މާލޭގެ ފިހާރައެއްގެ ސޭޓަކަށް އިން އަންހެނަކު ގޮނޑިއާ އެކު އެއްސުމަށް ފަހު އޭނާގެ ފޯނާއި ފިހާރައިގެ ފޯނަކާއި ފައިސާ ފޭރުނު މައްސަލައެއްގައި ދައުވާ ލިބުނު މީހަކު ކުށަށް އިއުތިރާފުވުމުން 10 މަަސް ދުވަހުގެ ޖަލު ހުކުމެއް އިއްވައިފި އެވެ.
ސެޕްޓެމްބަރު 22، 2019 ވަނަ ދުވަހުގެ ރޭ 11 ޖަހަން ކައިރިވެފައި ވަނިކޮށް، ބުރުޒުމަގުގައި ހުންނަ ޑްރެސްކޯޑް ކިޔާ ފިހާރަޔަށް ވަދެ އެ ފިހާރައިގެ ސޭޓަކަށް އިން އަންހެން މީހާގެ ވައަތާއި ދެ ފައި ގޮނޑިއާ އެކު އައްސައި އެ އަންހެން މީހާގެ ޒިއޯމީ ބްރޭންޑުގެ ފޯނާއި، ފިހާރައިގެ ޒިއޯމީ ބްރޭންޑުގެ ފޯނަކާއި، ފިހާރައިގެ ވަތްގަނޑުގައި ހުރި 1،735ރ. ފޭރުނު މައްސަލައިގައި ދައުވާ ކުރީ ހދ. ކުޅުދުއްފުށި، ބުލޫނިޔާގެ، އަހުމަދު ނަޝީދުގެ މައްޗަށެވެ.
މި މައްސަލައިގައި އަހުމަދު ނަޝީދުގެ މައްޗަށް ކުރީ ފޭރުމުގެ ކުށުގެ ދައުވާ އާއި އަނިޔާއެއް ދިނުމުގެ ކުށުގެ ދައުވާ އެވެ. އަނިޔާއެއް ދިނުމުގެ ދައުވާކުރީ ސޭޓުގެ އަތް އެއްސުމުގެ ސަބަބުން އޭނާއަށް އަނިޔާވެފައިވާތީ އެވެ.
ފޭރުމުގެ ކުށުގެ އަދަބަކީ ނުވަ މަހާއި 18 ދުވަހަށް ޖަލަށް ލުމެވެ. އަދި އަނިޔާއެއް ދިނުމުގެ ކުށުގެ އަދަބަކީ ދެ މަހާއި 12 ދުވަހަށް ޖަލަށް ލުމެވެ.
މި ދެ ކުށް ސާބިތުވީ ނަޝީދުގެ އިއުތިރާފުންނެވެ. އޭނާ ކޯޓުގައި ބުނެފައި ވަނީ ކުށް ކުރެވުނީ ޑްރަގް ބޭނުން ކުރާތީ މަސްތުގެ ހާލަތުގައި ހުރުމުން ކަމަށެވެ. ފިހާރައިގެ ފޯނު ފުލުުހުންނާ ހަވާލުކޮށްފައިވާ ކަމަށާއި ދެން އަތުލި ފޯނާއި ނެގި ފައިސާ ލެވުނު ތަނެއް ނޭނގޭ ކަމަށް ބުނެފައިވެ އެވެ.
ކުށަށް އިއުތިރާފުވުމުން މިފަދަ މައްސަލަތަކުގައި އަދަބަށް ޖުނަހުގެ އެއް ދަރަޖައިގެ ލުޔެއް ދެ އެވެ. އެކަމަކު، ނަޝީދު މި ކުށް ކުރިތާ ދެ އަހަރު ތެރޭގައި އެހެން ކުށެއް ވެސް އޭނާގެ މައްޗަށް ސާބިތުވެފައިވާތީ، ކުށުގެ ދަރަޖަ އެއް ދަރަޖަށް އިތުރުކުރަން ޖެހޭތީ އޭނާއަށް އެ ލުއި ނުލިބުނެވެ.
އެހެންކަމުން، ފޭރުމުގެ ކުށަށް ގާޒީ ސޮފްއަތު ހަބީބް އިއްވެވީ ނުވަ މަހާއި 18 ދުވަހުގެ ޖަލު ހުކުމެކެވެ. އޭނާ ތަހުގީގު މަރުހަލާގައި ބަންދުގައި 16 ދުވަސް ހޭދަކޮށްފައިވާތީ އޭނާ ތަންފީޒުކުރަން ޖެހޭނީ ނުވަ މަހާއި ދެ ދުވަހެވެ. އަދި ފޭރުމުގެ ކުށް ސާބިތުވެފައިވާތީ އަނިޔާއެއް ދިނުމުގެ ކުށުގެ އަދަބުން ދެބައިކުޅަ އެއްބައި އުނިކޮށްދިނެވެ. އެ ކުށުގެ އަދަބެއްގެ ގޮތުގައި ކަނޑައެޅީ އެއް މަހާއި ހަ ދުވަހެވެ. އެހެންކަމުން އޭނާ ޖުމްލަ ތަންފީޒު ކުރަން ޖެހޭނީ 10 މަހާއި އަށް ދުވަހެވެ.