މާލެ އަތޮޅު ވިލިވަރުގައި ހަދާފައިވާ ކަރަންޓީން ފެސިލިޓީގެ ކޮޓަރިއެއް.---ފޮޓޯ: ޓޫރިޒަމް މިނިސްޓްރީ
08 މާޗް 2020 - 17:00
11 comments
ރިސޯޓެއް ހިންގުމަށް ފަހު ބަންދުކޮށްފައި އޮންނަތާ އެތައް އަހަރެއް ވެފައިވާ ވިލިވަރުގައި 30 ކޮޓަރީގެ ކަރަންޓީނު ފެސިލިޓީއެއް ހަދައިފި އެވެ.
ކޮވިޑް-19 އަށް ރާއްޖޭން ދެމީހަކު ޕޮޒިޓިވް ވުމުން، ޓޫރިޒަމް އިންޑަަސްޓްރީ އަށް ކުރިމަތިވެފަައިވާ މައްސަލަތަކާއި ގެއްލުން ކުޑަކުރަން އަޅާ ފިޔަވަޅުތަކާ ބެހޭ މައުލޫމާތު ދިނުމަށް ރައީސް އޮފީހުގައި މިއަދު ބޭއްވި ޕްރެސް ކޮންފަރެންސެއްގައި ޓޫރިޒަމް މިނިސްޓަރު އަލީ ވަހީދު ވިދާޅުވީ ވިލިވަރުގައި ކަރަންޓީނު ފެސިލިޓީ ހަދާފައި ވަނީ ކަރަންޓީނުކުރެވޭ މީހުންނަށް ވީހާ ވެސް ފަސޭހަވާނެ ގޮތަކަށް ކަމަށެވެ. ވިލިވަރުގައި ކޮޓަރިތައް ހަދާފައި ހުންނާނީ ޓޫރިސްޓަކު ކަރަންޓީނު ކުރަން ޖެހުނަސް، އެމީހަކަށް ގޯސް ތަޖުރިބާއަކަށް ނުވާނެ ފެންވަރަކަށް ކަމަށް އޭނާ ވިދާޅުވި އެވެ. އެގޮތުން ކަރަންޓީނު ކުރެވޭ މީހުންނަށްް، އެކަނިވެރިކަން އިިހުސާސްވާ މިންވަރު ވީހާ ވެސް ކުޑަ ކުރެވޭނެ ފަދަ ގޮތަކަށް އެތަނުގެ އިންތިޒާމްތައް ހަމަަޖައްސާފައިވާ ކަމަށް ވެސް އޭނާ ވިދާޅުވި އެވެ.
ރައީސް އޮފީހުގައި މިއަދު ބޭއްވި ޕްރެސްކޮންފަރެންސްގައި އަލީ ވަހީދު ވާހަކަދައްކަވަނީ. އޭނާ ވިދާޅުވީ ކޮވިޑް-19 އާ ގުޅިގެން އަޅާފައިވާ ފިޔަޅުތައް ރަނގަޅު ކަމަށް. ފޮޓޯ:އަހްމަދު އަވްޝަމް/މިހާރު
"އެމީހަކަށް އެ ކަރަންޓީނު ޕީރިއަޑްގައި އެމީހާ މުޅި ދުނިޔެއާ ވަކި ނުވެ، ހިތްހަމަޖެހޭ ފެންވަރަކަށް އެތަން ގާއިމްކުރެވިފައި ވާނީ،" އަލީ ވިދާޅުވި އެވެ.
