ޕީޕީއެމްގެ ކައުންސިލާއި އެ ޕާޓީގެ ގުނަވަންތަކުގެ ބައްދަލުވުންތައް ނުބާއްވަން އެ ޕާޓީގެ ރައީސް މައުމޫން އަބްދުލްގައްޔޫމް އަންގަވާފައިވާ އެންގެވުމަށް އަމަލުކުރުން މަޑުޖައްސައިލަން ސިވިލް ކޯޓުން ކޮށްފައިވާ އަމުރު ތަންފީޒުކޮށް ދޭން ހުށަހަޅައިފި ކަމަށް ކައުންސިލްގެ މެމްބަރަކު މިއަދު ވިދާޅުވެއްޖެ އެވެ. ޕާޓީގެ ކައުންސިލްގެ ބައްދަލުވުންތައް މައުމޫންގެ ހުއްދަ ނެތި ނުބާއްވަން އެމަނިކުފާނު އަންގަވާފައި ވަނިކޮށް، އެ އެންގުމަށް އަމަލުކުރުން ފަސްކުރަން ކޯޓުން މިދިޔަ އޮގަސްޓްމަހު ހަތަރު ވަނަ ދުވަހު އަމުރުކުރީ އެއީ ޕާޓީގެ އަސާސީ ގަވާއިދާ ޚިލާފް އެންގުމެއް ކަމަށް ބުނެ، އެ އެންގުން ބާތިލްކުރަން ޕީޕީއެމަށް ނިސްބަތްވާ ރައްޔިތުންގެ މަޖިލީހުގެެ ދެ މެމްބަރަކު މައްސަލަ ހުށަހެޅުމުންނެވެ. ނައިފަރު ދާއިރާގެ މެމްބަރު އަހުމަދު ޝިޔާމާއި ހުޅުދޫ ދާއިރާގެ މެމްބަރު މުހައްމަދު ޝާހިދު ހުށަހެޅުއްވި އެ މައްސަލާގައި ކޯޓުން އަމުރުކޮށްފައިވަނީ އެ މައްސަލާގައި ކޯޓުން ގޮތެއް ނިންމަންދެން، މައުމޫންގެ އެންގުމަށް އަމަލުކުރުން ފަސްކުރަން އަމުރުކުރާ ކަމަށެވެ.
ރައީސް އަބްދުﷲ ޔާމީނަށް ތާއީދުކުރައްވާ އެ ޕާޓީގެ ކައުންސިލް މެމްބަރު އަބްދުﷲ ހަލީލް މިއަދު ދަރުބާރުގޭގައި ނޫސްވެރިންނާ ވާހަކަދައްކަވަމުން ވިދާޅުވީ ޕާޓީގެ ގުނަވަންތައް ހަރަކާތްތެރިކުރުމަށް ކޯޓުން އަމުރެއް ނެރެފައިވީ ނަމަވެސް ނަމަވެސް އެކަށީގެންވާ ގޮތެއްގައި އެކަން ކުރިޔަށްދާ ތަނެއް ނުފެންނަ ކަމަށެވެ.
"އެހެންވީމަ މިހާރު އިވިފައި އޮތް ގޮތުން ޕާޓީގެ މެމްބަރުންތަކެެއް އެ އަމުރު ތަންފީޒުކޮށްދިނުމަށްޓަކައި އަނެއްކާ ވެސް ކޯޓަށް ހުށަހަޅާފައިވާކަން ދަންނަވާލަން ބޭނުން،" އޭނާ ވިދާޅުވި އެވެ.
ޕީޕީއެމްގެ އިސް އޮފިޝަލަކު "މިހާރު"އާ ވާހަކަދައްކަވަމުން މިއަދު ވިދާޅުވީ ސިވިލް ކޯޓުން ނެރުނު އަމުރު ތަންފީޒުކޮށްދޭން އެދުނު ކަމެއް އެނގިފައިނުވާ ކަމަށެވެ. އަދި ސިވިލް ކޯޓުން ނެރުނު އަމުރު ތަންފީޒުކުރެވެން އޮތީ ކައުންސިލް ބައްދަލުވުމެއް ބޭއްވިގެން ކޯޓު ތަމްސީލްކުރައްވާނެ ބޭފުޅަކު ކަނޑައެޅިގެން ކަމަށް ވެސް އޭނާ ވިދާޅުވި އެވެ.
