މާލެތެރޭގައި ކޮވިޑް-19 ފެތުރުނު ނުދޭން އަޅާ ފިޔަވަޅެއްގެ ގޮތުން މާލެ ލޮކްޑައުންކޮށްފި ނަމަ ގޭގެ އަށް ތަކެތި ފޮނުވައިދޭނެ ފިހާރަތަކުގެ މައުލޫމާތު މާލޭ ސިޓީ ކައުންސިލުން އެއްކޮށްފި އެވެ.
ޗައިނާގައި މިދިޔަ ޑިސެމްބަރު މަހު ފެތުރެން ފެށި އަދި ރާއްޖެއިން ވެސް މިހާރު ވެސް ފެނިފައިވާ ކޮވިޑް-19 އިން ރައްކާތެރިވުމަށް ސަރުކާރުން ވަނީ ގިނަ ފިޔަވަޅުތަކެއް އަޅައިފަ އެވެ. އެގޮތުން ސަރުކާރުގެ އޮފީސްތަކާއި ސްކޫލުތަކާއި ކޮލެޖުތައް ބަންދުކުރުމާއި ޖަމާއަތުގައި ނަމާދުކުރުން މެދުކަނޑާލުމާއި ކެފޭ އަދި ރެސްޓޯރެންޓުތަކުގައި ތިބެގެން ކެއުން ބުއިމުގެ ހިދުމަތް ދިނުން ވެސް ވަނީ މަނާކޮށްފަ އެވެ.
ކޮންމެ ދުވަހަކު ހަވީރު ފަހަކުން ރޭގަނޑު އަށެއް ޖެހުމާ ހަމައަށް މާލެ އާއި ހުޅުމާލެ އަދި ވިލިމާލޭގައި އަންނަނީ ކާފިއު ވެސް ހިންގަމުންނެވެ. މިހާ ހަރުކަށިކޮށް ފިޔަވަޅު އަޅަމުން އަންނަ އިރު ވެސް ބައެއް މީހުން މި ފިޔަވަޅުތަކަށް ސީރިއަސްކަން ނުދޭތީ، މާލެ ލޮކްޑައުންކުރަން ޖެހިދާނެ ކަމަށް ޑޮކްޓަރުން ވަނީ ވިދާޅުވެފަ އެވެ.
މާލޭ ސިޓީ ކައުންސިލުން ބުނީ އެފަދަ ހާލަތަކަށް ހިނގައްޖެ ނަމަ، މާލޭގެ ގޭގެއަށް ޑެލިވަރީކޮށްދޭނެ 334 ފިހާރައެއްގެ މައުލޫމާތު އެއްކޮށްފައިވާ ކަމަށެވެ. އަދި ވިލިމާލޭގެ 30 ފިހާރައެއްގެ މައުލޫމާތު އެއްކޮށްފައިވާ އިރު ބައެއް ފިހާރަތަކުން ޑެލިވަރީކޮށްދޭން އެއްބަސްވެފައިވާ ކަމަށް ކައުންސިލުން ބުންޏެވެ.
މާލޭގެ ގެތަކަށް މުދާ ފޮނުވައިދޭން އެއްބަސްވި ފިހާރަތަކުގެ ތެރެއިން 200 އަށް ވުރެން ގިނަ ފިހާރަ އަށް އަދި ވިލިމާލޭގެ 17 ފިހާރަ އަށް އޮންލައިންކޮށް ފައިސާ ދެއްކެ އެވެ.
ހުޅުމާލޭގައި ސާވޭ ކުރީ ހައުސިން ޑިވެލޮޕްމެންޓް ކޯޕަރޭޝަނުންނެވެ. ލޮކްޑައުންއަކަށް ހިނގައްޖެ ނަމަ، އެ އަވަށުގައި ވެސް ޑެލިވަރީކޮށްދޭން ފިހާރަތަކުން އެއްބަސްވެފައިވާ ކަމަށް މާލޭ ސިޓީ ކައުންސިލުން ބުންޏެވެ.
ރާއްޖެއިން މިހާތަނަށް 19 މީހަކު ވަނީ ކޮވިޑް-19 އަށް ޕޮޒިޓިވްވެފަ އެވެ. އޭގެ ތެރެއިން 13 މީހަކު ރަނގަޅުވެފައިވާއިރު އެ ބަލީގައި މިހާރު ފަރުވާ ދެމުން އަންނަނީ އިނގިރޭސިވިލާތުން އައި ފަހުން ކޮވިޑަށް ޕޮޒިޓިވްވި ހަތަރު ދިވެހިންނަށެވެ. ބާކީ ތިބި ދެ މީހުން އެ ބައްޔަށް ޕޮޒިޓިވްވިކަން އެނގުނީ ރާއްޖެއިން ފުރައިގެން ދިޔަ ފަހުންނެވެ. އެއީ އިޓަލީގެ ދެ ޓޫރިސްޓުންނެވެ.
