ކުރީގެ އެކްޓިން ކޮމިޝަނަރު ނަވާޒް ޖޭޕީއާ ގުޅިވަޑައިގެންފި

ރައީސް އަބްދުﷲ ޔާމީންގެ ސަރުކާރުގައި އެކްޓިން ކޮމިޝަނަރު އޮފް ޕޮލިސްގެ މަގާމު ފުރުއްވި، ކުރީގެ ޑެޕިއުޓީ ކޮމިޝަނަރު އަބްދުﷲ ނަވާޒް ޖުމްހޫރީ ޕާޓީ (ޖޭޕީ) އަށް މިރޭ ސޮއިކުރައްވައިިފި އެވެ.

ޖުމްހޫރީ ޕާޓީގެ ޖަގަހައިގައި ބޭއްވި ހަފްލާގައި ނަވާޒް އެ ޕާޓީ އަށް ސޮއިކުރައްވައި ފޯމު ހަވާލުކުރެއްވީ ޕާޓީގެ ލީޑަރު އަދި ރައްޔިތުން މަޖިލީހުގެ ރައީސް ގާސިމް އިބްރާހިމްއާ އެވެ.

މިރޭގެ ހަފުލާގައި ވާހަކަ ދައްކަވަމުން ނަވާޒް ވިދާޅުވީ، އަންނަ އޭޕްރީލް މަހު ބާއްވާ ރައްޔިތުންގެ މަޖިލިހުގެ އިންތިޚާބަކީ ރާއްޖޭގެ ސިޔާސީ މަޝްރަހު އެކި ގޮތްގޮތަށް ފުރޮޅިދާނެ ކަން ދައްކައި ދޭނެ އިންތިޚާބެއް ކަމަށެވެ. އެހެންވެ، ގައުމަށް ރަނގަޅު ބަޔަކު ގެނައުމަށްޓަކައި އެ އިންތިޚާބަށް ކުރެވެން ހުރި ހުރިހާ މަސައްކަތެއް ކުރަން ޖެހޭ ކަމަށް އޭނާ ވިދާޅުވި އެވެ.

"އެކަމާ އަޅުގަނޑުމެން ވަރަށް ބޮޑަށް ފިކުރުކޮށް ފިކުރު ހިންގަން ޖެހޭ. އަޅުގަނޑުމެންގެ ތެރޭގައި ވަރަށް ބޮޑަށް ވިސްނައި ގައުމަށް ފައިދާ ހުރި ގޮތެއް ބަލައި އެ ފަދަ ކެންޑިޑޭޓުންގެ ނަން އަޅުގަނޑުމެންގެ ސިކުނޑީގެ ތެރެއަށް ލާން ޖެހޭ،" ނަވާޒް ވިދާޅުވި އެވެ.

ޖުމްހޫރީ ޕާޓީ އަށް ސޮއިކުރެއްވުމަށް ފަހު ނަވާޒް މިރޭ ވާހަކަ ދައްކަވަނީ.---ފޮޓޯ: ނިޝާން އަލީ/މިހާރު

އޭޕްރީލް ހަތް ވަނަ ދުވަހު ބާއްވާ ރައްޔިތުންގެ މަޖިލިހުގެ އިންތިޚާބަށް އޭނާ ކުރިމަތިލައްވަން އުޅުއްވާ ކަމުގެ އަޑުތައް ފެތުރުނު ނަމަވެސް އެކަމާ ގުޅޭ އެއްވެސް ވާހަކައެއް ނަވާޒް މިރޭ ނުދައްކަވަ އެވެ.

ނަވާޒް ވިދާޅުވި ގޮތުގައި، ސިފައިންގޭގައި އޭނާއާ އެކުގައި މަސައްކަތް ކުރެއްވި، ކުރީގެ ޑިފެންސް މިނިސްޓަރު މުހައްމަދު ނާޒިމް ޖުމްހޫރީ ޕާޓީގައި ހުންނެވުމަކީ ވަރަށް ބޮޑު އުފަލެއް އަދި އެ ޕާޓީ އަށް ވެސް ލިބޭ ވަރަށް ބޮޑު ކުރިއެރުމެކެވެ.

އެކްޓިން ކޮމިޝަނަރަކަށް ހުންނެވި ނަވާޒް އެ މަގާމުން ވަކިކޮށް އެންވަޔަރުމެންޓް މިނިސްޓްރީގެ ޑެޕިއުޓީ މިނިސްޓަރަކަށް ކުރީގެ ރައީސް ޔާމީން އައްޔަން ކުރެއްވީ އެމަނިކުފާނަށް ރިޔާސީ އިންތިޚާބު ނާކާމިޔާބުވެވަޑައިގަތުމާ އެކުގަ އެވެ. އެ ސަރުކާރުގެ މުއްދަތު ހަމަވަންދެން ނަވާޒް ހުންނެވީ ޑެޕިއުޓީ މިނިސްޓަރުގެ މަގާމުގަ އެވެ.

ނަވާޒް ޕޮލިސް އެކްޓިން ކޮމިޝަނަރަކަށް އައްޔަން ކުރެއްވީ މިދިޔަ އަހަރުގެ ފެބްރުއަރީ 1 ގައި ސިޔާސީ ލީޑަރުންތަކެއް މިނިވަން ކުރުމަށް ސުޕްރީމް ކޯޓުން ކުރި ހުކުމް ތަންފީޒު ކުރާނެ ކަމަށް އޭރު ކޮމިޝަނަރަކަށް ހުންނެވި އަހުމަދު އަރީފް ވިދާޅުވުމާ އެކު އޭނާ އެ މަގާމުން ވަކިކުރެއްވުމަށް ފަހު އެވެ.

ކޯޓު އަމުރާ އެކު އޭރުގެ އުއްތަމަފަނޑިޔާރު އަބްދުﷲ ސައީދާއި ފަނޑިޔާރު އަލީ ހަމީދު، ސުޕްރީމް ކޯޓުގައި ހުންނަވަނިކޮށް ފުރާޅުމަތިން ސިފައިން ވަދެ، ފުލުހުންނާ ހަވާލުކުރި އިރު ފުލުހުންގެ އިސް ވެރިޔަކަށް ހުންނެވީ ނަވާޒެވެ. އަދި ކުރީގެ ރައީސް މައުމޫން އަބްދުލްގައްޔޫމް ހައްޔަރުކުރީ ވެސް އެކްޓިން ކޮމިޝަނަރަކަށް ނަވާޒު ހުންނަވަނިކޮށެވެ.