ޕީޕީއެމްގެ ރައީސް މައުމޫން އަބްދުލް ގައްޔޫމްގެ ފެކްޝަނާ ގުޅިވަޑައިގެންނެވި، ތިނަދޫ އުތުރު ދާއިރާގެ މެމްބަރު ސައުދުﷲ ހިލްމީގެ ކުންފުންޏާ ސަރުކާރުން ހަވާލުކޮށްފައިވާ ބައެއް ޕްރޮޖެކްޓްތަކުގެ މަސައްކަތްތަކަށް ލޮޅުން އަރަން ފަށައިފި އެވެ.
ސްވިފްޓް އިންޖިނިއަރިން ޕްރައިވެޓް ލިމިޓެޑްގެ މެނޭޖިން ޑިރެކްޓަރު ސައުދުﷲ މިއަދު "މިހާރު" އަށް ވިދާޅުވީ، ޅ. ހިންނަވަރު ސިއްހީ މަރުކަޒުގެ އާ އިމާރާތް އަޅަން މިދިޔަ މަހުގެ 1 ގައި ހެލްތު މިނިސްޓްރީން އެ ކުންފުންޏާ ހަވާލުކުރި މަޝްރޫއު އިއްޔެއިން ފެށިގެން ހުއްޓާލަން ސަރުކާރުން އަންގާފައިވާ ކަމަށެވެ.
ސައުދުﷲ އަށް އެޑްރެސްކޮށް، ހެލްތު މިނިސްޓްރީން ފޮނިވި ސިޓީގައި ބުނެފައި ވަނީ ހިންނަވަރު ސިއްހީ މަރުކަޒުގެ މަސައްކަތް މިވަގުތަށް ހުއްޓާލަން ފިނޭންސް މިނިސްޓްރީން އަންގާފައިވާ ކަމަށެވެ. އޭގެ ސަބަބެއް ހެލްތު މިނިސްޓްރީން ސްވިފްޓް އިންޖިނިއަރިން އަށް ފޮނުވި ސިޓީއަކު ނެތެވެ.
ސައުދުﷲ ވިދާޅުވީ ކުއްލި ގޮތަކަށް މި ފިޔަވަޅު އެޅި ސަބަބެއް ސަރުކާރުން ނާންގާ ކަމަށެވެ. އަދި އެކަމާ ގުޅޭ ގޮތުން އޭނާ ވަކި އެއްޗެއް ވިދާޅެއް ނުވި އެވެ.
ނަމަވެސް ސައުދުﷲގެ ގާތް މީހަކު ބުނިގޮތުގައި، ސްވިފްޓް އިންޖިނިއަރިންއާ ހަވާލުކޮށްފައިވާ، ސަރުކާރުގެ އެހެން ބައެއް ޕްރޮޖެކްޓްތައް ވެސް ހުއްޓުވާނެ ކަމުގެ އިޝާރާތެއް ވަނީ ލިބިފަ އެވެ. އަދި ހިންނަވަރު ސިއްހީ މަރުކަޒުގެ މަސައްކަތް ހުއްޓާލަން އެންގީ، މައުމޫންގެ ފެކްޝަނާ ސައުދުﷲ ގުޅިވަޑައިގަތުމުން އައި "ސިޔާސީ އިންޒާރުތަކަށް" ފަހު ކަމަށް ވެސް ސައުދުﷲގެ ގާތް މީހާ ބުންޏެވެ.
މައުމޫންގެ ފެކްޝަނާ ރައްޔިތުންގެ މަޖިލިހުގެ ހަތް މެމްބަރަކު ވަނީ، ސައުދުﷲ ހިމެނޭ ގޮތަށް، ގުޅިވަޑައިގެންފަ އެވެ. އަދި އެ މެމްބަރުން އެކުގައި މިދިޔަ މަހުގެ 27 ގައި ވަނީ ނޫސްވެރިންގެ ކުރިމައްޗަށް ވެސް ނުކުމެވަޑައިގެންފަ އެވެ.
މައުމޫންގެ ފެކްޝަންގައި މިހާރު ތިއްބެވީ ސައުދުﷲ ގެ އިތުރުން ދިއްގަރު ދާއިރާގެ ފާރިސް މައުމޫން، އޭދަފުށީ ދާއިރާގެ އަހުމަދު ސަލީމް، އެމްޑީއޭގެ މެމްބަރެއްގެ ގޮތުގައި ހުންނެވި، ނޮޅިވަރަމް ދާއިރާގެ ހުސެއިން އަރީފު، ތިމަރަފުށީ ދާއިރާގެ މުހަންމަދު މުސްތޮފާ، ބާރަށު ދާއިރާގެ އިބްރާހިމް ޝުޖާއު އަދި ތުލުސްދޫ ދާއިރާގެ މެމްބަރު މުހައްމަދު ވަހީދު އިބްރާހިމް (ލޯޔަރު ވައްޑެ) އެވެ.