މާލޭ ވިޔަފާރިވެރިންގެ މިސްކިތް ތެރެއިން މަސްތުވާތަކެއްޗާ އެކު ރޭ މީހަކު ފުލުހުންގެ ބެލުމުގެ ދަށަށް ގެންގޮސްފި އެވެ.
ފުލުހުން ބުނި ގޮތުގައި މަސްތުވާތަކެތި ކަމަށް ޝައްކުކުރެވޭ އެއްޗެހި ހުރި ސެލޯފިން ކޮޅުތަކަކާ އެކު ފުލުހުންގެ ބެލުމުގެ ދަށަށް ގެންދިޔައީ 24 އަހަރުގެ ފިރިހެނެކެވެ.
އެ މައްސަލަ ތަހުގީގުކުރަމުން އަންނަ ކަމަށް ވެސް ފުލުހުން ބުނެ އެވެ.
އޭނާ ހައްޔަރުކުރި ވީޑިއޯ ރޭ ސޯޝަލް މީޑިއާގައި ވެސް ވަނީ ދައުރުވެފަ އެވެ. މިސްކިތުގެ ފާހާނާ ތެރޭގައި ފޮރުވާފައި ބެހެއްޓި މަސްތުވާތަކެތި އެތަނުން ނެގި ކަމަށް އެ މީހާ އެއްބަސްވާ މަންޒަރު ވެސް ވީޑިއޯގައި ދައްކަ އެވެ. އެކަމަކު އެއީ ކޮން މިސްކިތެއްކަން އެ މީހާ އަށް ނޭނގުނަސް، ވީޑިއޯ ކުރި މީހުން ބުނި ގޮތުގައި އެއީ ވިޔަފާރިވެރިންގެ މިސްކިތެވެ.
ކޮވިޑް-19 އާ ގުޅިގެން މާލޭ ސަރަހައްދުގެ މިސްކިތްތަކުގައި ޖަމާއަތުގައި ނަމާދުކުރުން މެދުކަނޑާލާފައި ވަނިކޮށް މިސްކިތްތަކުގައި މަސްތުވާތަކެތި ބޭނުންކުރާ ކަމުގެ ޝަކުވާ ވަނީ އިތުރުވެފަ އެވެ. ބައެއް މިސްކިތްތައް އެފަދަ ތަކެތި ބޭނުންކުރާ މީހުންގެ އައްޑާއަކަށް ހަދައިގެން މިސްކިތުގެ ހުރުމަތް ކަނޑަމުން އަންނައިރު ހަތިމުގައި މަސްތުވާތަކެތި ފޮރުވާކަމުގެ ޝަކުވާ ވެސް ބޮޑެވެ.
ފުލުހުން ބުނި ގޮތުގައި ކޮންމެ ރެއަކު ވެސް މިސްކިތްތައް ބަލައި ހުރުމަތް ކެނޑޭ ގޮތަށް އެ ތަންތަން ބޭނުންކުރާ މީހުން ފޮނުވާލުމުގެ އިތުރުން ފުލުހުންގެ ބެލުމުގެ ދަށަށް ގެންދަން ޖެހިއްޖެ ނަމަ އެގޮތަށް ގެންގޮސްގެން ވެސް މައްސަލަ ތަހުގީގުކުރެ އެވެ.
