މަސްތުވާތަކެތި ބޭނުންކުރަން މިސްކިތަށް އަރާކަމުގެ ތުހުމަތު ކުރެވޭ 15 މީހަކު ރޭ ހައްޔަރު ކޮށްފި އެވެ.
ފުލުހުން މިއަދު ބުނީ، މަސްތުވާތަކެތި ބޭނުން ކުރުމުގެ ކުށުގެ ރެކޯޑު އޮންނަ، ކުށުގެ ވެށީގައި އުޅޭ މީހުންގެ ތެރެއިން، މަސްތުގެ ހާލަތުގައި މިސްކިތަށް ވަދެ ތިބި 15 މީހަކު ރޭ ފުލުހުންގެ ބެލުމުގެ ދަށަށް ގެންގޮސްފައިވާ ކަމަށެވެ.
ފުލުހުން ބުނި ގޮތުގައި، އޭގެ ތެރެއިން ހަތް މީހަކު 15 ދުވަހަށް ރިމާންޑު ސެންޓަރެއްގައި ބަންދު ކުރުމަށް ކޯޓުން އަމުރުކޮށްފައިވެ އެވެ. އަދި އަށް މީހަކު ކަސްޓޯޑިއަލް ޖަލެއްގައި ތިން ދުވަހަށް ބަންދު ކުރުމަށް އަމުރުކޮށްފައިވެ އެވެ.
މާލޭ މިސްކިތްތަކަށް އަރައި ތިބެ މަސްތުވާތަކެތި ބޭނުންކޮށް، އެތަންތަނުގައި ނިދައި، އެއްޗެހި ދޮވެ، އަދި އެކަށީގެން ނުވާ ކަންކަމުގައި މިސްކިތްތައް ބޭނުންކުރާކަމުގެ ޝަކުވާ ވަނީ ވަރަށް ބޮޑުވެފަ އެވެ.
ކޮންމެ ރެއަކު މިސްކިތްތައް ބަލައި ހުރުމަތް ކެނޑޭ ގޮތަށް އެ ތަންތަން ބޭނުންކުރާ މީހުން ފޮނުވާލުމުގެ އިތުރުން ފުލުހުންގެ ބެލުމުގެ ދަށަށް ގެންދަން ޖެހޭ މީހުން ގެންދާނެ ކަމަށް ފުލުހުން މީގެ ކުރިން ބުނެފައިވެ އެވެ.