ވިލިވަރަކީ އަތަމާ ކުންފުންޏަށް ދޫކޮށް، އޭގެ ފަހުން މައްސަލަތަކެއް ކުރިމަތިވެ، މަސީގެ ރައީސް މުހައްމަދު އަލީ ޖަނާހު (ޖަނާ) ގެ ހަވާލުގައި އޮތް ރަށެކެވެ. އެރަށުގައި ކަރަންޓީނު ފެސިލިޓީއެއް ހެދީ މިނިސްޓަރު ވިދާޅުވި ގޮތުގައި އެރަށް ވަގުތީ ގޮތުން ދައުލަތަށް ނެގުމަށް ފަހުގަ އެވެ. އެރަށުގައި ކަރަންޓީނު ފެސިލިޓީ ގާއިމްކުރަން ހަރަދު ކުރީ ޓޫރިޒަމް އިންޑަސްޓްރީގެ ޓްރަސްޓް ފަންޑުންނެވެ. އެމަސައްކަތަށް ހަރަދުވީ 2.1 މިލިޔަން ރުފިޔާ ކަމަށް އަލީ ވިދާޅުވި އެވެ.
މާލެ އަތޮޅު ވިލިވަރުގައި ހަދާފައިވާ ކަރަންޓީން ފެސިލިޓީގެ ކޮޓަރިތައް.---ފޮޓޯ: ޓޫރިޒަމް މިނިސްޓްރީ
އަލީ ވިދާޅުވީ ފެބްރުއަރީ މަހުގެ އެކަކުން ފެށިގެން 10 ދުވަހުގެ ތެރޭގައި ވިލިވަރުގެ ކަރަންޓީނު ފެސިލިޓީގެ މަސަސައްކަތް ނިންމައިލީ ޓޫރިޒަމް އިންޑަސްޓްރީ އާއި ދައުލަތުގެ މުއައްސަސާތަކާއި ދައުލަތުގެ ކުންފުުނިތައް ބައިވެރިވެގެން ކަަމަށެވެ. އެގޮތުން އެ މަސައްކަތަށް އެހީތެރިވި ތަންތަނުގެ ގޮތުގައި ފުލުހުންނާއި އެމްޑަބްލިއުއެސްސީ، ފެނަކަ އަދި އެސްޓީއޯގެ ނަން އޭނާ ފާހަގަކުރެއްވި އެވެ.
އޭނާ ވިދާޅުވި ގޮތުގައި ވިލިވަރުގައި ކަރަންޓީނު ފެސިލިޓީ ހެދީ ރައީސް އިބްރާހީމް މުހައްމަދު ސޯލިހުގެ އިސްނެންގެވުމަކުންނެވެ. އެ މަސައްކަތް ކުރި ގޮތުގެ ކުރު ވީޑިއޯއެއް ޕްރެސް ކޮންފަރެންސް ފެށުމުގެ ކުރިން ދައްކައިލި އިރު، އެ ވީޑިއޯއިން ފެނުނު ގޮތުގައި މަސަައްކަތް ހިނގަމުން ދިޔައި އިރު ރައީސް އެތަނަށް ވަޑައިގެން މަސައްކަތް ހިނގަމުންދާ ގޮތް ބައްލަވައިވެސް ލެއްވި އެވެ.
ޓޫރިޒަމް މިނިސްޓަރު އަލީ ވަހީދު. ވިލިވަރު ކަރަންޓީން ފެސިލިޓީ ބައްލަވައިލައްވަނީ.---ފޮޓޯ: ޓޫރިޒަމް މިނިސްޓްރީ
"އަޅުގަނޑު ދެކޭ ގޮތުގައި މިއީ ދުރާލައި، ރައީސްގެ ވިޝަންގައި އަޅުގަނޑުމެންނަށް ކުރެވުނު ކަންތައްތައް. މިކަންތައްތައް ކުރެވިފައި އޮތީމާ އަޅުގަނޑުމެން މި ދަންނަވަނީ ހާސްނުވާށޭ،" އަލީ ވިދާޅުވި އެވެ.
އަލީ ވިދާޅުވީ ބަންދުކޮށްފައިވާ ރިސޯޓެއް ވެސް ވަގުތީ ގޮތުން ކަރަންޓީނު ފެސިލިޓީއަކަށް ބަދަލުކުރަން މަސައްކަތް ކުރަމުން އަންނަ ކަަމަށެވެ. ރާއްޖޭގައި މިހާރު ބަންދުކޮށްފައި ހުރި ރިސޯޓްތަކުގެ ތެރެއިން ބޭނުން ވެއްޖެ ހާލަތެއްގައި ބޭނުން ކުރެވޭނެ ތަންތަން ބަލަމުން އަންނަ ކަމަށް ވެސް އޭނާ ވިދާޅުވި އެވެ.
