މަޝްހޫރު ފޮތި ފިހާރަ، ޖަލްޕަރީއަށް އިއްޔެ ރޭ ވަގުން ވަދެ ވައްކަންކޮށްފި އެވެ. އެކަމަކު އެ މީހުންނަށް އަތުޖެހުނީ، ފިހާރައިގެ ވަތްގަނޑުގައި ހުރި ވަކި ލާރިކޮޅު އެކަންޏެވެ.
ޖަލްޕަރީ ފިހާރަ ހިންގުމާ ހަވާލުވެ ހުންނެވި ހުސެން އާދަމް މިއަދު ވިދާޅުވީ ފިހާރައިގެ ދޮރު މަތާލައިގެން ވަދެ ވައްކަން ކޮށްފައިވަނީ އިއްޔެ ރޭގެ ދަންވަރުގެ ވަގުތެއްގައި ކަމަށެވެ. ފިހާރައިގެ ވަތްގަނޑުގައި އެ ވަގުތު ހުންނާނީ، ވަކި ލާރީގެ ގޮތުގައި ބަހައްޓާފައި ހުރި 270 ރުފިޔާ ކަމަށާއި ވަގުން އެ ގެންގޮސްފައިވާ ކަމަށް އޭނާ ވިދާޅުވި އެވެ.
"ވަކި ލާރީގެ އިތުރުން އެހެން އެއްވެސް ފައިސާއެއް ވަތްގަނޑުގައެއް ނުހުންނާނެ. އަދި ފިހާރައަކުން އިތުރު އެއްޗެއް ވެސް ވަގަށް ނަގާފައެއް ނެތް،" ހުސެން ވިދާޅުވި އެވެ.
"ވަކި ލާރިކޮޅެއް ގެންދިޔައިމަ އަޅުގަނޑުމެންނަށް ވެސް ވަރަށް މަޖާ ކަމަކަށް ވީ."
އޭނާ ވިދާޅުވީ ފިހާރަ ހުރި ސަރަހައްދުގައި ސީސީޓީވީ ހަރުކޮށްފައި ހުރުމާ އެކު، އެ މައްސަލަ ބަލައިދިނުމަށް އެދި ފުލުހުންނަށް ހުށަހަޅާފައިވާ ކަމަށެވެ.
މާލޭގައި ފަހަކަށް އައިސް ފޭރުމާއި ވައްކަން ވަނީ އިތުރުވެފަ އެވެ. އެގޮތުން ބިދޭސީން އުޅޭ ގެއަކަށް ވަޅި ހިފައިގެން ބަޔަކު ވަދެ، ރޭ ދަންވަރު 6،000 އަށް ވުރެ ގިނަ ރުފިޔާ އާއި ފޯނުތަކެއް ފޭރިގެންފައިވާއިރު ވަޅިން ބިރު ދައްކައި، ބައި މިލިޔަނެއްހާ ރުފިޔާ މިދިޔަ ހަފުތާ ތެރޭގައި ވަނީ ފޭރިގަނެފަ އެވެ.
