އެމްޑީޕީގެ އެތެރޭގެ އިންތިހާބު ރޭ ނިމުނު އިރު ފެނުނީ ރައީސް އިބްރާހިމް މުހައްމަދު ސޯލިހު ޕާޓީގެ ކޮންޓްރޯލް ނެންގެވި މަންޒަރު ކަމަށް ބައެއް ބޭފުޅުން ދެކެވަޑައިގަތަސް، ގައުމީ މަޖިލީހަކީ އެއްވެސް އިރެއްގައި އެއްވެސް މީހެއްގެ ކޮންޓްރޯލް އޮންނަ ތަނެއް ނޫން ކަމަށް ޕާޓީގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.
އެމްޑީޕީގެ ދާއިރާތަކުގެ އިންތިހާބުގެ ވޯޓު އިއްޔެ ބޭއްވީ ރައީސް އިބްރާޙިމް މުހަންމަދު ސޯލިހާއި ރައްޔިތުންގެ މަޖިލީހުގެ ރައީސް ނަޝީދާ ދެމެދު ސިޔާސީ ހިޔާލުތަފާތުވުން ބޮޑުވެފައި ވަނިކޮށެވެ. އެހެންވެ މި އިންތިހާބު ސިފަކުރީ ގައުމީ މަޖިލީސް ކޮންޓްރޯލްކުރައްވާނެ ބޭފުޅަކު ކަނޑައެޅުމުގެ އިންތިހާބެއްގެ ގޮތުގަ އެވެ.
އިންތިހާބު ވާދަވެރިކަމާ އެކު ނިމުނު އިރު، ރައީސް އިބްރާހިމް މުހައްމަދު ސޯލިިހްގެ ފެކްޝަނުން ބުނަނީ ޖުމްލަ 97 ގޮނޑީގެ ތެރެއިން 65 ގޮނޑި ކަށަވަރުވި ކަމަށެވެ. މިއީ ގައުމީ މަޖިލީހުގެ ކޮންޓްރޯލް ރައީސަށް ލިބިވަޑައިގަތުން ކަމަށް ވެސް އެ ފެކްޝަނުން ދެކެ އެވެ.
އެކަމަކު ނަޝީދު މިކަން ގަބޫލެއް ނުކުރައްވަ އެވެ.
ގައުމީ މަޖިލީހުގެ ކޮންޓްރޯލެއް އެއްވެސް އިރެއްގައި އަޅުގަނޑުމެންނެއް ނޫޅެން ނަގާކަށް. ހަމަ ގައިމު ވެސް އަޅުގަނޑެއް ނޫޅެން ކޮންޓްރޯލެއް ނަގާކަށް. -- ނަޝީދު
ގައުމީ މަޖިލީހަކީ އެމްޑީޕީގެ އެންމެ ބާރުގަދަ ގުނަވަނެވެ. ފަސް އަހަރަށް އިންތިހާބުކުރި އެމްޑީޕީގެ ގައުމީ މަޖިލީސް އެކުލެވިގެން ވަނީ، އެ ޕާޓީ ވެރިކަމުގައި އޮންނަ ނަމަ ރައީސުލްޖުމްހޫރިއްޔާ އާއި ވަޒީރުންގެ މަޖިލީހުގެ އެމްޑީޕީގެ މެމްބަރުންނާއި ޕާޓީގެ ލީޑަޝިޕާއި ޕާލަމެންޓްރީ ގްރޫޕްގެ މެމްބަރުންނާއި ދާއިރާތަކުގެ ރައީސުންނާއި އަންހެނުންގެ ރޫހާއި ޒުވާނުންގެ ހިތްވަރު އަދި އިސްލާމްދީނުގެ މަޝްވަރާ މަޖިލީހުގެ ރައީސް ހިމެނޭ ގޮތުންނެވެ.
ނަޝީދު "މިހާރު" އަށް ވިދާޅުވީ އިންތިހާބުގައި ހޮވުނު ގިނަ ކެންޑިޑޭޓުން ތާއީދު ކުރަނީ ބަރުލަމާނީ ނިޒާމަށް ކަމަށެވެ. ގައުމީ މަޖިލީހަށް އިންތިހާބުވި އެންމެންގެ ތާއީދު އޮތް ގޮތެއް ބެލުމަށް ނަތީޖާ ގުނުވާފައިވާ ކަމަށާއި އޭގެއިން ފެންނަނީ ބަރުލަމާނީ ކެންޑިޑޭޓުން ގިނަ ތަން ކަމަށް ނަޝީދު ވިދާޅުވި އެވެ.
