"މަޖިލިސް ހޭލައްވާ" ގެ ނަމުގައި ރައްޔިތުންގެ މަޖިލީހުގެ އިދާރާ ކައިރިއަށް މިއަދު ހެނދުނު އެއްވެ މުޒާހަރާ ކުރަން އުޅުމުން ފުލުހުން ބާރުގެ ބޭނުންކޮށް މުޒާހަރާގެ ބައިިވެރިން ފަހަތަށް ޖައްސައިފި އެވެ.
ސިޔާސީ، އިޖުތިމާއީ އަދި އިގްތިސާދީ ގޮތުން ރައްޔިތުން ބާރުވެރިކުރަން މަސައްކަތް ކުރާ ވާތުފިޔައިގެ ސިޔާސީ ހަރަކާތެެއް ކަމަށްވާ "ނަވާނަވައި" އިން ހެނދުނު 8:30 ހާއިރު މުޒާހަރާ ކުރަން ފެށީ މަޖިލީހުގެ އިދާރާގެ ކުރިމަތީގަ އެވެ. ގާތްގަނޑަކަށް 10 މީހުން އެއްވެ އަޑު އުފުލަން ފެށުމުން ގިނަ އަދަދެއްގެ ފުލުހުން ގޮސް، އެ މީހުން އެ ސަރަހައްދުން ނެރުނެވެ.
އޭގެ ތެރެއިން ބައެއް މީހުން ނެރުމުގެ ތެރޭގައި ފުލުހުންނާއި މުޒާހަރާގެ ބައިވެރިންނާ ދެމެދު ކުރިމަތިލުންތައް ހިނގި އެވެ. ބައެއް މީހުން އެ ސަރަހައްދުން ދުރަށް ގެންދިޔައީ ހަތަރެސްފައިގައި ހިފައި، ގަދަކަމުން އުފުލާލައިގެންނެވެ. ނަމަވެސް މުޒާހަރާގެ އެއްވެސް ބައިވެރިއަކު ހައްޔަރު ކޮށްފައެއް ނުވެ އެވެ.
މަޖިލިސް ކުރާ ގޭގޭ ކުރިމަތީގައި ތިބި މީހުން ދުރަށް ޖެއްސުމުން ދެން އެ މީހުން އެއްވީ ހޮޓެލް ޖެންގެ ކަންމައްޗަށެވެ. އެތަނުގައި ތިބެ އަޑު އުފުލުމުގެ ފުރުސަތު ދިނެވެ. އެއްވުމުގެ ބައިވެރިން ވަނީ ވިޔަފާރިވެރިން، މުވައްޒަފުންގެ ހައްގުތައް ނުދޭއިރު އެކަންކަން ބެލުމަށް މަޖިލިސް ނުކުޅެދިފައިވާ ކަމަށް ބުނެފަ އެވެ. އެއީ ރައްޔިތުންގެ މަޖިލީހުގެ ބަދަލުގައި "މަހުޖަނުންގެ މަޖިލީހެއް" ކަމަށް މުޒާހަރާގެ ބައިވެރިން ގޮވި އެވެ.
މުޒާހަރާ ކުރި އެންމެން ވެސް ތިބީ މާސްކު އަޅައިގެންނެވެ. ނަމަވެސް އެއްވެ ތިބިއިރު ގައިދުރު ކަމެއް ނުބަހައްޓަ އެވެ. އެ މީހުން ތިބީ މަސައްކަތްތެރިންގެ ހައްގުތައް ހޯދައި ދިނުމަށް ގޮވާލައި ލިޔެފައިވާ ބޯޑުތަކާއި ބެނާތައް ހިފައިގެންނެވެ.
ކޮވިޑް-19އާ ގުޅިގެން ރާއްޖޭގައި ސިއްހީ ނުރައްކަލުގެ ކުއްލި ހާލަތު އިއުލާން ކޮށްފައިވާއިރު، މުޒާހަރާ ކުރުމާއި އެއްވެ އުޅުމަކީ މަނާ ކަމެކެވެ. މި އެއްވުން ބާއްވާނެ ކަން އިއުލާން ކުރުމުން ފުލުހުން ކުރިން ވެސް ވަނީ އެކަން ނުކުރަން އަންގައިފަ އެވެ.
