ބ. ތުޅާދޫގައި މިއަދު ރޯވި ގޭގައި ހުރި ތަކެތި އަނދައި އަޅިއަށްވި އިރު އެ ގޭގެ ދެމަފިރިން ރައްކާކޮށްފައި ހުރި ހުރިހާ ފައިސާއެއް ހުރީ އެނދުގެ ގޮދަޑި ދަށުގައި ކަމަށާއި އެއިން އެއްވެސް ފައިސާއެއް ސަލާމަތް ނުކުރެވުނު ކަމަށް އާއިލާ އިން ބުނެފި އެވެ.
މިއަދު މެންދުރު 11:30 ހާއިރު އަލިފާން ރޯވި، ގުލްޝަނީހިޔާ ގެއަކީ ދެ މަފިރިއަކާއި އެ މީހުންގެ ކުޑަ ދެ ދަރިން ދިރިއުޅެމުން އައި ތަނެވެ.
އަންހެން މީހާގެ ބޭބެ، މުހައްމަދު މުމްތާޒު، "މިހާރު" އަށް ކިޔައި ދިން ގޮތުގައި އަލިފާނުގެ ހާދިސާ ހިނގީ، ގޭގައި އެއްވެސް މީހަކު ނެތް ވަގުތެއްގަ އެވެ. އޭރު އަންހެން މީހާ ވީ ދެ ދަރިން ގޮވައިގެން މަންމަގެ ގޭގަ އެވެ. އޭނާގެ ފިރިމީހާ ވެސް ގެޔަކު ނޫޅެ އެވެ. އޭނާ ބުނީ އަނދައިގެން ދިޔަ ފައިސާގެ އަދަދު އަދި ނޭނގޭ ކަމަށެވެ.
ރަށުގެ ކައުންސިލް އިދާރާ ކައިރީ ހުންނަ އެ ގެއިން ދުން އަރާތީ އަވަށްޓެރިއަކަށް ފެނިގެން އެކަން ކައުންސިލަށް އެންގުމުން ފުލުހުންނާއި އާންމުންގެ އެހީތެރިކަމާ ކުރި މަސައްކަތުން އަލިފާންގަނޑު ނިއްވައިލެވުނީ 45 ވަރަކަށް މިނެޓް ފަހުން ކަމަށް އޭނާ ބުންޏެވެ.
"އަޅުގަނޑުމެން އުޅޭ ސަރަހައްދާ ވަރަށް ދުރުގައި ކޮއްކޮ އުޅޭނީ. ދެން ކޮންމެ ދުވަހަކު ވެސް ހެނދުނު އައިސްފައި ހަވީރު ދާނީ ގެއަށް. މަންމަ ގެއަށް އަންނާނީ ކުދިން ގޮވައިގެން. އެގޮތަށް މިއަދު ވެސް އައިސް އިންދާ އެނގުނީ ގޭގައި ރޯވިކަން،" މުމްތާޒު ބުންޏެވެ.
ރޯވި ގެޔަކީ އެ ގެޔަކީ އާއިލާގެ އެހެން މީހަކަށް ތުޅާދޫން ލިބިފައިވާ ބޮޑު ބިމެއްގައި އަޅާފައި ހުރި އެއް ކޮޓަރީގެ ތަނެކެވެ. މުމްތާޒު ބުނި ގޮތުގައި ދެމަފިރިން ނިދާ ކޮޓަރި ފިޔަވައި ދެން އޮތް ތަނުގައި ހުންނަނީ އިލެކްޓްރިކް ސާމާނާއި ކުދިން ނިދުމަށް އަޅާފައި އޮންނަ ގޮދަޑި އެވެ.
މުމްތާޒު ބުނި ގޮތުގައި ރޯވީ، ފްރިޖުގައި ކަރަންޓު ޝޯޓެއް ވެގެން ކަމަށް ބެލެވެ އެވެ.
"އެތަނުގަ މި އިންނަނީ ފްރިޖު މަތީގައި އަވަން. އެތަނުގެ މަތީގަ ސޮކެޓް. ފްރިޖް ކޭބަލްގައި ޝޯޓެއް ވި ކަމަށް ބެލެވެނީ. ފްރިޖު ކައިރީ މި ހުންނަނީ ގޮދަނޑިވެސް. ދެން އެހެންވީމަ އެތަނުގައި އެހާ ބޮޑަށް ރޯވި ކަމަށް މި ބެލެވެނީ،" މުމްތާޒް ކިޔައިދިނެވެ.
