ކޮވިޑާ ހަނގުރާމަކުރަން ދަރިފުޅު ކުރީ ސަފުގައި، ރޮމުން މަންމަ ދިން މެސެޖް

ޒުވާން ރީއަތު ހަމީދުގެ ކިޔެވުން އަދި ފުރިހަމައެއް ވެސް ނުވެ އެވެ. ގައުމީ ޔުނިވަސިޓީގައި ޑޮކްޓަރުކަން ކިޔަވަން ފެށިތާ އަހަރެއްވީތަނުން، ކޮރޯނާވައިރަސްގެ ބަލިމަޑުކަމާ ކުރިމަތިލާން ޖެހި، ކިޔެވުން މެދުކަނޑާލަން ޖެހުނީ އެވެ. އެކަމަކު، ވޮލަންޓިއަރެއްގެ ހައިސިއްޔަތުން މިހާރު އޭނާ މަސައްކަތް ކުރަމުން އަންނަނީ ބައްޔާ ދެކޮޅަށް ކުރަމުންދާ ހަނގުރާމައިގެ ކުރީ ސަފުގަ އެވެ.

މިއީ އޭނާގެ އާއިލާ އަށް ފަސޭހަ ކަމެއް ނޫންކަން، ރީއަތުގެ މަންމަ ފޭސްބުކަށް ދޫކޮށްލާފައިވާ އަސަރު ގަދަ މެސެޖުން އެނގެ އެވެ. ދަރިފުޅާ އެކު ނަގާފައިވާ ފޮޓޯއަކާ އެކު، ރީއަތުގެ މަންމަ ފާތުމަތު ނަސީރު ލިޔެފައިވެ އެވެ.

"އަހަރެން މިއަދު، (ދުނިޔޭގައި ހުރި) އަހަރެންގެ ހަގު ދަރި މި ވަނީ ގައުމާ ހަވާލުކޮށްފަ އެވެ. މިއަކީ ފަސޭހަ ކަމެއް ނޫނެވެ." ގިނަ ބަޔަކު ޝެއާކޮށްފައިވާ އެ ޕޯސްޓުގައި އޭނާ ލިޔެފައިވެ އެވެ.

"މި ދަނޑިވަޅު ބަލަންވީ ތިމާ އަށް ގައުމަށް ކޮށްދެވޭނީ ކޮން ކަމެއްތޯއޭ އެވެ."

ވޮލަންޓިއަރެއްގެ ގޮތުން ރީއަތު އަންނަނީ ގިނަ ބައެއްގެ ސާމްޕަލް ނަގައި ޓެސްޓު ހަދަމުންނެވެ. އޭނާ ހެދި ބައެއް ޓެސްޓުތައް ޕޮޒިޓިވް ވެސް ވަނީ ވެފަ އެވެ.

ފާތުމަތު ނަސީރު ބުނިގޮތުގައި އޭނާގެ އެންމެ ލޯބިވާ މަންމަ އާއި ހަގު ދަރިފުޅު ވަނީ މީގެ ކުރިން މަރުވެފަ އެވެ. އަދި މިހާރު ވެސް އެކަމުގެ ހިތާމަ އޭނާ ކުރެ އެވެ. އެކަމަކު ދެން ހަގަށް ހުރި ދަރިފުޅު، މަރުގެ މި ބައްޔާ ކުރިމަތިލުމަށް އޭނާ ފޮނުވީ، ދެން ވެސް ބަލިވާނީ މީހެއްގެ މައެއް ނުވަތަ ބަފައެއް ނުވަތަ ދަރިއެއް ކަމަށް ވުމުން އެ މީހުންނަށް އެހީވުމަށް ކަމަށް އޭނާ ބުންޏެވެ.

ހޮސްޕިޓަލަށް ހިދުމަތް ކުރަން ނުކުތް ފަހުން ރީއަތު އަދި ގެއަކަށް ނާދެ އެވެ. ފާތުމަތު ނަސީރު ބުނިގޮތުގައި ދަރިފުޅު ލޮލުން ވެސް ދުށީ އެންމެ ފަހަރަކު އެވެ. އޭނާ އަށް އެންމެ އަސަރު ކުރީ ދަރިފުޅާ ލެޕްޓޮޕް ހަވާލުކުރަން ކައިރިވާން ހެދީމައި، ދުރުގައި ހުރުމަށް ރީއަތު އެދުމުންނެވެ.

ފާތުމަތު ބުނިގޮތުގައި މުޅި މީހާ ފޮރުވޭ ރައްކާތެރި ހެދުމެއްގައި ދަރިފުޅު ގިނަ ވަގުތު ހޭދަ ކުރާއިރު، ބައެއް މީހުން އެ ފަދަ މީހުންނާ މެދު ދެކޭގޮތް ރަނގަޅެއް ނޫނެވެ. އެ ފަދަ އުނދަގޫ ހެދުމެއް ލައިގެން، އުސް އިމާރާތްތަކަށް ސިޑިން އަރާއިރު ބައެއް ފްލޯތަކުގައި އުޅޭ މީހުން އެ މީހުންނާ ދިމާއަށް އެއްޗެހި ކިޔާ ކަމަށް އޭނާ ބުންޏެވެ.

ބައެއްގެ ސާމްޕަލް ނެގުމަށް މިއަދު ވެސް ރީއަތު ރަށަކަށް ދާން ޖެހެ އެވެ. އޭނާގެ މަންމަ އަށް މިއީ ވެސް ނޭވާ ހިފަހައްޓާލަން ޖެހޭ ދުވަހެކެވެ. އެކަމަކު އޭނާ ދަރިފުޅާ މެދު ދެކޭ އުއްމީދުތައް ފޮންޏެވެ.

މަންމަ އެދެނީ މުޅި ދުނިޔެ ވެސް މިހާރު ބިރުގަންނުވާލާފައިވާ ބަލިމަޑުކަމާ ކުރިމަތިލަމުން އަންނަ އެ ދަރިފުޅުގެ ރައްކާތެރިކަމަށް ދުއާ ކޮށްދިނުމެވެ.

ރީއަތުގެ އިތުރުން ވޮލެންޓިއަރުންގެ ގޮތުގައި ޑޮކްޓަރުކަމާއި ނަރުސްކަން ކިޔަވާ ގިނަ ކުދިން ހަރަކާތްތެރިވެ އެވެ. އަދި އެހެން ދާއިރާތަކުން ވެސް ގިނަ ބަޔަކު އަންނަނީ ހިލޭ ސާބަހަށް މަސައްކަތް ކުރަމުންނެވެ.

ރާއްޖޭގައި ކޮރޯނާވައިރަހުގެ ނުރައްކާ ބޮޑުވަމުން އަންނައިރު 500 އަށް ވުރެ ގިނަ މީހުން މި ބައްޔަށް ޕޮޒިޓިވްވެ، އެކަކު މިހާރު ވަނީ މަރުވެފަ އެވެ. އަދި ކުރިއަށް އޮތް ދެ ހަފުތާ ތެރޭގައި މި އަދަދު އިތުރުވާނެކަމަށް ކަމާ ބެހޭ އިދާރާތަކުން ދަނީ ބުނަމުންނެވެ. ބަލިވާ މީހުންގެ އަދަދު ކިތަންމެ ގިނަވި ނަމަވެސް، ފުރާނަ އަތް މައްޗަށް ލައިގެން ހިދުމަތް ފޯރުކޮށްދޭން ތިބީ މަދު ބައެކެވެ. އެހެންވެ، އެ މީހުންގެ މަސައްކަތުގެ އަގު ވަޒަން ކުރަން ޖެހެ އެވެ.