"އެ މައްސަލަ ހުށަހެޅުއްވި ދެ ބޭފުޅަކު ކައުންސިލްގައި ހިމެނޭ. އެހެންވީމަ އެ ބޭފުޅުންގެ މަސްލަހަތު ފުށުއަރާ ކަމެއްގައި ކައުންސިލްގެ ބައްދަލުވުމުގައި ބައިވެރިކޮށްގެން އެ ބައްދަލުވުމެއް ކުރިޔަށް ނުގެންދެވޭނެތީ ބައްދަލުވުން ނުބާއްވަނީ،" އެ އޮފިޝަލް ވިދާޅުވި އެވެ.
ދަރުބާރުގޭގައި މިއަދު އޮތް ނޫސްވެރިންގެ ބައްދަލުވުމުގައި ވާހަކަދައްކަވަމުން ކައުންސިލް މެމްބަރު އަދި ޓޫރިޒަމް މިނިސްޓަރު މޫސާ ޒަމީރު ވިދާޅުވީ ޕާޓީގެ ކައުންސިލް ބައްދަލުވުމެއް ބޭއްވޭނެ ގޮތެއް އޮތްތޯ ބެލުމަށް އިލެކްޝަންސް ކޮމިޝަނާއެކު ވެސް މަޝްވަރާކުރަމުން އަންނަ ކަމަށެވެ.
ސިވިލް ކޯޓުން ނެރުނު އަމުރު ރައްދުވަނީ މައުމޫނާއި ޕީޕީއެމާއި އެ ޕާޓީގެ ކައުންސިލާއި އެ ޕާޓީގެ ހުރިހާ ގުނަވަންތަކާއި އެކަމުގައި ހިމެނޭ ހުރިހާ ފަރާތްތަކަށް ކަމަށް އަމުރުގައިވެ އެވެ. އެ މައްސަލާގައި ސުލްހަވެރި ހައްލެއް ލިބޭތޯ ކޯޓުގައި ބޭއްވި ބައްދަލުވުމުގައި ހައްލެއް ނުލިބުމުން މައްސަލަ ވަނީ ޝަރީއަތަށް ފޮނުވައިފަ އެވެ. މައުމޫންގެ އެންގުމަށް އަމަލުކުރުން ފަސްކުރަން އަމުރު ކުރީ މައުމޫން ނެތި ކައުންސިލް ނުބާއްވަން އަންގައި، މައުމޫން ރާއްޖެއިން ބޭރަށް ވަޑައިގެންފައި ވަނިކޮށެވެ. މައުމޫނާއި އެ ޕާޓީގެ ޕާލިމެންޓްރީ ގްރޫޕުގެ މެމްބަރުންނާއި ޚިޔާލު ތަފާތުވެ، ޕާޓީގެ ކައުންސިލާއި ގުނަވަންތަކުގެ ބައްދަލުވުންތައް ނުބާއްވަން މައުމޫން އެންގެވީ މިދިޔަ ޖުލައި މަހުގެ ތެރޭގަ އެވެ. އޭގެ ފަހުން މައުމޫންގެ ބެއްލެވުމުގެ ދަށުން ކައުންސިލްގެ ބައްދަލުވުމެއް ބާއްވަން މަސައްކަތް ކުރިޔަސް ޚިޔާލު ތަފާތުވުންތަކާ ހެދި އެ ބައްދަލުވުން ވަނީ ހުއްޓާލަން ޖެހިފަ އެވެ. މައުމޫން އެ އެންގެވުން އެންގެވި ފަހުން ޕާޓީގެ ސުލޫކީ ކޮމެޓީން ވަނީ މައުމޫންގެ ދަރިކަލުން އަދި ދިއްގަރު ދާއިރާގެ މެމްބަރު ފާރިޝް މައުމޫނާއި އިތުރު ބަޔަކު ޕާޓީން ވަކިކުރަން ނިންމައިފަ އެވެ. އެކަމަކު މައުމޫން ވިދާޅުވަނީ އެ ބޭފުޅުން ވަކިނުވާ ކަމަށެވެ.