ރާއްޖެ އަށް ވަރަށް ވައިގަދަ، ސަމާލުވޭ

މިހާރު ކުރަމުންދާ ހުޅަނގު މޫސުމުގެ ވިއްސާރައިގައި މުޅި ރާއްޖެއަށް ވެސް ވަރަށް ގަދަޔަށް ވައި ޖެހެމުން ދާތީ ރައްކާތެރިވެ ތިބުމަށް އަންގައި މޯލްޑިވްސް މީޓިއޮރޮލޮޖިކަލް ސެންޓަރު (މެޓް) އިން މިއަދު ރީނދޫ އެލާޓް،ނެރެފި އެވެ.

މެޓުން ފުރަތަމަ ރީނދޫ އެލާޓް ނެރުނީ ހއ. އަތޮޅުން ފެށިގެން ތ. އަތޮޅާ ދެމެދަށެވެ. މިއަދުގެ ހަވީރު 5:30 އިން މިރޭގެ 8:30 އާ ދެމެދު އެ ސަރަހައްދަށް އާންމުކޮށް ވައި ޖެހޭނެ ކަމަށް ލަފާ ކުރަނީ ގަޑިއަކު 25 މެއިލާއި 30 މެއިލާ ދެމެދުގެ ބާރު މިނެއްގަ އެވެ. އަދި ވިލާގަނޑުގައި 55 މެއިލަށް ވައިގަދަ ވާނެ ކަމަށް ލަފާ ކުރެ އެވެ.

މެޓުން ދެންމެ ނެރެނު އިތުރު ރީނދޫ އެލާޓެއްގައި ވަނީ ލ. އަތޮޅުން ފެށިގެން އައްޑޫ ސިޓީއާ ހަމައަށް ވެސް ވަރަށް ވައިގަދަ ވާނެ ކަމަށް ލަފާ ކޮށްފަ އެވެ. މިރޭގެ 7:00 އިން 10:00 އަށް އެ ސަރަހައްދަށް ބޯކޮށް ވާރޭ ވެހުމާއެކު ގުގުރުން އެކަށީގެންވާ ކަމަށް އެލާޓްގައި ބުނެފައިވެ އެވެ. އަދި ގަޑިއަކު 45 މެއިލަށް ވައިގަދަވުން އެކަށީގެންވާ ކަމަށް ވެސް މެޓުން ބުންޏެވެ.

މެޓްގެ ޑިރެކްޓަރު އަހުމަދު ރަޝީދު، "މިހާރު" އަށް ވިދާޅުވީ މުޅި ރާއްޖެއަށް ރީނދޫ އެލާޓް ނެރުނީ ވައި ބާރުކަމުން ކަމަށެވެ. ހާއްސަކޮށް އުތުރާއި މެދު ތެރެއަށް ވައި ބާރު ކަމަށާއި އެހެންވެ ކަނޑުތައް ވަރަށް ގަދަވާނެ ކަމަށް އޭނާ ވިދާޅުވި އެވެ.

"ބޮޑެތި ކަނޑުތައް ހުރަސްކޮށް ދަތުރު ކުރުން ރައްކާތެރިއެއް ނޫން މި ހާލަތުގައި. ވައި ގަދަވުމުން ކަނޑުތައް ވަރަށް ގަދަވާނެ،" އަހުމަދު ވިދާޅުވި އެވެ.

ހުޅަނގު މޫސުމުގައި އާންމުކޮށް ވެސް ރާއްޖެއަށް 15 މެއިލާއި 20 މެއިލާ ދެމެދުގެ ބާރު މިނެއްގައި ވައިޖެހެ އެވެ. އަދި ވިލާގަނޑުގައި އެއަށް ވުރެ ގަދަކޮށް ވައި ޖެހެ އެވެ.

މާލޭގައި ވެސް ވައި ބާރުވެ ގަސްތައް ވެއްޓުން ފަދަ ގެއްލުންތައް ދަނީ ލިބެމުންނެވެ. ގަލޮޅު ރަތްވިލާ ގޯޅީގައި ހަދަމުން އަންނަ އިމާރާތެއްގެ ފާރު ވެސް ވަނީ ވެއްޓިފަ އެވެ. އެ އިމާރާތުގެ އެންމެ މަތީގައި ރާނާފައިވާ އެ ފާރު ވެއްޓުނީ ހަދަމުން އަންނަ އެހެން އިމާރާތެއްގެ މައްޗަށެވެ.

އަހުމަދު ވިދާޅުވީ ހުޅަނގު މޫސުން ނިމެންދެން ރާއްޖޭގެ އެކި ހިސާބު ތަކަށް ދޭތެރެ ދޭތެރެއިން ވިއްސާރަ ކުރާނެ ކަމަށެވެ. އަދި ވިލާގަނޑާއެކު ވައި ގަދަ ވާނެ ކަމަށް ލަފާ ކުރެވޭ ކަމަށް ވެސް ވިދާޅުވި އެވެ.

ހުޅަނގު މޫސުން ނިމި އިރުވައި މޫސުމަށް ފެށޭނީ ކޮންމެ އަހަރެއްގެ ވެސް ޑިސެމްބަރު ކުރީކޮޅުގަ އެވެ.