ސީލިންގު ދަށުވެ ފައި ބުރިކޮށްލަން ޖެހުނު ކުއްޖާ އެދެނީ ފައެއް ޖެހުމަށް އެހީއަކަށް

އުމުރުން އެންމެ 17 އަހަރުގެ މުހައްމަދު ފިރުޝާންގެ މަންމަ ނަޝީދާ މުހައްމަދު ގަބޫލު ކުރާ ގޮތުގައި އޭނާގެ ދަރިފުޅުގެ މުސްތަގްބަލް އަދި ކުރިއަށް އޮތީ އެވެ. މީގެ ދޮޅު މަސް ކުރިން، ބާ އިމާރާތެއްގެ ސީލިންގު ގައިމައްޗަށް ވެއްޓި، ކަނާތު ފައި ފިސްވެގެން ބުރިކޮށްލަން ޖެހުނަސް ދަރިފުޅު އަބަދު ފުރޮޅުލީ ގޮނޑީގައި ބައިންދާކަށް އޭނާ ބޭނުމެއް ނުވެ އެވެ.

ފިރުޝާންގެ ވެސް އުއްމީދަކީ، ކޮންމެވެސް ދުވަހަކުން، ޕްލާސްޓިކް ފައެއްގެ މައްޗަށް ނަމަވެސް ކޮޅަށް ތެދުވުމެވެ. އެކަމަކު އެކަމަށް ކުރަން ޖެހޭ ޚަރަދު ބޮޑެވެ.

ފިރުޝާނަކީ، އާއިލާގެ އެންމެ ދޮށީ ކުއްޖާގެ ހައިސިއްޔަތުން އާއިލާގެ ގިނަ ޒިންމާތަކެއްގައި ހިފައިގެން ހުރި ކުއްޖެކެވެ. ބައްޕަ އާއެކު މަހަށް ދަމުން، އާއިލާއަށް އެހީތެރިކަން ފޯރުކޮށްދެ އެވެ. ގދ. ގައްދޫ ކައިރީގައި އޮންނަ ފަޅު ރަށަށް، ރަހުމަތްތެރިންނާއެކު ދަތުރު ދިޔައީ ވެސް، ދޯނި އެހެލައިގެން މަހަށް ނުދެވިފައި ހުރި ދުުވަހެއްގަ އެވެ.

ގައްދޫ ކައިރީގައި އޮންނަ ލޮނަދޫހުއްޓާއަށް ދިޔައީ، ކުރިން ރިސޯޓެއްގައި ގޮތުގައި ހަދަމުން އައިސް، މަސައްކަތް ހުއްޓާލާފައި އޮތް އެ ރަށް ބަލާލުމަށެވެ. އަށެއްކަ ރަހުމަތްތެރިންނާއެކު ގޮސް، އެ މީހުން ތިބީ، ވަރަށް ބޮޑަށް ވީރާނާވެފައިވާ މޫދުކޮޓަރިއެއްގަ އެވެ. ފިރުޝާން ގައިމައްޗަށް ސީލިންގު ވެއްޓުނީ، އޭނާ އެކަނި އެތަނުގައި ހުރި ވަގުތެއްގަ އެވެ.

ކޮންކްރީޓުންނާއި ދަގަނޑުން ހަދާފައިވާ ސީލިންގު ވެއްޓި، އެންމެ ބޮޑަށް ޒަހަމްވީ ފިރުޝާންގެ ފައެވެ. އިމަޖެންސީގައި މާލެ ގެނެސް، އޭޑީކޭގައި އޮޕަރޭޝަން ކުރުމަށް ފަހު އެ ފައި ވަނީ ބުރިކޮށްލާފަ އެވެ. އޭޑީކޭގެ އައިސީޔޫގައި މަހެއްހާ ދުވަހު އޭނާ އޮންނަން ޖެހުނެވެ.

"ފައި ބުރިކޮށްލިކަން އޭނާއަށް އެނގުނު ދުވަހު ވަރަށް ސަކަރާތްވި. ޑޮކްޓަރުންނާއި ނަރުހުން ވަރަށް ވާހަކަ ދައްކައިގެން ހަމައަކަށް އެޅުނީ،" ނަޝީދާ ކިޔައިދިނެވެ.

އޭޑީކޭ އާއި އައިޖީއެމްއެޗުގައި ފަރުވާ ދިނުމަށް ފަހު، ފިރުޝާން ގެއަށް ދޫކޮށްލީ މީގެ ދެ ތިން ދުވަސް ކުރިންނެވެ. މިހާރު އޭނާ އިންނަނީ ފުރޮޅުލީ ގޮނޑިއެއްގަ އެވެ. އެކަމަކު ނަޝީދާ ބުނީ، ކުރިން ވަރަށް މަޖާކޮށް، ހަލަނިކޮށް އުޅުނު ކުއްޖަކު އެހެން ގޮނޑިއެއްގައި އިންނަން ޖެހުމުން ވަރަށް ބޮޑަށް މާޔޫސްވެފައިވާ ކަމަށެވެ. ބޭރަށް ނިކުމެ، ތަންތަން ބަލަން އޭނާ ބޭނުން ނުވާ ކަމަށް ބުންޏެވެ.

"ރައްޓެއްސަކު ގުޅިޔަސް ބުނާނީ ފައެއް ޖަހައިގެންނޭ ދާނީ. އޭނާ އެކަމަށް ވަރަށް އުއްމީދުކުރޭ،" ނަޝީދާ ބުންޏެވެ.

ދަރިފުޅުގެ އެެ އުއްމީދު ފުރިހަމަ ކޮށްދޭން އާއިލާއިން ބޭނުންވެ އެވެ. އެކަމަކު އިންޑިއާއަށް ގޮސް ފައެއް ޖަހަން 5،000 ޑޮލަރު ބޭނުންވާއިރު މިހާތަނަށް އެއްވެސް އެހީއެއް ނުލިބެ އެވެ. ގިނަ ތަންތަނަށް އެހީގެ ސިޓީ ލިޔުނު ނަމަވެސް ޖަވާބެއް ނުލިބެ އެވެ.

ފިރުޝާންގެ އާއިލާއިން މިހާރު އެދެނީ އާއްމުންގެ އެހީ އަށެވެ. އެހީ ދޭން ބޭނުންވާ މީހުން، ނަޝީދާގެ ނަމްބަރު، 725،7881 އަށް ގުޅުމަށް އޭނާ އެދެ އެވެ.