އުމުރުން 13 އަހަރުގެ އަންހެން ކުއްޖަކަށް ޖިންސީ ހާނީއްކަކުރުމުގެ މައްސަލައެއްގެ ތަހުގީގަށް ފުލުސް އޮފީހަށް ހާޒިރުކުރަންޖެހޭ މީހަކު އުޅޭ ތަނެއް ނޭނގުމުން އޭނާގެ ވަނަވަރާއި ފޮޓޯ ހާމަކޮށް، ފުލުސް އޮފީހަށް ހާޒިރުވާން އަންގައިފި އެވެ.
ތަހުގީގަށް ހާޒިރުކުރަނީ ތ. ތިމަރަފުށީ އަތިރީގޭ މީހެއް ކަމަށްވާ ހަސަން ނިޒާރެވެ. އުމުރުން 59 އަހަރުގެ މި މީހާ ފުލުހުންގެ މައި އިދާރާ ޝަހީދު ހުސައިން އާދަމް ބިލްޑިންގަށް ހާޒިރުވާން އަންގާފައިވަނީ އަންނަ ޖުލައި މަހުގެ ފުރަތަމަ ދުވަހު ހެނދުނު 10:00 އަށެވެ.
ފުލުހުން މި މީހާގެ މައުލޫމާތު ހާމަކުރީ އެ މީހާ އުޅޭ ތަނެއް ނޭނގޭތީ ފުލުސް އޮފީހަށް ހާޒިރުކުރަން ޗިޓް ރައްދު ނުކުރެވުމުންނެވެ.
ކުޑަކުދިންނާ ގުޅޭ މައްސަލަތަކުގައި، އެ ކުއްޖަކު ދެނެގަނެވޭ ފަދަ އެއްވެސް މައުލޫމާތެއް ހާމަކުރުމަކީ ގާނޫނީ ކުށެކެވެ. އެހެންވެ މި މައްސަލާގައި ވެސް އެއްވެސް ތަފްސީލެއް ފުލުހުން ހާމައެއް ނުކުރެ އެވެ.