އެ ތަނަކީ ބަންދުވެފައި އޮތް ތަނަކަށް ވާތީ، އެހާ ބޮޑަށް ރޯވިއިރު ވެސް މީހުންނަށް ނޭނގުނީ ކަމަށާއި އެނގުނުއިރު މުޅި ތަން ވަރަށް ބޮޑަށް އަނދާފައިވާ ކަމަށް އޭނާ ބުންޏެވެ.
"ދޮރުގެ އެއް ބައި ވައްޓާލައިގެން އަލިފާން ނިއްވަން މަސައްކަތް ކުރީ."
އަލިފާންގަނޑު ކޮންޓްރޯލް ކުރެވުނުއިރު އެތަނުން ސަލާމަތް ކުރެވުނީ ދެމަފިރިންގެ ދެތިން އަންނައުނާއި ދަރިފުޅުގެ ސްކޫލު ޓެބާއި މި އަހަރު ދޫކުރި ފޮތްތައް ފަދަ މަދު އެއްޗެކެވެ. އެކަމަކު ކުރީގެ ފޮތްތަކާއި ގޭގައި ގެންގުޅޭ ހުރިހާ ފަރުނީޗަރަކާއި އިލެކްޓްރޯނިކް ހުރިހާ ސާމާނެއް އަނދައި އަޅިއަށްވީ އެވެ.
މުމްތާޒު ބުނި ގޮތުގައި ބައެއް އެއްޗެހި އެއީ ކޯއްޗެއްކަން ނޭނގޭ ވަރަށް ވެސް އަނދާފައި ހުއްޓެވެ.
އެތާ އުޅުނު ދެމަފިރިންގެ ކައިވެންޏަށް ގާތްގަނޑަކަށް 15 އަހަރު ފަހުން، މިއަހަރުގެ ކުރީކޮޅު އެ އާއިލާއަށް ތުޅާދޫން ގޯއްޗެއް ލިބިފައި ވާތީ އެމީހުން ތައްޔާރުވަމުން ދިޔައީ ލިބިފައި ހުރި ފައިސާކޮޅުން ގެ ހެދުމުގެ މަސައްކަތްކުރަން ކަމަށް އާއިލާ އިން ވާހަކަ ދެއްކި މުމްތާޒު ބުންޏެވެ. އެކަމަކު އަލިފާނުގެ ހާދިސާގައި ހުރިހާ ފައިސާއެއް ވެސް އަނދައިގެން ދިޔައީ އެވެ.
"އެތަނަށް ވަންގޮތަށް އަޅުގަނޑުގެ ކޮއްކޮގެ ފިރިމީހާ މުޅި ތަންތަން ހޯދަން ފަށައިފި. މި އެހީ ކޯއްޗެއްހޭ ތި ހޯދަނީ. އެއްގޮތަކަށް ވެސް ވާހަކަ ވެސް ނުދެއްކޭ. އެތައް ފަހަރު ސުވާލުކުރުމުން ބުނީ ތިމަންނަ އެއްކުރި ފައިސާ ބެހެއްޓީ ގޮދަނޑި ދަށުގައޭ. އެކަމަކު އެ ގޮދަނޑިތައް ވެސް އޮތީ އަނދާފައި. ފައިސާއެއް ނެތް. ދެ މީހުން ތިބީ ވަރަށް ބޮޑަށް ނަފްސާނީވެފައި. ވާހަކައެއް ނުދެއްކޭ. ކިހާ ވަރެއްކަން ވެސް އަދި ސާފެއް ނުވޭ،" މުމްތާޒު ބުންޏެވެ.
މުމްތާޒު ބުނި ގޮތުގައި ބޭންކަށް ފައިސާ ޖަމާކުރުމުގެ ބަދަލުގައި އެ ދެމަފިރިން ހުރިހާ ފައިސާއެއް ބަހައްޓާފައި ހުރީ އެނދުުގެ ގޮދަޑިދަށުގަ އެވެ. އެ ހުރިހާ އެއްޗެއް ވެސް އަނދައިގެން ދިޔައީ އެވެ.