމްގެ ކެމްޕޭން އޮފީހާ ލިންކޮށްފައިވާ ކަމަށް ކުރާ ތުހުމަތަށް ރައްދު ދެއްވައި ޝަރީފް ވިދާޅުވީ އެއްވެސް ފަރުދެއް، ޕާޓީއަކަށް ވެސް އެ ކޮމިޝަންގެ ސާވާގެ ލިންކް ދީފައެއް ނުވާނެ ކަމަށެވެ. އަދި އެ ސާވާއަކީ ކޮނޑުގައި ޖަހައިގެން ވެސް އެއްވެސް މީހަކަށް ގެންދެވޭނެ އެއްޗެއް ނޫން ކަމަށާއި އެއަށް ވުރެ ބޮޑުވާނެ ކަމަށް ވިދާޅުވެ، ތުހުމަތުތައް ދޮގު ކުރެއްވި އެވެ.