"އަޅުގަނޑު ގުނާލިއިރު ބަރުލަމާނީ އަށް ތާއީދުކުރި ކެންޑިޑޭޓުން ގިނައިން އިންތިހާބު ވެފައި ހުރީ،" ނަޝީދު ވިދާޅުވި އެވެ.
އެކަމަކު އެއީ ކިހާ އަދަދެއް ކަމެއް ސާފުކޮށް ނަޝީދު ވިދާޅެއް ނުވެ އެވެ.
ނަޝީދު ވިދާޅުވި ގޮތުގައި އިންތިހާބުވި ގިނަ ކެންޑިޑޭޓުން ވަނީ ވާދަކުރެއްވުމުގެ މާ ކުރީގައި ވެސް ތާއީދުކުރަނީ ބަރުލަމާނީ ނިޒާމަށް ކަން ފާޅުގައި ބުނެފަ އެވެ. އެ ކެންޑިޑޭޓުންގެ ސޯޝަލްމީޑިއާ އެކައުންޓްތަކުން ވެސް އެކަން ފެންނާނެ ކަމަށް ވިދާޅުވި އެވެ.
އެމަނިކުފާނު ވިދާޅުވީ ބަރުލަމާނީ ނިޒާމު ކަމުދާ ކެންޑިޑޭޓުންނަށް ތާއީދު އޮތް ކަމަށް އިންތިހާބުގެ ކުރިން ވިދާޅުވިއިރު، ވާދަކުރެއްވި ވަޒީރުން އިންތިހާބު ނުވާކަށް އެދިވަޑައިނުގަންނަވާ ކަމަށެވެ. އެމްޑީޕީގެ އިންތިހާބެއް އޮންނައިރު ވަޒީރުން ގައުމީ މަޖިލީހުގައި ތަމްސީލްވުމަކީ ރަނގަޅު ކަމެއްގެ ގޮތުގައި އަބަދުވެސް ދެކިވަޑައިގަންނަވާ ކަމަށް ވިދާޅުވި އެވެ.
"އެމްޑީޕީގެ ގައުމީ މަޖިލީހުގެ ކޮންޓްރޯލަކީ އެއްވެސް އިރެއްގައި އެއްވެސް ބޭފުޅެއްގެ އަތުގައި އޮންނަ އެއްޗެއް ކަމަށް ދެކިގެން ނޫން އުޅެނީ. މިއީ ޑިމޮކްރެޓިކް އިންސްޓިޓިއުޝަނެއް، އެ މީހަކަށް ފެންނަ ގޮތަކަށް އަމަލުކުރަމުން ދާނެ،" ނަޝީދު ވިދާޅުވި އެވެ.
"ގައުމީ މަޖިލީހުގެ ކޮންޓްރޯލެއް އެއްވެސް އިރެއްގައި އަޅުގަނޑުމެންނެއް ނޫޅެން ނަގާކަށް. ހަމަ ގައިމު ވެސް އަޅުގަނޑެއް ނޫޅެން ކޮންޓްރޯލެއް ނަގާކަށް."
ނަޝީދު ވިދާޅުވި ގޮތުގައި އިންތިހާބަށް ފަހު ވެސް ޕާޓީ އޮންނާނީ އެކަތިގަނޑެއްގެ ގޮތުގަ އެވެ. ޕާޓީގެ އަމާޒުވާނީ ބަރުލަމާނީ ނިޒާމަކަށް ބަދަލުކޮށް ރާއްޖޭގެ ވެރިކަން ރަނގަޅުކުރަން ކަމަށް ވެސް ވިދާޅުވި އެވެ.
"އަޅުގަނޑަށް މި އިންތިހާބުގައި ފެނުނީ ޒަމާނުއްސުރެން އެމްޑީޕީގެ މެމްބަރުން ތިބި ސާބިތުކަންމަތީގައި މެމްބަރުން ތިބި ކަން،" ނަޝީދު ވިދާޅުވި އެވެ.