މީގެ ކުރިން މާލޭ މަގަކުން ބިދޭސީ މަސައްކަތު މީހުން ސަލާންޖަހާ މަންޒަރެއް ނުފެންނާނެ އެވެ. އެކަމަކު ކޮވިޑް-19 އާ ގުޅިގެން މާލެ ލޮކްޑައުންކުރުމުން ބައެއް ބިދޭސީންގެ މަސައްކަތްތައް ގެއްލި، ތަޖުރިބާކުރަމުން ދަނީ ހައިހޫނުކަމެވެ.
ސޯޝަލް މީޑިއާއިން ފެނުނު ޕޯސްޓެކެވެ. ލައްމާހު މަނިކުފާނު ނަމަކަށް ކިޔާ ޒުވާނަކު ފޭސްބުކްގައި ލިޔުނު ގޮތުގައި އިއްޔެ ރޭ އޭނާއަށް މާލޭން ދިމާވި ދެ ބިދޭސީން ވެސް ތިބީ ރޮވިފަ އެވެ. އެމީހުން އޭނާ ކައިރީ ސަލާން ޖެހީ ފައިސާއަކަށް ނޫނެވެ. ކާނެ ކޮންމެވެސް އެއްޗެއް ލިބޭނެ ފަދަ މަސައްކަތަކަށެވެ.
އޭނާ ލިއުނު ގޮތުގައި އޭރު ރޭގަނޑު ދިހައެއް ޖަހައިފި އެވެ. އެކަމަކު ލޮލުން ކަރުނަ ހިލިފައި ތިބި ދެ މީހުން ވެސް ކާނެ އެއްޗެއް ނުލިބި، ރޯދަ ވެސް ނުވީއްލާ ކަމަށް، އެ މީހުންނާ ހަވާލާދީ، އޭނާ ބުންޏެވެ.
ލައި އަޒްފާން ނާޝިދަށް ވެސް ދިމާވީ ހަމަ އެފަދަ ކަމެކެވެ. އޭނާ ބުނި ގޮތުގައި އޮފީހުން ގެއަށް ދަނިކޮށް، ފަހަތުން މީހަކު "ދައްތާއޭ" ކިޔާ ގޮވާލި އިރު ފެނުނީ ވަރަށް ބޮޑަށް މާޔޫސްވެފައި ހުރި ބިދޭސީ މަސައްކަތު މީހެކެވެ. އޭނާގެ އާދޭހަކަށް ވީ ވެސް ކާއެއްޗެއް ދިނުމެވެ.
"އޭނާ ބުނަނީ ދައްތާ ހެލްޕު ބޭނުމޭ. މަސައްކަތް ނެތީއޭ. ސެލެރީ ނެތީއޭ. ކާން ނުލިބެނީއޭ. ރޯދައަށް ހުންނަނީ ވެސް ފެން ބޮއެގެންނޭ،" ފުލުހުންގެ ތެރޭގައި މަސައްކަތް ކުރަމުން އަންނަ ލައި ކިޔައިދިނެވެ.
"އޭރު އޭނާގެ ދެ ލޮލުން ކަރުނަ ފައިބައި،" އޭނާ ލިއުނެވެ.
ލައި އެ މީހާއަށް އެހީވި އެވެ. ކައިރީގައި ހުރި ރެޑްވޭވްގެ ފިހާރައަކުން ޕާނަކާއި ޖޫސް ޕެކެޓާއި ބައެއް އިތުރު ކާއެއްޗެހި ގަނެދިނެވެ. އެކަމަކު ދެން އޭނާ ސޯޝަލް މީޑިއާއަށް ދޫކޮށްލީ ސުވާލުތަކެކެވެ. އެ މީހުން ރާއްޖެ ގެނައި "ވެރިން" ކޮބައި ހެއްޔެވެ؟ އެ މީހުން އެ ބިދޭސީންނަށް ކާތަކެތި ފޯރުކޮށް ނުދެނީ ހެއްޔެވެ؟
"މުވައްޒަފުން ހައިހޫނުކަމުގައި ތިއްބާ ވެރިންނަށް ބަނޑުފުރާ ކެވޭ ބާ އެވެ." ލައްމާން ވެސް ކުރީ ހަމަ މި ފަދަ ސުވާލުތަކެވެ.
