ކޮވިޑް-19 އަށް ރާއްޖޭން ޕޮޒިޓިވްވާ މީހުންގެ އަދަދު މިދިޔަ ދެ ދުވަހު 10 އިން ދަށަށް ހިނގައްޖެ އެވެ. ނަމަވެސް ޓެސްޓްކުރަން ނެގި ގިނަ ސާމްޕަލްތަކެއް ޓެސްޓް ނުކުރެވި ހުރިކަން އެޗްޕީއޭގެ މައުލޫމާތުން ދައްކަ އެވެ.
މިދިޔަ އޭޕްރީލް 15 ވަނަ ދުވަހު ކޮވިޑް-19 ގެ ބަލި މީހަކު މާލެއިން ފެނުނު ފަހުން، ކޮންމެ ދުވަހަކު ވެސް ގިނަ ބަޔަކު ދިޔައީ އެ ބައްޔަށް ޕޮޒިޓިވްވަމުންނެވެ. ނަމަވެސް މި މަހުގެ އެއް ވަނަ ދުވަހުން ފެށިގެން އެ އަދަދު ވަރަށް ބޮޑަށް އައީ މަދުވަމުންނެވެ. އެޗްޕީއޭގެ ޑޭޝްބޯޑުން ދައްކާ ގޮތުގައި މި މަހު 1 ގައި 29 މީހަކު ޕޮޒިޓިވްވި އިރު ދެ ވަނަ ދުވަހު ޕޮޒިޓިވްވީ 12 މީހުންނެވެ. އަދި ތިން ވަނަ ދުވަހު ފަސް މީހުން ޕޮޒިޓިވްވި އިރު ހަތަރު ވަނަ ދުވަހު ޕޮޒިޓިވި ކަމަށް ދައްކަނީ ހަ މީހުންނެވެ.
ނަމަވެސް އެޗްޕީއޭ އިން އަމަލުކުރަމުން އަންނަ ގޮތަށް ބަލާއިރު ސާމްޕަލްތަކުގެ ނަތީޖާތައް ލިބުމުން ކުރީގެ ދުވަސްތަކުގެ ކޭސްތަކުގެ އަދަދަށް ވެސް ބަދަލު އާދެ އެވެ. އެހެންވެ މިހާރު މި ހުރި އަދަދުތަކަށް ވެސް ބަދަލު އައުން އެކަށީގެންވެ އެވެ.
މިހާރު ކޮންމެ ދުވަހަކު ހާމަކުރަނީ އެ ދުވަހެއްގެ އިރު އޮއްސި 6:00 އަނެއް ދުވަހުގެ އިރު އޮއްސި 6:00 އަށް ނަތީޖާ ލިބޭ ކޭސްތަކެވެ. އެގޮތުން އެޗްޕީއޭ އިން ރޭގެ 10:25 ގައި ޑޭޝްބޯޑް އަޕްޑޭޓްކުރި އިރު އަލަށް 22 މީހަކު ޕޮޒިޓިވްވި ކަމަށް ދައްކަ އެވެ. ނަމަވެސް މީގެ ތެރޭގައި މިދިޔަ މަހުގެ 20-28 އާ ދޭތެރޭގައި ނަގާފައިވާ ސާމްޕަލްތަކުގެ ނަތީޖާ ވެސް ހިމެނެ އެވެ. ދެން ހުރީ މި މަހުގެ އެކި ދުވަސްތަކުގެ ކޭސްތަކެވެ.
މީގެ ކުރިން، ކޮންމެ ރެޔަކު ނަތީޖާތައް އިއުލާނުކުރާއިރު، ނަތީޖާ ނުލިބި ހުރި ސާމްޕަލްތަކުގެ އަދަދު އާއްމުކޮށް އުޅެނީ ގާތްގަނޑަކަށް 300-400 ގައި ކަމަށް ވިޔަސް ރޭގެ ނަތީޖާތައް ހާމަކުރުމާ ހަމަޔަށް ޓެސްޓް ނުކުރެވި 900 ސާމްޕަލެއް ހުރި ކަމަށް ދައްކަ އެވެ. ނަމަވެސް އެއީ ކީއްވެކަން ސާފުކުރެވޭ ގޮތެއް ނުވި އެވެ.
ޓެސްޓް ނުކޮށް ގިނަ އަދަދެއްގެ ސާމްޕަލްތައް ހުރި އިރު، މިދިޔަ ދުވަސްތަކުގެ ޕޮޒިޓިވް ކޭސްތަކުގެ އަދަދަށް ބަދަލު އައުން ވަރަށް ބޮޑަށް އެކަށީގެންވެ އެވެ.
ކޮވިޑް-19 އިން ރައްކާތެރިވާން އިއުލާނުކޮށްފައިވާ ލޮކްޑައުން އަށް ލުއިތައް ދޭން ފެށުމުން އަލަށް ބަލި ޖެހޭ މީހުންގެ އަދަދު މައްޗަށް ދިއުން އެކަށީގެން ވިޔަސް، މިހާތަނަށް އެފަދަ ބަދަލެއް އައި ކަމަށް އެޗްޕީއޭ އިން ނުބުނެ އެވެ. އެ އިދާރާ އިން ބުނެފައިވާ ގޮތުގައި މިހާރު ކޮންމެ ދުވަހަކު 30-50 އާ ދެމެދުގެ އަދަކަށް މީހުން ޕޮޒިޓިވްވުން އެއީ މިފަދަ ބައްޔަކަށް ބަލާއިރު ގިނަ އަދަދެއް ނޫނެވެ. މިއީ މިހާރު އެ އަދަދު ހުރި މިންވަރެވެ.
ރާއްޖެއިން މިހާތަނަށް ކޮވިޑް-19 ޖެހިފައިވާކަން ކަށަވަރުވެފައިވަނީ 1،872 މީހަކަށެވެ. ރަނގަޅުވި މީހުންގެ އަދަދު 648 ގައި އުޅޭއިރު ހަތް މީހަކު މަރުވެފައި ވެ އެވެ. އެހެންވެ އެ ބައްޔަށް މިހާރު ފަރުވާ ހޯދަމުން އަންނަނީ 1،217 މީހުންނެވެ.