ލަނޑާ ނަގާ ދޯންޏެއްގައި މީހަކަށް ހަމަލާދީ ވަރަށް ބޮޑަށް ޒަހަމްކޮށްލި މައްސަލާގައި، ތުހުމަތުކުރެވޭ މީހާގެ ބަންދަށް އއ. ރަސްދޫ ކޯޓުން 10 ދުވަސް ދީފި އެވެ.
ރ.މަޑުއްވަރީ މީހެއް ކަމަށްވާ އިސްމާއިލް ހައްމާދު، 26، އަށް ހަމަލާ ދިން ކަމަށް ބެލެވެނީ ދީނީ ހަރުކަށި ފިކުރުގެ ބައެއްގެ ތެރޭގައި އުފެދުނު ދެބަސްވުމެއްގެ ތެރެއިންނެވެ. ހައްމާދަކީ ވެސް އެ ގްރޫޕަށް ނިސްބަތްވާ އަދި ސީރިއަސް ކުށްތަކުގެ ރެކޯޑް އޮތް މީހެކެވެ.
ފުލުހުން ބުނީ ހައްމާދަށް ހަމަލާ ދިން ކަމުގެ ތުހުމަތަށް ހައްޔަރުކޮށްފައި ވަނީ 30 އަހަރުގެ ފިރިހެނެއް ކަމަށެވެ.
އެކެއްގެ ބަންދު އިތުރުކުރި އިރު، ކުރިން "މިހާރު"އަށް އެނގިފައި އޮތީ މަދުވެގެން ދެ މީހަކު، ހައްމާދުގެ ފަހަތުން އއ. މާޅޮހަށް އެރި ކަމަށެވެ. އަދި އެ މީހުން ހައްޔަރުކުރި ކަމަށް އެ ރަށުން "މިހާރު"އާ ވާހަކަ ދެއްކި މީހުން ބުންޏެވެ.
މިދިޔަ ބުރާސްފަތި ދުވަހުގެ ރޭ ހިނގި މާރާމާރީގައި ހައްމާދު ވަރަށް ބޮޑަށް ޒަހަމްކޮށްލުމުން ކަނޑަށް ފުންމާލައިގެން، ހައްމާދު ފަތާފައި އެރީ މާޅޮހަށެވެ. އެރަށަށް އޭނާ އެރީ މެންދަމުން އަލިވެ 3:00 ހާއިރު ކަަމަށް އެރަށުން މައުލޫމާތު ދިން މީހުން ބުނެފައިވެ އެވެ.
ހައްމާދަށް ފަރުވާދޭން ސިއްހީ މަރުކަޒަށް ގެންގޮސް އޮއްވާ، އޭނާ ހޯދަން ރަށަށް އެރި ދެ މީހަކު ޓޯޗު ހިފައިގެން ދަނިކޮށް، ކީއްކުރާ ބައެއްތޯ، ރަށުގެ އެކަކު ސުވާލުކުރި ކަމަށްވެ އެވެ. އޭގެ ޖަވާބުގައި އެ މީހުން ބުނީ ދޯނީގެ ފަަޅުވެރިޔަކު ގެއްލިިގެން ހޯދަނީ ކަމަށެވެ.
އެ މީހުން ހައްޔަރުކުރީ މާޅޮހުންނެވެ. ނަމަވެސް އެކެއްގެ ބަންދުގެ މުއްދަތު އިތުރުކޮށް، އަނެއް މީހާ ކޯޓަށް ގެންދިޔަ ކަމެއް ނުވަތަ ފުލުހުން ފަހުން ދޫކޮށްލީ ކަމެއް، އެނގޭ ގޮތެއް އަދި ނުވެ އެވެ. ފުލުހުން ކުރިން ހަމައެކަނި ބުނީ ބަޔަކު ހައްޔަރި ކަމަށެވެ. އެއީ ކިތައް މީހުން ކަމެއް ނުބުނެ އެވެ.
މާޅޮހު ސިއްހީ މަރުކަޒުގައި ފަރުވާދިނުމަށް ފަހު ސިފައިންގެ އެހީތެރިކަމާ އެކު އޭނާ މާލެ އަށް ގެނައީ ހުކުރު ދުވަހު ހެނދުނު އެވެެ. އޭރުއްސުރެ އޭނާއަށް ފަރުވާ ދެމުން އަންނަނީ އިންދިރާގާންދީ މެމޯރިއަލް ހޮސްޕިޓަލްގެ އައިސީޔޫ ގަ އެވެ. އޭނާގެ ހާލަތާ ބެހޭ ގޮތުން އެހޮސްޕިޓަލްގެ ބަަހެއް އަދި ނުލިބެ އެވެ.
ތޫނު އެއްޗަކުން ހައްމާދުގެ ބޮލާއި ގައިގެ އެކި ތަންތަނަށް ހަމަލާދީ ޒަހަމްކޮށްލާފައިވެ އެވެ. ދެ އަތުގެ ވެސް ބޮޑުވާ އިނގިއްޔާއި ޝަހާދަތް އިނގިއްޔާ ދެމެދު ފުން ޒަހަމްތަކެއް ހުއްޓެވެ. އޭނާ އަށް މަރުން ސަލާމަތްވެވުނީ މޫދަށް ފުންމާލުމުންނެވެ.