ރާއްޖޭގައި ގިނައީ ބަންގްލަދޭޝްގެ މަސައްކަތު މީހުންނެވެ. ރޯދަމަހު މިސްކިތްތަކުން ރޯދަ ވީއްލުމަކީ އެ މީހުންގެ އާދައެކެވެ. އެކަމަކު ކޮވިޑް-19 އިން ރައްކާތެރިވުމުގެ ފިޔަވަޅެއްގެ ގޮތުން މިސްކިތްތައް ވަނީ ބަންދުކޮށްފަ އެވެ.
ބަލިމަޑުކަމުގައި ބިދޭސީންނަށް ބިރު ބޮޑު
ރާއްޖޭގައި މަސައްކަތް ކުރާ ބިދޭސީންގެ އަދަދު މިހާރު ލައްކައަކަށް ވުރެ މައްޗެކެވެ. އޭގެ ތެރޭގައި ގަވައިދާ ހިލާފަށް އުޅޭ މީހުން ވެސް ގިނަ އެވެ. އެފަދަ މީހުން ހޯދައި، ގައުމަށް ފޮނުވާލުމުގެ މަސައްކަތް، އެކި ނަންނަމުގައި ސަރުކާރުން ކުރި ނަމަވެސް، އެއީ މިހާތަނަށް އެއްވެސް ސަރުކާރަކަށް ކާމިޔާބުވި ކަމެއް ނޫނެވެ.
ކޮރޯނާވައިރަސްގެ ބިރުވެރިކަން ރާއްޖެއަށް އައުމުގެ ކުރިން ވެސް، ކަމާ ބެހޭ އިދާރާތަކުގެ ކަންބޮޑުވުމަކީ ބިދޭސީންގެ ތެރޭގައި ބަލި ފެތުރިދާމެ ކަމެވެ. ކުދިކުދި ތަންތަނުގައި އެތައް ސަތޭކަ ބިދޭސީން ތޮއްޖެހިގެން އުޅޭއިރު، އެއީ މި ވައިރަސް ފެތުރެން ހުޅުވިފައި އޮންނަ ވަރަށް ބޮޑު ދޮރެކެވެ. އެހެންވެ، މާލެ ތެރޭގައި ބަލި ފެތުރުމާ އެކު ސަރުކާރުން ގެންދަނީ ތޮއްޖެހިގެން ދިރިއުޅޭ ތަންތަނަށް ފުލުހުންގެ ބެލުމުގެ ދަށަށް ގެނެސް އަދި ބައެއް ބިދޭސީން އެހެން ތަންތަނަށް ބަދަލުކޮށްފަ އެވެ.
މިހާތަނަށް އެއްފަހަރާ އެންމެ ގިނަ މީހުން ޕޮޒިޓިވް ވީ ވެސް ބިދޭސީން އުޅޭ އިމާރާތެއްގަ އެވެ. އެގޮތުން ރޭ އެތަނުން 95 ބިދޭސީން ޕޮޒިޓިވްވި އެވެ. މިހާތަނަށް 252 ބަންގްލަދޭޝް މީހުންނާއި 49 އިންޑިއާ މީހުން ޕޮޒިޓިވް ވެއްޖެ އެވެ. އެހެންވެ ބިދޭސީންގެ މެދުގައި ވަރަށް ބޮޑަށް ބަލި ފެތުރިފައި އޮތް ކަމަށް ފެނެ އެވެ.
ކާއެއްޗަކަށް ސަލާން ޖަހާ ބިދޭސީންނާ، މާލެ އާއި ހުޅުމާލޭގެ އެކި ތަންތަނުން ދިމާވާ ވާހަކަ ސޯޝަލް މީޑިއާއިން ފެނެ އެވެ. އެ ފަދަ ވާހަކަތަކަށް މީހުން ހަމްދަރުދީވެ އެވެ. މިއީ ދަތި ހާލަތެއް ނަމަވެސް، އެއީ ވެސް އިންސާނުން ކަމަށް ދެކިގެން، ކޮންމެވެސް ގޮތަކުން ކާއެއްޗެއް ފޯރުކޮށްދެ އެވެ.
"އަހަރެން އެއިން މީހަކަށް ކާން ދީފާނަން. އެކަމަކު ނުކައި އަދިވެސް ގިނަ ބަޔަކު ތިބޭނެ. މި މައްސަލައަށް ދާއިމީ ހައްލެއް ލިބޭނީ ބިދޭސީންގެ އަދަދު މަދުކޮށްގެން ނޫންތަ؟،" ސޯޝަލް މީޑިއާގައި ހިޔާލުފާޅުކުރި މީހަކު ބުންޏެވެ.