ހުޅުމާލެ ފަޅުތެރޭގައި އޮތް ސަފާރީއެއްގައި ބިދޭސީ އަންހެނަކަށް އިއްޔެ ރޭ ޖިންސީ ގޯނާ ކުރި މައްސަލައިގައި ނޫސްވެރިންގެ ގިނަ ސުވާލުތަކެއް މީޑިއާ އަށް ޚާއްސަ ވަޓްސްއެޕް ގުރޫޕުގައި ނޫސްވެރިން ފެންމަތިކޮށްފި އެވެ. އިއްޔެ ރޭ ފަތިހު ފަހެއް ޖަހަން އުޅެނިކޮށް ފުލުހުންނަށް ރިޕޯޓުކުރި މި މައްސަލައިގެ ތުހުމަތަށް އުމުރުން 39 އަހަރުގެ ދެ ފިރިހެނަކު ހައްޔަރުކުރި ނަމަވެސް ފުލުހުން ވަނީ އެ ދެ މީހުން މިއަދު ދޫކޮށްލައިފަ އެވެ. ސަބަބެއް ކަމަށް ބުނީ، ތަހުގީގަށް ހައްޔަރު ކޮށްފައި ބޭތިއްބޭނެ އިތުރު ސަބަބެއް ނެތުމުން ކަމަށެވެ. އެކަމަކު، ތަހުގީގު ކުރިއަށް ގެންދާ ކަމަށް ފުލުހުން ތަކުރާރުކޮށް އަންނަނީ ބުނަމުންނެވެ.
ނޫސްވެރިންގެ ސުވާލުތައް ފުލުހުންނަށް މިހާ ބޮޑަށް އަމާޒުވީ، ޖިންސީ ގޯނާކުރުން ރާއްޖޭގައި އިންތިހާ އަށް ބޮޑުވަމުންދާއިރު، މިފަދަ މައްސަލައެއްގެ ތުހުމަތަށް ހައްޔަރުކުރި ދެ މީހަކު، ތަހުގީގުގެ އެންމެ ކުރީކޮޅު ކުއްލި ގޮތަކަށް ފުލުހުން އަމިއްލަ އަށް ދޫކޮށްލުމާއި އެ މީހުންގެ އެއްވެސް މައުލޫމާތެއް ހާމަނުކުރާތީ އެވެ. މީގެ ކުރިން މިފަދަ ކަންކަމުގައި ތުހުމަތު ކުރެވޭ މީހާގެ ތަހުގީގަށް ބަންދުގައި ބަހައްޓަން މުއްދަތު ޖަހަން ކޯޓަށް ހާޒިރުކުރާ ނަމަވެސް މި ކޭސްގައި މާ ކުރިން އެ މީހުން ވަނީ ދޫކޮށްލައިފަ އެވެ. ޚާއްސަކޮށް، އޭގެ ތެރެއިން އެކަކާ ސިޔާސީ ފަރާތަކާ ގުޅުން އޮތް ކަމަށް ސޯޝަލް މީޑިއާގައި ބުނަމުންދާއިރު، އެއަށް އެއްވެސް ޖަވާބެއް ފުލުހުން ނުދިނުމަކީ ވެސް މީޑިއާގެ ކަންބޮޑުވުމެކެވެ.
މީޑިއާ އަށް މައުލޫމާތު ދިނުމަށް ފުލުހުން ޚާއްސަ ކޮށްފައިވާ ވަޓްސްއެޕް ގުރޫޕުގައި އެއް ނޫސްވެރިޔަކު ކުރި އެއް ސުވާލަކީ ވަކި މައްސަލަތަކެއްގެ މައުލޫމާތު ފުލުހުން އާންމު ނުކުރަނީ ކީއްވެތޯ އެވެ. ޚާއްސަކޮށް ސޯޝަލް މީޑިއާގައި މި ވާހަކަ މިހާ ބޮޑަށް ދެއްކެވޭއިރު، ފުލުހުން ތަފްސީލާ ހަމައަށް ނުދިއުމަކީ ނޫސްވެރިންގެ ކަންބޮޑުވުމެކެވެ،
"ސޯޝަލް މީޑިއާގައި މި ކޭސްއާ ގުޅިގެން ބައެއްގެ އަބުރު ކަތިލެވެމުން ދާ ތަން އެބަފެނޭ. އެ ތުހުމަތުތަކަކީ ރަނގަޅު ތުހުމަތުތަކެއްތޯ؟ ނުވާ ނަމަ އެ މައްސަލަ ތަހުގީގު ކުރައްވަންތޯ އެބަ،" އެހެން ނޫސްވެރިއަކު ސުވާލު ކުރި އެވެ.
