ރައްޔިތުންގެ މަޖިލީހުގެ އިންތިހާބުގައި އެ މަޖިލީހުގެ ހުރިހާ ގޮނޑިއަކަށް ވާދަކުރަން ޖެހިއްޖެއްޔާ އެގޮތަށް ކަންތައް ކުރަން ޖުމްހޫރީ ޕާޓީ ވެސް ފަސް ނުޖެހޭނެ ކަމަށް އެ ޕާޓީގެ ލީޑަރު އަދި ރައްޔިތުންގެ މަޖިލީހުގެ ރައީސް ގާސިމް އިބްރާހީމް ވިދާޅުވެއްޖެ އެވެ.
ކުނޫޒުގައި މިރޭ ބޭއްވި ޖަލްސާގައި ވާހަކަފުޅު ދައްކަވަމުން ގާސިމް ވިދާޅުވީ ޖުމްހޫރީ ޕާޓީ މަޑުން އޮތީ ވާދަކުރަން ނުކެރިގެން ނޫން ކަމަށާއި ކޯލިޝަނެއްގައި ތިބުމާ ގުޅިގެން އެ ވިސްނުމާ އެއްގޮތަށް ގެންދަން ބޭނުންވާތީ މަޑުކުރަނީ ކަމަށެވެ. ނަމަވެސް އެމަނިކުފާނު ވިދާޅުވީ ޖޭޕީގެ ކެތްތެރި ކަމަށް ވެސް ނިމުން އަންނާނެ ކަމަށެވެ.
އެމްޑީޕީގެ ރައީސް އަދި ރާއްޖޭގެ ކުރީގެ ރައީސް މުހައްމަދު ނަޝީދަށް ގާސިމް މިރޭ ނުސީދާ ގޮތެއްގައި ވަރަށް ބޮޑަށް ފާޑުވިދާޅުވި އެވެ. ގާސިމް ވިދާޅުވީ ގޮނޑި ކާމިޔާބު ވުމަކީ ކޮންމެހެން މީހެއްގެ ބޮޑު ކުޑަމިނަށް ބަލައިގެން ވާ ކަމެއް ނޫން ކަމަށެވެ.
"ވާދަކުރަން ޖެހިއްޖެއްޔާ އަޅުގަނޑުމެންނަށް ވެސް 87 ދާއިރާ އަށް ވާދަކުރެވޭނެ. އަދި ކުރަން ވެސް ކުރާނަން،" ގާސިމް ވިދާޅުވި އެވެ.
ކޯލިޝަންގެ ސަރުކާރު އެކުލަވާލި ފަހުން، ގާސިމް މިހެން ވާހަކަފުޅު މި ދެއްކެވީ ކޯލިޝަންގެ އެއްބަސްވުމާ ހިލާފަށް އެމްޑީޕީން ބޭނުންވާ މަޖިލީހުގެ ހުރިހާ ގޮނޑިއަކަށް ވާދަކުރަން އެ ޕާޓީގެ ގައުމީ މަޖިލީހުން ނިންމުމާ ގުޅިގެންނެވެ.
ޖުމްހޫރީ ޕާޓީގެ މެމްބަރުން ވެސް މަޖިލީހުގެ ހުރިހާ ދާއިރާއަކަށް ވާދަކުރަން ޝައުގުވެރިވާ ކަމަށް ވެސް ގާސިމް ވިދާޅުވި އެވެ. އެކަމަށް އެދި އެމަނިކުފާނަށް ގިނަ ބަޔަކު ގުޅަމުން އަންނަ ކަމަށާއި އެހެން ނަަމަވެސް އަދި ގޮތެއް ނުނިންމައި ޕާޓީ އޮތީ "ކުރިން ނިންމާފައި އޮތް ގޮތަށް" ކުރިއަށްދާން ކަަމަށެވެ. ކުރިން ނިންމާފައި އޮތް ގޮތް ކަމަށް އެ އިޝާރާތް ކުރެއްވީ ސަރުކާރު ހިންގާ ކޯލިޝަނުގެ މެދުގައި ދާއިރާތައް ބަހާލަން ވެފައިވާ އެއްބަސްވުމަށް ކަމަށް ބެލެވެ އެވެ.
ނަމަވެސް އެއަށް ފަހު ގާސިމް ވިދާޅުވީ ކޯލިޝަން ރޫޅާލާ ބަޔަކަށް ޖޭޕީ ނުވާނެ ކަމަށެވެ.
ޖުމްހޫރީ ޕާޓީއަށާއި ގާސިމަށް ސޯޝަލް މީޑިއާގައި އެމްޑީޕީގެ އެކްޓިވިސްޓުން ކިޔަމުން ގެންދާ ފާޑުކިޔުންތަކާ މެދު ގާސިމް ކަންބޮޑުވުން ފާޅުކުރެއްވި އެވެ. އަދި ވިދާޅުވީ އެ ޕާޓީ އަށް ހަމަލާތައް އަންނަ ނަމަ ދިފާއުވާން ކުރަން ޖެހޭ ކަމެއް ކުރަން ޖެހޭނެ ކަމަށެވެ. ސޯޝަލް މީޑިއާގައި ކިޔަމުން އަންނަ ފާޑުކިއުންތަކަކީ އަބުރާ ބެހުން ކަަމަށް ސިފަކުރައްވައި، މިހާރު އުވާލައިފައިވާ އަބުރުގެ ގާނޫނު އަލުން އަތުވެދާނެ ކަމުގެ އިންޒާރު ވެސް އެމަނިކުފާނު ދެއްވި އެވެ.
"ހަމަލާދޭން އަތް މަޅާލަންޏާ އަޅުގަނޑުމެންނަށް ވެސް އަތް މަޅަން ކެރޭނެ ދިފާއުގައި. އަތް މުގުރައިގެން ދިއުން ނުވަތަ ނުދިއުން އަދި އެއީ އެހެން ކަމެއް،" އޭނާ ވިދާޅުވި އެވެ.