ލ. ގަމު ހަމަދު ސްކޫލުގެ މިިދިޔަ އަހަރުގެ ސާނަވީ ބައިން އެއްވަނަ ފާތިމަތު ހުމެއިޝާ އަދި މަތީ ސާނަވީ ބައިން އެއްވަނަ ޖައިލަމް ޖަލީލް ހޯދައިފި އެވެ.
އޯ ލެވެލްގެ ގައުމީ ގަދަ 10ގެ ހަ ވަނަ މަގާމް ހުމެއިޝާ ހޯދިއިރު ޖައިލަމް ވަނީ އޭލެވެލްގެ ގައުމީ ގަދަ 10 އިން ހަ ވަނަ މަގާމް ހޯދައިފަ އެވެ. މި ދަރިވަރުންނަށް އިނާމު ހަވާލުކޮށްދެއްވީ މިދިޔަ ހުކުރު ދުވަހުގެ ރޭ ބޭއްވި ހަމަދު ސްކޫލުގެ މިދިޔަ އަހަރުގެ އިނާމު ދިނުމުގެ ޖަލްސާގައި، ޕަބްލިކް އެގްޒަމިނޭޝަންގެ ޑިރެކްޓަރު އަހުމަދު ޝަކީބެވެ.
މިދިޔަ އަހަރު ހަމަދު ސްކޫލުން 55 ދަރިވަރުން އޯ ލެވެލް ހެދިއިރު ތިން ދަރިވަރުން ވަނީ ގައުމީ ގަދަ ދިހެއްގައި ހިމެނިފަ އެވެ. އަދި 22 ދަރިވަރުން އޭ ލެވެލް ހެދިއިރު ގައުމީ ގަދަ ދިހެއްގައި ހިމެނުނީ އެންމެ ދަރިވަރެކެވެ.
އެ ރޭގެ ހަފުލާގައި 27 ދަރިވަރުންނަށް ވަނީ އިނާމު ހަވާލުކޮށްފަ އެވެ.
ހަމަދު ސްކޫލުގެ ޕްރިންސިޕަލް މުހައްމަދު ޝައުކަތު ވިދާޅުވީ އެ ސްކޫލުގެ ދަރިވަރުން އިމްތިހާނުތަކުން ހޯދަމުން އަންނަ ނަތީޖާ ރަނގަޅުވަމުން އަންނަކަމަށެވެ. މިިދިޔަ އަހަރު އޯ ލެވެލް އިމްތިހާނު ހެދި ދަރިވަރުންގެ ނަތީޖާ، އޭގެ ކުރީ އަހަރާ އަޅާބަލާއިރު 16 ޕަސެންޓު ކުރިއެރުން ހޯދާފައިވާ ކަން އޭނާ ފާހަގަކުރެއްވި އެވެ.
އެ ސްކޫލުގައި ގްރޭޑް 1-12 އަށް 480 ދަރިވަރުން އަންނަނީ ތައުލީމް ހާސިލްކުރަމުންނެވެ.