މިއަދު ހެނދުނު އައި ގަދަ ކޮޅިގަނޑަކާ އެކު، ކުރިއަށް އޮތް 36 ގަޑިއިރު ވެސް ވައި ގަދަވެ، މޫސުން ވަރަށް ބޮޑަށް ގޯސް ވާނެ ކަމަށް މެޓުން ލަފާކޮށްފި އެވެ.
މެޓުން މިއަދު ބުނީ ކަނޑު ދަތުރުކުރާ މީހުންނާއި ބްރިޖާއި ހައިވޭގައި ދުއްވާ މީހުން ވެސް މޫސުމަށް ވަރަށް ބޮޑަށް ސަމާލުވާން ޖެހޭ ކަމަށެވެ.
"ރާއްޖޭގެ ސަރަހައްދުގައި ވައި ގަދަވެ ކަނޑުތައް ގަދަވާނެ ކަމަށް ލަފާކުރެވޭތީ އާންމުކޮށް ހުރިހާ ފަރާތްތަކުން ވަކިން ހާއްސަކޮށް ކަނޑު، ބްރިޖު އަދި ހައިވޭގައި ދަތުރުކުރާ ފަރާތްތަކުން މޫސުމަށް ވަރަށް ބޮޑަށް ސަމާލުވުމަށް ދަންނަވަމެވެ."
މިހާރު ކުރަމުން މިދަނީ ހުޅަނގު މޫސުމުގެ ވިއްސާރަ ކަމަށާއި މިއަދާއި މާދަމާ ވެސް މޫސުން ގޯސްވާނެ ކަމަށް މެޓުން ލަފާކުރެ އެވެ. އެކަމަކު މާދަމާ ވާރޭވެހޭލެއް މިއަދަށް ވުރެ މަދުވި ނަމަވެސް މާދަމާ ވެސް ވައިގަދަވާނެ ކަމަށް މެޓުން ބުނެ އެވެ.
މޫސުން ރަނގަޅުވާން ފަށާނެ ކަމަށް ބެލެވެނީ އަންނަ ބުދަ ދުވަހުން ފެށިގެންނެވެ.
މެޓުން ލަފާކުރާ ގޮތުގައި އުތުރާއި މެދު ރާއްޖެތެރޭގެ އަތޮޅުތަކުގައި އާންމު ގޮތެއްގައި ގަޑިއަކު 15 މޭލާއި 25 މޭލު ބާރުމިނުގައި ވައިޖެހޭނެ އެވެ. އަދި ދެކުނުގެ އަތޮޅުތަކަށް ވައިޖެހޭނެ ކަމަށް ބެލެވެނީ ގަޑިއަކު 13 މޭލާއި 23 މޭލަށެވެ. އެކަމަކު ވިލާގަނޑުގައި ގަޑިއަކު 45-50 މޭލު ގަޑިއަކު ބާރުމިނުގައި ވައިޖެހޭނެ ކަމަށް މެޓުން ބުންޏެވެ.
ކަނޑުތައް ގަދަވެ، ރާޅު ބޮޑުވުމުގެ ސަބަބުން ދިޔަވަރު ބޮޑުވާ ގަޑިތަކުގައި ބައެއް ރަށްތަކަށް އުދައިގެ އަސަރުކުރާނެ ކަމަށް ވެސް މެޓުން ބުނެ އެވެ.
މާލެ އަށް މިއަދު ހެނދުނު ގާތްގަނޑަކަށް 7:30 އިން ފެށިގެން ގަދަ ވަޔާ އެކު ބޯކޮށް ވާރޭވެހެމުން އެބަ ދެ އެވެ. ވައިގަދަވެ، ހުޅުމާލޭ ބްރިޖްގައި ސައިކަލްގައި ދުއްވޭ ވަރު ވެސް ނުވާ ކަމަށް ވެ އެވެ.
މޫސުން ގޯސްވުމުގެ ސަބަބުން މިހާރު ވެސް ރާއްޖޭގެ ބޮޑު ބަޔަކަށް އޮތީ ޔެލޯ އެލާޓް ނެރެފަ އެވެ. ހއ. އަތޮޅުން ލ. އަތޮޅަށް ޔެލޯ އެލާޓް ނެރެފައި ވަނީ ހެނދުނު 11:30 ގެ ނިޔަލަށެވެ.