ކޮރޯނާވައިރަސް ކޮންޓްރޯލް ކުރުމަށް ސަރުކާރުން މާލެ ސަރަހައްދުގައި ކާފިއު އިއުލާންކުރަން ފެށިތާ މިއަދަށް ފަސް ދުވަސްވީ އިރު، އެ ވަގުތު ބޭރަށް ނިކުންނަ މީހުންގެ އަދަދު މަދު ނުވެ މިއަދު ވެސް އެތައް ބަޔަކަށް ނަސޭހަތްދީފި އެވެ.
ހަވީރު 5:00 އިން ރޭގަނޑު 8:00 އަށް ކާފިއު ހިންގާފައި އޮންނަ އިރު، މިރޭ ވެސް ވަނީ ރެއަށް ވުރެ ގިނަ މީހުން ފުލުހުން މަގުމަތިން ހިފަހައްޓައި ނަސޭހަތް ދީފަ އެވެ. އެގޮތުން ރޭ ބޭރަށް ނިކުމެ އުޅުނު 122 ދިވެއްސަކާއި 17 ބިދޭސީއަކަށް ނަސޭހަތްދިން އިރު، މިރޭ ވަނީ އެ އަދަދު 183 އަށް އަރައިފަ އެވެ. އެއީ 150 ދިވެހިންނާއި 33 ބިދޭސީންނެވެ.
އޭގެ ތެރޭގައި ހަ މީހަކަށް ދެ ފަހަރަށް ނަސޭހަތް ދީފައިވާއިރު، އެކަކު ޖޫރިމަނާކޮށްފައި ވެ އެވެ. ކާފިއު ވަގުތުގައި ބޭރުތެރޭގައި އުޅޭ މީހުން ޖޫރިމަނާއާ ހަމަ އަށް ދަނީ ދެ ފަހަރަށް ނަސޭހަތްދީ، އަދި އިންޒާރަށް ފަހު ފުލުހުންގެ ރެކޯޑަށް ބަލައިފަ އެވެ.
ކާފިއުގެ ވަގުތުގައި މަގުތަކަށް ނުކުންނަ މީހުންގެ އަދަދު އިތުރުވާތީ، ނެޝަނަލް އިމަޖެންސީ އޮޕަރޭޝަން ސެންޓަރު (އެންއީއޯސީ) އިން ވަނީ ކަންބޮޑުވުން ވެސް ފާޅުކޮށްފަ އެވެ.
އައިޖީއެމްއެޗްގެ ޑޮކްޓަރު މޫސާ މުރާދު ވިދާޅުވީ ކާފިއުގެ ވަގުތުގައި ގޭގައި ތިބެންވީ އެއީ މަޖުބޫރެއްގެ ގޮތުގައި ބަލައިގެން ނޫން ކަމަށާއި އެއީ ބަލިން ރައްކާތެރިވުމަށް ލިބޭ ފުރުސަތެއްގެ ގޮތުގައި ބަލަން ޖެހޭ ކަމަށެވެ. ކާފިއުގެ ވަގުތު ތިން ގަޑިއިރަށް އޮތުމަކީ ނަސީބެއް ކަމަށާއި ކުރެވޭ ކަމެއްގެ ސަބަބުން، އެއަށް ވުރެ ގިނަ އިރު ގެއިން ނުނިކުމެ ތިބެން ޖެހިދާނެ ކަމަށް ވެސް އޭނާ ވިދާޅުވި އެވެ.
ކޮވިޑް-19 އަށް ރާއްޖޭން ޕޮޒިިޓިވްވި މީހުންގެ އަދަދަކީ މިހައިތަނަށް 19 އެވެ. އޭގެ ތެރެއިން ދެ މީހަކު ވަނީ ރާއްޖޭން ފުރައިގެން ގޮސްފަ އެވެ. އަނެއް 17 މީހުންގެ ތެރެއިން 13 މީހަކު މިހާރު ވަނީ އެބަލިން ރަނގަޅުވެފަ އެވެ.