މި މައްސަލައާ ގުޅިގެން، ލިބޭ އިތުރު މައުލޫމާތުގެ އަލީގައި ވެސް ބައެއް ނޫސްވެރިން ގެންދަނީ ގުރޫޕުގައި ސުވާލު ކުރަމުންނެވެ. އޭގެ ތެރެއިން އެއް ސުވާލަކީ ފުލުހުންނަށް ބަޔަކު ހުށަހެޅި މައްސަލައެއްތޯ އާއި ނުވަތަ ފުލުހުންނަށް އެނގިގެން ހިންގި ޚާއްސަ އޮޕަރޭޝަނެއްގައި ދެ މީހަކު ހައްޔަރު ކުރީތޯ އެވެ. އެއަކަށް އެއްވެސް ޖަވާބެއް ފުލުހުން ނުދެ އެވެ.
ގިނަ ނޫސްވެރިންގެ ޝަކުވާ އަކީ، މި މައްސަލަ "ފޮރުވަން" ފުލުހުން މަސައްކަތް ކުރާ ކަމަށް ބައެއް މީހުން ކުރާ ތުހުމަތަށް ޖަވާބު ނުލިބުމެވެ. ވަކި މި ކޭސް މިހާ ބޮޑަށް ތަފާތު ކުރާ ކަމަށް ބެލެވޭ މައްސަލައިގައި ސުވާލު ކުރުމުން ފުލުހުންގެ މީޑިއާ ރިލޭޝަން އޮފިސަރު، ޗީފް ސްޓޭޝަން އިންސްޕެކްޓަރު އާތިފާ ހަސަން ވިދާޅުވީ ތަފާތެއް ނުވާނެ ކަމަށެވެ.
"ތަހުގީގު ކުރިއަށް ދާ ވަރަކުން ހާމަކުރެވެން ހުރި މައުލޫމާތު ހާމަކުރަމުން ދާނެ ވާހަކަ ދަންނަވަން،" އޭނާ ވިދާޅުވި އެވެ.
ފުލުހުން ކުރިން ބުނެފައިވާ ގޮތުގައި، މި ޖިންސީ ގޯނާގެ މައްސަލައިގައި ހައްޔަރު ކޮށްފައި ދެ މީހުން ދޫކޮށްލިޔަސް އެ ދެ މީހުން ހައްޔަރުކުރީ ކުރީ ކުށުގެ ވެށިންނެވެ.
މި މައްސަލަ ނުބަލައި، ތުހުމަތު ކުރެވޭ މީހުންނަށް ދޫކޮށްލަން ޕޮލިސް ކޮމިޝަނަރު މުހައްމަދު ހަމީދު، ހުޅުމާލޭގެ ޕޮލިސް އިންޗާޖަށް އެންގި ކަމަށް ސޯޝަލް މީޑިއާގައި ބުނަމުންދާ ކަމަށާއި އެއީ ހިނގި ކަމެއްތޯ ވެސް އެއް ނޫސްވެރިއަކު ސުވާލު ކުރި އެވެ. އެކަމަކު ޖަވާބެއް ނުދެ އެވެ.
ފުލުހުންގެ މީޑިއާ ގުރޫޕުގައި، މި މައްސަލައިގައި ނޫސްވެރިން ފުލުފުލުން ސުވާލު ކުރި ނަމަވެސް ފުލުހުންގެ އާ ތަރުޖަމާން އާތިފާ ވިދާޅުވަނީ ތަހުގީގު ކުރިއަށް ދާތީ، މިވަގުތު ދެވެން ހުރި މައުލޫމާތު ދީފައިވާނެ ކަމަށެވެ.
"ނޫސްވެރިންގެ ސުވާލުތަކަށް އިހުތިރާމް ކުރަން،" ފުލުހުންގެ ފަރާތުން މީޑިއާ އަށް މައުލޫމާތު ދިނުމަށް މި މަހުގެ 1 ގައި ޚާއްސަކުރި ތަރުޖަމާން އާތިފާ ވިދާޅުވި އެވެ.