ސިއްހީ ތަޖުރިބާކާރުންގެ އިރުޝާދާ އެއްގޮތަށް ސްކޫލުތަކުގެ ކިޔެވުން އަންނަ ހަފުތާގައި ބަންދުކުރަން ޓީޗަރުންގެ ޖަމިއްޔާއިން މިއަދު ގޮވާލައިފި އެވެ.
އެ ޖަމިއްޔާއިން ކުރި ޓްވީޓެއްގައި ބުނީ ކޮވިޑް-19 އިން ރައްކާތެރިވާން އަޅާ ފިޔަވަޅެއްގެ ގޮތުން ސްކޫލުތަކުގެ ކިޔެވުން ބަންދުކުރަން ޖެހޭނެ ކަމަށެވެ. އެންމެ އިސްކަމެއް ދޭން ޖެހޭނީ ޓީޗަރުންނާއި ދަރިވަރުންނާއި މުވައްޒަފުންގެ ސިއްހަތަށް ކަމަށް ވެސް އެ ޖަމިއްޔާއިން ބުންޏެވެ.
ސްކޫލުތައް މިހާރު އޮތީ ފުރަތަމަ ޓާމުގެ މިޑް-ޓާމް ބްރޭކުގަ އެވެ. ހަފުތާގެ ޗުއްޓީއަކަށް ފަހު އަންނަ އާދިއްތަ ދުވަހު ކިޔެވުން ފަށާނެ އެވެ. އެހެންވެ މިހާރު އޮތް ހާލަތުން ސްކޫލުތައް ބަންދުކުރަން ޑޮކްޓަރުންގެ ޖަމިއްޔާއިން ވެސް ސަރުކާރަށް ވަނީ ގޮވާލައިފަ އެވެ.
As per the advice of medical professionals, we request the government to bring a temporary halt in reopening of schools as a precautionary measure regarding the COVID19 viral outbreak. The health of our educators, students and staff should be the first priority @MoEdumv @aisthly
— Teachers' Association of Maldives (@TAMaldives) March 11, 2020
އަންނަ ހަފުތާގައި ސްކޫލުތައް ބަންދުނުކުރިއަސް، ދަރިން ސްކޫލަށް ނުފޮނުވާނެ ކަމަށް ސޯޝަލް މީޑިއާގައި ހިޔާލުފާޅުކުރި ބައެއް މީހުން ބުނެފައިވެ އެވެ.
ދަރުބާރުގޭގައި އިއްޔެ ބޭއްވި ޕްރެސް ކޮންފަރެންސެއްގައި ރައީސް އޮފީހުގެ އަންޑާ ސެކްރެޓަރީ މަބްރޫކް އަބްދުލްއަޒީޒް ވިދާޅުވީ ކޮވިޑް-19 އާ ގުޅިގެން ސްކޫލްތައް ބަންދުކުރާނީ ސްކޫލްތައް ހުންނަ ސަރަހައްދެއް ނުވަތަ ސިޓީއެއްގެ ހާލަތު ބަދަލުވުމުން ކަމަށާއި އެ ހާލަތު ރާއްޖޭގައި އަދި ނެތް ކަމަށެވެ.
އެޑިއުކޭޝަން މިނިސްޓްރީން ކުރިން ބުނީ ކިޔެވުން ބަންދުކުރުމާ މެދު ގޮތެއް ނިންމާނީ ހެލްތު ޕްރޮޓެކްޝަން އެޖެންސީ (އެޗްޕީއޭ)ގެ ލަފަ އާއި އިރުޝާދާ އެކު ކަމަށެވެ.
