ރާއްޖޭގައި މި މަހު ކޮވިޑަށް ޕޮޒިޓިވްވި މީހުންނާ އެންމެ ގިނަ ބަޔަކު ކޮންޓެކްޓްވީ އޮފީސްތަކާއި އެހެނިހެން މަސައްކަތުގެ މާހައުލުން ކަަމަށް ތަފާސްހިސާބުތަކުން ދައްކައިފި އެވެ.
ހެލްތު އިމަޖެންސީ އޮޕަރޭޝަން ސެންޓަރު (އެޗްއީއޯސީ) ން ރޭ އާއްމުކުރި ހިސާބުތައް ދައްކާ ގޮތުން، ކޮވިޑް ޖެހުނު މީހުންނާ މި މަހުގެ އެކަކުން 28 ގެ ނިޔަލަށް އޮފީސްތަކުން 655 މީހަކު ކޮންޓެކްޓްވި އެވެ. އެއީ ކޮންޓެކްޓްވި މީހުންގެ 31 ޕަސެންޓެވެ. މަސައްކަތުގެ އެހެން މާހައުލުތަކުން ކޮންޓެކްޓްްވީ 564 މީހެެކެވެ. އެއީ 27 ޕަސެންޓެވެ. ތިން ވަނަ އަށް އެންމެ ގިނަ މީހުން ކޮންޓެކްޓްވީ ސިއްހީ ހިދުމަތްދޭ ތަންތަނުންނެވެ. އެއީ 303 މީހުން ނުވަތަ 14 ޕަސެންޓެވެ.
ތަފާސްހިސާބުތަކުން ދައްކާ ގޮތުން ހަތަރުވަނަ އަދި ފަސް ވަނަ އަށް އެންމެ ގިނަ މީހުން ކޮންޓެކްޓްވީ ކެފޭ/ރެސްޓޯރެންޓްތަކާއި ފިހާރަތަކުންނެވެ. ކެފޭތަކާއި ރެސްޓޯރެންްޓްތަކުން 154 މީހަކު ކޮންޓެކްޓްވި އިރު ފިހާރަތަކުން ކޮންޓެކްޓްވީ 89 މީހެކެވެ.
ކޮންޓެކްޓްވި ތަންތަނާއި އަދަދުތައް:
- އޮފީސްތައްް: 655 (31 ޕަސެންްޓް).
- މަސައްކަތުގެ އެހެން މާހައުލުތައް: 564 (27 ޕަސެންޓް)
- ކެފޭ/ރެސްޓޯރެންޓްތައް: 154 ކޮންޓެކްޓްސް
- ފިހާރަތައް: 89 ކޮންޓެކްޓްސް
- އެހެނިހެން: 85 ކޮންޓެކްޓްސް
- ދައުލަތުގެ ބެލުމުގެ ދަށުގައި މީހުން ބައިތިއްބާ ތަންތަން: 78 ކޮންޓެކްޓްސް
- ޓާމިނަލްތައް، ކުޅިވަރު ކުޅޭ ތަންތަން އަދި އާއްމު އެހެން ތަންތަން: 74 ކޮންޓެކްޓްސް
- އުޅަނދުތައް: 44 ކޮންޓެކްޓްސް
- ޖިމްްތައް: 35 ކޮންޓެކްޓްސް
- ސްކޫލްތަކާއި ތައުލީމުދޭ އެހެން ތަންތަން: 28 ކޮންޓެކްޓްސް
މިސްކިތްތައް: 1 ކޮންޓެކްޓް
އެޗްއީއޯސީން ރޭ ބޭއްވި މީޑިއާ ބްރީފިންގައި ޓެކްނިކަލް އެޑްވައިޒަރީ ގްރޫޕް (ޓެގް)ގެ މެމްބަރު ޑރ. ނަޒްލާ މުސްތަފާ ވިދާޅުވީ އޮފީސްތަކުގެ ކޮންޓެކްޓުން އިތުރުވަނީ މަސަައްކަތް ކުރަން ވަކިވަކިން އިށީނދެ ތިބި ކަމަށް ވިޔަސް ސައިގަޑީގައި އެއްވެ އުޅޭތީ ކަމަށެވެ. ކެއުމުގެ ވަގުތުތަކުގައި މާސްކު ވެސް ނޭޅޭނެ ކަމަށާއި އެކަހަލަ ވަގުތުގައި ވިސްނާ ނުލައި މީހުންނަށް އުޅެވޭ ކަމަށާއި ގައިދުރުކަން ވެސްް ނުބެހެއްޓޭ ކަމަށް އޭނާ ވިދާޅުވި އެވެ.
"އެހެންވީމާ ވާ ގޮތަކީ އެކަހަލަ އިރުއިރު ކޮންޓެކްޓް ވުމުގެ ފުރުސަތު ބޮޑު،" ޑރ. ނަޒްލާ ވިދާޅުވި އެވެ.
އޭނާ ވިދާޅުވީ މަސައްކަތް ކުރާ އެހެން ތަންތަނުގައި ވެސްް އެގޮތަށް އަމަލުކުރާކަން ފާހަގަކުރެވިފައިވާ ކަމަށެވެ.