އެ ހަރަކާތުގައި އިސްކޮށް ހަރަކާތްތެރިވާ އަހްމަދު މުހައްމަދު (ފޯމީ)، ބުނީ، މަދުބައެއް ހައްގު ހޯދަން މުޒާހަރާ ކުރުމުން ގިނަ އަދަދެއްގެ ފުލުހުންތަކެއް ގޮސް ބާރުގެ ބޭނުން ކުރުމުން އެނގުނު އެއްޗަކީ އަދިވެސް އުސޫލުތައް ބަދަލުނުވާކަން ކަމަށެވެ.
ގިނަ ދުވަސްތަކެއް ވަންދެން ޕްރޮމޯޓް ކޮށްފައި ބޭއްވި މުޒާހަރާއަކަށް މަދު ބަޔަކު ދިޔައީ ކީއްވެގެންތޯ ސުވާލު ކުރުމުން ފޯމީ ބުނީ، އޭގެ ސަބަބަކީ ކޮވިޑް-19ގެ ބިރާއި ވަޒީފާގެ ބިރު ކަމަށެވެ. ބައެއް މީހުންނަށް މުޒާހަރާ އަށް ދާން ނުކެރުނީ އެ މީހުންގެ ވަޒީފާ ގެއްލޭނެތީ ކަމަށް ވެސް އޭނާ ބުންޏެވެ.
"މިއީ ވަރަށް ގިނަ ދުވަހަށް އަޅުގަނޑުމެން ކުރާނެ ކަމެއް. އަޅުގަނޑުމެންގެ މަގުސަދަކީ މަސައްކަތްތެރިން ބާރުވެރި ކުރުން. އެކަން ވާނީ ވަރަށް ގިނަ ދުވަހުން. އަޅުގަނޑުމެން ފުރަތަމަ އެމްޑީޕީގެ މުޒާހަރާ ފެށިއިރު މިއަށް ވުރެ ބައިމަދު. މިއަދު އެކަމަކު ތަފާތު ދެއްތޯ؟ އެހެން ވީމައި މިއީ މައްސަލައެއް ނޫން،" ފޯމީ ބުންޏެވެ.
މުޒާހަރާގެ ބައިވެރިންގެ ގޮވާލުންތައް:
- ރިސޯޓުތަކުގެ ކުލި ދެއްކުން ފަސް ކޮށްދިން އިރު ވެސް މުވައްޒަފުންނަށް މުސާރަ ނުދޭތީ އެކަމަށް އިންސާފު ހޯދައި ދިނުން.
- ކުލި ނުދެއްކިގެން މަގުމަތިވާ މީހުންނަށް ގޮތެއް ހޯދައި ދިނުން.
- ވިޔަފާރި ފައިދާ އަށް ވުރެ އިންސާނީ ހައްގު އިސްކުރުން.
- މަސައްކަތްތެރިންނަށް ބޭރުން ދިން އެހީ އަވަހަށް ދިނުން.
- ވަކި ބަޔަކާ ދެކޮޅު ނޫން ކަމަށާއި ދެކޮޅީ ސިސްޓަމާ ކަމަށް ބުނުން.
- ގުޅިފަޅު ހިއްކުމަކީ ގޯހެއް ކަމާއި އެކަން ހުއްޓާލުން.
މުޒާހާގެ ބައިވެރިންގެ ކައިރިން، ކާށިދޫ ދާއިރާގެ މެމްބަރު އަބްދުﷲ ޖާބިރު މަޖިލީހަށް ވަޑައިގެންނެވި ވަގުތު އެ މީހުން ވަނީ ސަރުކާރުން އޭނާ އަށް ދީފައިވާ ވ. ބޮޑުމޮހޮރާ އަތުލުމަށް ވެސް ގޮވާލައިފަ އެވެ. އަދި އެމްއެމްޕީއާރުސީ މެދުވެރިކޮށް ދީފައިވާ ރަށްތައް އަތުލުމަށް ގޮވައިލި އެވެ. މެގަ ފޯނުން ގޮވަމުން ދިޔައިރު އެ ކަމަށް ޖާބިރު އަޅައެއް ނުލެއްވި އެވެ.
ގާތްގަނޑަކަށް ގަޑިއިރެއްހާއިރު، އަޑު އުފުލުމަށް ފަހު އެ މުޒާހަރާ މެދުކަނޑައިލީ އަނެއްކާ ވެސް މިއަދު މެންދުރު އެއްވާނެ ކަމަށް ބުނެ އެވެ.
