ކޮވިޑް-19 އަށް ޕޮޒިޓިވްވި ދެ މީހަކު ފެނުނު ޅ. ކުރެއްދޫ އައިލެންޑް ރިސޯޓުގެ މުވައްޒަފަކު ށ. ފޯކައިދޫ އަށް ދިޔަ ފަހުން ބައްޔަށް ޝައްކުވާ އަލާމާތްތައް ފެންނާތީ އެ މީހާގެ ޓެސްޓްތައް ހެދުމަށް ފަރުކޮޅުފުއްޓަށް ގެނައުމުގެ މަސައްކަތްކުރަމުން އަންނަ ކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން މިރޭ ބުނެފި އެވެ.
މިހާރު ކުރިއަށްދާ ޕްރެސް ކޮންފަރެންސެއްގައި ހެލްތު މިނިސްޓަރު އަބްދުﷲ އަމީން ވިދާޅުވީ ފޯކައިދޫން މި މީހާ ފާހަގަވުމާ އެކު ރައްކާތެރިކަމުގެ ގޮތުން އަޅަންޖެހޭ ފިޔަވަޅުތައް އަޅާފައިވާ ކަމަށާއި އެ މީހާ މިހާތަނަށް ބަހައްޓާފައި ހުރީ އެކަހެރިކޮށް ކަމަށެވެ. ނަމަވެސް ޓެކްނިކަލް ބޭފުޅުންގެ ލަފާގެ ދަށުން، އެ ރަށް އަރައި ފޭބުން މަނާކޮށްފައި ނުވާކަން ފާހަގަކުރެއްވި އެވެ.
މި ކަމާ ގުޅޭ އިތުރު މައުލޫމާތު ފަހުން ހިއްސާ ކުރާނެ ކަމަށް ވެސް އެޗްޕީއޭ އިން ބުންޏެވެ.
ކޮވިޑް-19 ރާއްޖޭން ފެނުނީ، އިޓަލީ ޓޫރިސްޓަކު ރާއްޖެ އައިސް ޗުއްޓީ ހޭދަކުރި ކުރެއްދޫ ރިސޯޓުންނެވެ. އެ ރިސޯޓުގެ ދެ މުވައްޒަފެއް އެ ބައްޔަށް ޕޮޒިޓިވްވި އެވެ. އެ އިޓަލީ ޓޫރިސްޓު، އެ ރިސޯޓުގައި ހުރުމަށް ފަހު އިޓަލީ އަށް އަނބުރާ ދިއުމަށް ފަހު، އެ ބައްޔަށް ޕޮޒިޓިވް ވުމުން އެކަން ރިސޯޓަށް އެންގި އެވެ. އެ ރަށް މިހާރު އޮތީ އަރައި ފޭބުން މަނާކޮށްފަ އެވެ. އަދި ގިނަ އަދަދެއްގެ މީހުން އެ ރަށުގައި ރޫމް އައިސޮލޭޝަންގައި އެބަތިބި ކަމަށް މިނިސްޓަރު އަމީން ވިދާޅުވި އެވެ.