ސައްހަ ނޫން އަމުރަކާ ހެދި ދޫވި ދެ މީހުން އާ އަމުރަކަށް ހައްޔަރުކޮށްފި

މަސްތުވާތަކެއްޗާ އެކު އަތުލައިގަތް ދެ މީހަކު ހައްޔަރުކުރަން ހުޅުމާލޭ މެޖިސްޓްރޭޓް ކޯޓުން ނެރުނު ސައްހަ ނޫން އަމުރަކާ ހެދި ކްރިމިނަލް ކޯޓުން ދޫކޮށްލަން ޖެހުނު ދެ މީހުން، އާ ކޯޓު އަމުރެއްގެ ދަށުން އަނެއްކާ ހައްޔަރުކޮށްފި އެވެ.

ހުޅުމާލޭ ގެޔަކުން އިއްޔެ ރޭގެ ވަގުތެއްގައި ތިން ކިލޯ މަސްތުވާތަކެއްޗާ އެކު ހައްޔަރުކުރީ 25 އަހަރުގެ ފިރިހެނަކާއި 52 އަހަރުގެ އަންހެނެކެވެ. ނަމަވެސް އެ ގެ ފާސްކުރުމަށާއި މީހުން ހައްޔަރުކުރަން ހުޅުމާލޭ ކޯޓުން ނެރުނު އަމުރުގައި ޖިނާއީ އިޖުރާއަތުގެ ގާނޫނުގައި ބުނާ ކަންކަން ފުރިހަމަވެފައި ނެތުމުން ކްރިމިނަލް ކޯޓުން އެ މީހުން އިއްޔެ ދޫކޮށްލީ ޝަރީއަތް ނިމެންދެން ބަންދުކޮށްދިނުމަށް އެދި ކްރިމިނަލް ކޯޓަށް އެ މީހުން ހާޒިރުކުރުމުންނެވެ.

ބަންދުގައި ބައިތިއްބަން އަމުރު ނެރެވެން ނެތް ކަމަށް ބުނެ، މައްސަލާގައި ހިމެނޭ އެކަކަށް ކްރިމިނަލް ކޯޓުން ނެރުނު އަމުރުގައި ބުނެފައި އޮތީ އެ މީހާ ކޯޓު އަމުރެއްގެ ދަށުން ހައްޔަރުކުރި ކަމަށް ބުނެފައި ވާއިރު، އޭނާ އަށް ދިން އަމުރުގެ ކޮޕީގައި ޖިނާއީ އިޖުރާއަތުގެ ގާނޫނުގެ 41 ވަނަ މާއްދާގެ (ށ) ގައި ބުނާ، ކޯޓު އަމުރެއްގައި ހުންނަން ޖެހޭ ކަންކަން ފުރިހަމަވެފައި ނެތް ކަމަށެވެ. އެހެންވެ އެ މީހާ ހައްޔަރުކުރީ ސައްހަ ކޯޓު އަމުރެއްގެ ދަށުން ކަމަށް ނުވާތީ ބަންދުގައި ބަހައްޓަން އަމުރު ކުރެވެން ނެތް ކަމަށް ގާޒީ ނިންމެވީ އެވެ. މި މާއްދާގައި ބުނާ ކަންކަމުގެ ތެރެއިން ކޯޓު އަމުރުގައި ނެތީ ހުއްދަ ދޭ ފަނޑިޔާރުގެ ނަން ކަމަށް އެނގިފައިވެ އެވެ.

މި ދެ މީހުން އަލުން ހައްޔަރުކުރީ، ފުލުހުން ބުނި ގޮތުގައި، ކޯޓު އަމުރެއްގެ ދަށުން ރޭ މެންދަމުން އަލިވެ 3:17 ހާ އިރު، އެ މީހުން ދިރިއުޅޭ ގެއިންނެވެ. މިފަހަރު މި މީހުން ހައްޔަރުކުރި އަމުރު ނެރުނީ ކޮން ކޯޓަކުން ކަމެއް ފުލުހުން ނުބުނެ އެވެ.

ފަހަކަށް އައިސް ފުލުހުން ހިންގާ އޮޕަރޭޝަންތަކުގައި އަތުލައިގަންނަ މަސްތުވާތަކެތީގެ އަދަދު އިތުރުވެފައިވާއިރު، ގިނަ ބަޔަކު ވަނީ ހައްޔަރުކޮށްފަ އެވެ.