މޭޔަރު ޝިފާގެ އިތުބާރު ނެތް ކަމުގެ މައްސަލައިގައި ޖަވާބުދާރީވާން 10 ދުވަސް

މާލޭގެ މޭޔަރު ޝިފާ މުހައްމަދުގެ އިތުބާރު ނެތްކަމުގެ މައްސަލަ ކައުންސިލްގެ ބައްދަލުވުމަށް ހުށަހަޅައި ޖަވާބުދާރީވެވަޑައިގަތުމަށް 10 ދުވަސް އިއްޔެ ދީފި އެވެ.

މާލޭ ސިޓީ ކައުންސިލްގައި އިއްޔެ ބޭއްވި ބައްދަލުވުމުގައި ޝިފާގެ މައްސަލަ ކުރިއަށް ގެންދަން ފެންނަ ކަމަށް ނުވަ ކައުންސިލަރަކު ވަނީ ވޯޓު ދެއްވައިފަ އެވެ. އެ ބައްދަލުވުމުގައި ނިންމީ ކައުންސިލް ހިންގަވަން ޝިފާ އިހުމާލުވެވަޑައިގެންފައިވާ ކަމަށް ބެލެވޭތީ، އެކަމުގައި ޖަވާބުދާރީވެވަޑައިގަތުމަށް ގާނޫނުގައިވާ ގޮތުގެ މަތިން އޭނާ އަށް ފުރުސަތު ދެއްވުމަށެވެ.

މޭޔަރާއި ޑެޕިއުޓީ މޭޔަރު ޝަމާއު ޝަރީފްގެ އިތުބާރު ނެތް ކަމުގެ ވޯޓު ނަގަން ހުށަހެޅުއްވީ މާފަންނު އުތުރު ދާއިރާގެ ކައުންސިލަރު މުހައްމަދު ފަޒީނެވެ. އެ މައްސަލަ އޭނާ ހުށަހެޅުއްވީ ލާމަރުކަޒީ ރޫހާ އެއްގޮތަށް ކައުންސިލް ހިންގުމުގައި މޭޔަރު ޝިފާ އާއި ޑެޕިއުޓީ މޭޔަރު ޝަމާއު އިހުމާލު ވަމުން ގެންދަވާ ކަމަށް ވިދާޅުވެ އެވެ. ފުރަތަމަ މި މައްސަލަ ހުށަހެޅުއްވުމުން ކައުންސިލް ބައްދަލުވުމަށް އެޖެންޑާ ނުކުރެއްވި މައްސަލަ އޭނާ ލޯކަލް ގަވަމެންޓް އޮތޯރިޓީ (އެލްޖީއޭ) އަށް ވެސް ހުށަހެޅުއްވި އެވެ.

އެލްޖީއޭގެ އުސޫލްގައި އިތުބާރު ނެތް ކަމުގެ ވޯޓު ކުރިއަށް ގެންދިއުމުގެ ފުރުސަތު އޮތުމުން އަނެއްކާވެސް އެ މައްސަލަ ފަޒީން ހުށަހެޅުއްވީ 39 މައްސަލައެއް ފާހަގަކޮށެވެ. އޭނާގެ ތުހުމަތަކީ ލާމަރުކަޒީ ގާނޫނާ ޚިލާފަށް މޭޔަރު ބޭނުންވާ ގޮތަށް ކައުންސިލް ހިންގުމެވެ.

"ލާމަރުކަޒީ ގާނޫނާ ޚިލާފަށް ކައުންސިލް ހިންގަނީ ކައުންސިލަރުންނަށް ފުރުސަތު ނުދެއްވައި. ބައެއް ކަންކަން އިޖުރާއަތުތަކަށް ނޫން ކުރިއަށް ގެންދަވަނީ. ކައުންސިލަރުން މަސައްކަތް ކުރާނެ ޖާގައެއް ވެސް ނެތި، ކޮންމެ ދެ ކައުންސިލަރަކަށް ގޮނޑިއަކާ މޭޒެއް ހުންނަނީ،" އޭނާ ވިދާޅުވި އެވެ.

ޝިފާ ފޯނު ނުނަންގަވާތީ މި ތުހުމަތުތަކަށް އޭނާގެ ޖަވާބެއް އަދި ނުލިބެ އެވެ.

މީގެ ކުރިން ވެސް ޝިފާ އަށް ބޮޑެތި ތުހުމަތުތަކެއް ފަޒީން ކުރި އެވެ. އޭގެތެރޭގައި މާރުކޭޓުގެ ގޮޅިތައް ދޫކުރި ގޮތާއި ލޮނުޒިޔާރަތްކޮޅު ޕާކު ހެދުމުގައި ގާނޫނާ ޚިލާފަށް ޚަރަދުކޮށްފައި ވުން ހިމެނެ އެވެ.

ފަޒީން މީގެ ކުރިން ކުރެއްވި ތުހުމަތުތައް ވެސް ޝިފާ ވަނީ ދޮގުކުރައްވައިފަ އެވެ. އޭނާ ވިދާޅުވެފައި ވަނީ، ފަޒީން އުޅުއްވަނީ އޭނާގެ އަގު ވައްޓަން ކަމަށާއި ތުހުމަތުތަކުގައި އެއްވެސް ހަގީގަތެއް ނެތް ކަމަށެވެ.

އެމްޑީޕީގެ އަޣުލަބިއްޔަތު އޮންނަ މާލޭ ސިޓީ ކައުންސިލްގައި ފަޒީން ނޫނަސް ޝިފާއާ ހިޔާލު ތަފާތުވާ މެމްބަރުންތަކެއް ތިއްބަވަ އެވެ.

އިސްކަންދަރު ސްކޫލުގައި ބޭއްވި ބައްދަލުވުމެއްްގައި، އާއްމުންގެ ހިޔާލަށް ހުޅުވައިލުމުން، މައްސަލަ ހުށަހެޅި މީހުންނަށް ޝިފާ އެކަނި ޖަވާބު ދެއްވަން ފެއްޓެވެމުން ވެސް މައްސަލަ ގޯސްވެ ބައްދަލުވުން ކުރިން ހުއްޓާލަން ޖެހިފައި ވެ އެވެ.