ރައީސް އިބްރާހިމް މުހައްމަދު ސޯލިހުގެ މި އަހަރުގެ ރިޔާސީ ބަޔާން ދެއްވުން، އަންނަ މަހުގެ 3 ގައި ބާއްވާ ރައްޔިތުންގެ މަޖިލީހުގެ މި އަހަރުގެ ފުރަތަމަ ޖަލްސާގައި އޮންނާނެ ކަމަށް ރައީސް އޮފީހުން މިއަދު ބުނެފި އެވެ.
ރައީސްގެ ތަރުޖަމާން އިބްރާހިމް ހޫދު ކުރެއްވި ޓްވީޓެއްގައި ވިދާޅުވީ، ފެބްރުއަރީ 3 ގައި ރިޔާސީ ބަޔާން ދެއްވާތީ، އެއީ ސަރުކާރުގެ ރަސްމީ ބަންދު ދުވަހެއްގެ ގޮތުގައި ވެސް މިހާރު ކަނޑައަޅުއްވާފައިވާ ކަމަށެވެ.
ރިޔާސީ ބަޔާން އިއްވުމުގެ ޖަލްސާ މިފަހަރު އޮންނާނީ ރައްޔިތުންގެ މަޖިލީހުގަ އެވެ. މިދިޔަ އަހަރު އެ ޖަލްސާ އޮތީ ދަރުބާރުގޭގަ އެވެ.
ގާނޫނުއަސާސީގައިވާ ގޮތުގެ މަތިން، ކޮންމެ އަހަރެއްގައި ވެސް ރައްޔިތުންގެ މަޖިލީހުގެ ފުރަތަމަ ޖަލްސާ އަށް ރައީސްގެ ރިޔާސީ ބަޔާން އިއްވަވާނެ އެވެ. ރިޔާސީ ބަޔާނުގައި، އެ އަހަރުގެ ތެރޭގައި ސަރުކާރުން ކުރާނެ ކަންކަމާ ގުޅޭ ތަފްސީލީ މައުލޫމާތު ރައީސް ހިއްސާ ކުރައްވާނެ އެވެ.
މިދިޔަ ރައްޔިތުންގެ މަޖިލީހުގެ ތިން ވަނަ ދައުރުގައި ބޭއްވި 33 ޖަލްސާއަށް ފަހު، މެމްބަރުން މިދިޔަ ޑިސެމްބަރު މަހުގެ ހަތް ވަނަ ދުވަހު ދެ މަސް ދުވަހުގެ ޗުއްޓީއަކަށް ވަޑައިގަތީ މުހިއްމު އަދި ގިނަ މަސައްކަތްތަކެއް ކުރެއްވުމަށް ފަހު އެވެ. އޭގެ ތެރޭގައި ލާމަރުކަޒީ ގާނޫނަށް ގެނައި އިސްލާހުތަކާއި އިންކަމް ޓެކްސް ނެގުމުގެ ބިލް ހިމެނެ އެވެ.
މަޖިލީހުގެ އާ ދައުރުގައި ވެސް މުހިއްމު ބިލްތަކެއްގެ މަސައްކަތްތަކެއް ހިމެނެ އެވެ. އޭގެ ތެރޭގައި މަދަނީ އިޖުރާއަތުގެ ބިލާއި ތައުލީމާއި މަތީ ތައުލީމްގެ ބިލްގެ އިތުރުން ގޯތިގެދޮރު ކުއްޔަށް ދިނުމާ ގުޅޭ ހާއްސަ ބިލްތަކާ މެދު ގޮތެއް ނިންމުން ހިމެނެ އެވެ.