ހުއްޓާލާފައި އޮތް، 100 ކޮޓަރީގެ ރިސޯޓެއް މިހާރު އެބަ އޮތް ކަަމަށާއި ކަރަންޓް ދިނުމަށް ބޭނުންވާ ޖަނަރޭޓަރު ފަދަ ބައެއް ތަކެތި ގެންގޮސްގެން އެރަށް ބޭނުން ކުރަން ފެށޭނެ ކަމަށް ވެސް އޭނާ ވިދާޅުވި އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
43434
09 March 2020
ކަލޭމެން ޓެކްސް ނުދައްކާ ސަރުކާޜުން ކުރަންވާ ކަންތައް ކޮށްފައި މެޑެލް ޖަހާ!
ޢައްޔަބެ30
09 March 2020
އަލްހަމްދުލިﷲ. ޢިރާދަކުރެވިއްޔާ، މި ނުރައްކާތެރި ބަލިން ދިވެހިރާއްޖެ ސަލާމަތް ކުރެްވާނެ. ޢާމީން
ނޫމާ
09 March 2020
އާމީން .
ޝައްފަ
08 March 2020
ފްރެޝް އެއަރ ވަރަށް މުހިއްމު. ތާޒާ ވައި ލިބޭ ނަމަ ފަސޭހަ ވުމުގެ ޗާންސް ބޮޑު.
ޜަމްލާ
08 March 2020
ތައްޔާރީތައް ހަމަ ވަރަށް ރަނގަޅު. ޝުކުރު ހައްގީ އަލީ ވަހީދަކަށް ނޫން، ހެލްތު މިނިސްޓަރަށް
އިސްމާލި
08 March 2020
ޖަނާހު އަތުން ތިރަށް ވަގުތީ ގޮތުން ނަމަވެސް ނަގަން ބަދަލުގެ ގޮތުގައި ކިހާވަރެއް ދިންބާ؟
ނޫރާ
09 March 2020
ރަނގަޅުވާހަކައެއް. ކިތައް ބިލިޔަން ޑޮލަރު އޭނައަށް ދަވްލަތުން ދޭގޮތަށް ؟؟؟؟
އަހުމަދުބޭ
08 March 2020
މިއީ މިވަގުތަށް އެޅިވަރަށް ރަގަނޅު ކަމެއްގެ ގޮތުގައި ބަލައިގަންނަން،
ލިޔާނު
08 March 2020
ތުރާކުނުން ވިޔަސް ސީނު ގަމުން ވިޔަސް. ކޮވިޑް 19ވިޔަސް މާލެ އަތޮޅު މީހަ ފަތާދެވޭހާ ފަސޭހަ. އުތުރާއި ދެކުނު މީހާ އޮޔާ ބެހެން ދޫކޮއްލާ.
މުގޮށި6މީދާ
08 March 2020
އެއީ އާކަމެއްތަ. ފުރަތަމަހެދީ ފުނަދޫގަ، ދެންހެދީ ހުޅިމާލޭގަ، ދެންހެދީ އާރަށުގަ، ހަދާފަ ބުނީ މިއޮތީ މުޅި ގައުމު ތައްޔާރުވެފައޭ ގައުމީ ފެންވަރުގަ. ދެން ހުރިހާކަމެއް ނިމުނީމަ އޮތީ އެންބިއުލާންސުގަނޑެއް ގެންގޮސްގެން މާލޭ ގޭގޭގަ ކަންކުރާނެގޮތް ފަރިތަކޮށްލުން.
ރަންރީދޫ ޓުވިޓަރޭ
08 March 2020
ރަގަޅު