އަލީ ވަހީދު އެމްޑީޕީގެ ޕްރެސް ކޮންފަރެންސެއްގައި ވާހަކަ ދައްކަވަނީ: ގާނޫނުއަސާސީން ބޭރުގައި ބާއްވާ ކައުންސިލް އިންތިހާބުގައި ބައިވެރި ނުވާން އޭނާ ގޮވާލެއްވި.
11 ޖެނުއަރީ 2017 - 16:21
26 comments
ލޯކަލް ކައުންސިލް އިންތިހާބުގެ ނަމުގައި ކުޅޭ "ކުޅިގަނޑެއްގައި" ބައިވެރިވުމުން ލިބޭނެ ގެއްލުން މާ ބޮޑުވާނެ ކަމަށް އެމްޑީޕީގެ ކުރީގެ ޗެއާޕާސަން އަލީ ވަހީދު މިއަދު ވިދާޅުވެއްޖެ އެވެ.
އަމިއްލަ އަށް އަރުވާލެވިގެން އިނގިރޭސިވިލާތުގައި ދިރިއުޅުއްވާ އަލީ ވަހީދު "މިހާރު" އަށް ވިދާޅުވީ ގާނޫނުއަސާސީގެ ބޭރުން، ކުޅެމުން ދާ ޑްރާމާއަކަށް އިންތިހާބެކޭ ނުކިޔާނެ ކަމަށެވެ. އެ ތަޖުރިބާ ރާއްޖޭގައި ވަރަށް ގިނަ ފަހަރަށް ކުރެވިފައިވާ ކަމަށް ވިދާޅުވި އެވެ.
އިލެކްޝަންސް ކޮމިޝަން (އީސީ) އިން އަމަލުކުރާ ގޮތާ މެދު ހިތްހަމަނުޖެހިގެން ކައުންސިލް އިންތިހާބުގައި އަދާލަތު ޕާޓީން ވާދަ ނުކުރަން ނިންމުމަކީ، އަލީ ވަހީދު ވިދާޅުވި ގޮތުގައި، އެ ޕާޓީން ނިންމި ވަރަށް ހިތްވަރުގަދަ، އަދި ހިކުމަތްތެރި ނިންމުމެކެވެ. ރައްޔިތުންގެ ހައްގުގައި، އީސީގެ ޖަރީމާތަކާ ދެކޮޅަށް އަދާލަތުގެ ނިންމުމަށް އޭނާ ވަރަށް ބޮޑަށް ތައުރީފްކުރެއްވި އެވެ.
އަދާލަތުން ކުރިން ނިންމާފައި އޮތީ، އެ ޕާޓީން ކޯލިޝަން ހަދާފައިވާ މޯލްޑިވްސް ޔުނައިޓެޑް އޮޕޮޒިޝަން (އެމްޔޫއޯ)އާ އެކު އިންތިހާބުގައި ވާދަކުރުމަށެވެ.
އަލީ ވަހީދާއި އިމްރާން: އިންތިހާބުގައި އަދާލަތުން ބައިވެރި ނުވާން ނިންމުމަކީ ހިކުމަތްތެރި ނިންމުމެއް ކަމަށް އަލީ ވަހީދު ވިދާޅުވި.
އަލީ ވަހީދު ވިދާޅުވީ ކައުންސިލްތަކުގެ ބާރެއް، އިންތިހާބުގެ ސައްހަ ކަމެއް ނެތް ކަމަށެވެ. ނަމެއްގައި، ބާއްވާ އިންތިހާބުގައި ބައިވެރިވުމުގެ މާނައެއް ނެތް ކަމަށް ވެސް ވިދާޅުވި އެވެ.
އޭނާ ވިދާޅުވި ގޮތުގައި ޕާޓީތަކުން ކަނޑައަޅާ ކެންޑިޑޭޓުންނަށް ބައިވެރިވެވޭ، ގާނޫނުއަސާސީ އާއި ގާނޫނުތަކުން ހިމާޔަތް ލިބިފައިވާ މިނިވަން އިންސާފުވެރި އިންތިހާބެއް މުހިއްމެވެ. އެ އިންތިހާބު ހޯދުމަށްޓަކައި ގާނޫނުތަކާއި އިންސާފުގެ އެންމެހާ ހަމަތަކުން ނެއްޓިފައިވާ ޖަރީމާތަކުން ދުރުވެ، އިސްލާހުކުރަން މި ދަނޑިވަޅުގައި މަސައްކަތް ކުރަން ޖެހޭ ކަމަށް ވެސް ވިދާޅުވި އެވެ.
"ކޯނީ ރިޕޯޓް [ފެބްރުއަރީ 7 ގައި ކުރީގެ ރައީސް މުހައްމަދު ނަޝީދު އިސްތިއުފާ ދެއްވި ހާދިސާގެ ތަހުގީގު] އަދި 2013 ގެ ރިޔާސީ އިންތިހާބު ފަދަ ޖަރީމާތަކަށް ގާނޫނީ ބާރާއި ސައްހަކަން ދެވުމުން، އިސްކުރެވުނު ގައުމީ މަސްލަހަތާއި ކުރި ފައިދާ އަށް ވުރެ ލިބުނު ގެއްލުން މާ ބޮޑު،" އޭނާ ވިދާޅުވި އެވެ.
"އެމްޑީޕީގެ އާއްމު މެމްބަރުންނާއި ރާއްޖޭގެ ގިނަ ރައްޔިތުންގެ ހިޔާލު ވަޒަންކޮށްލައިފި ނަމަ އަޅުގަނޑަށް ވިސްނޭ، މި މަގުން ގާނޫނުު ނެގެހެއްޓުމުގައި، ގިނަޔާއި މަދަށް ވުރެ މުހިއްމީ ރަނގަޅާއި ނުރަނގަޅު ވަކިކުރުން."
އަލީ ވަހީދު ވިދާޅުވި ގޮތުގައި އެއްވެސް ބަޔަކު އުސޫލްތަކުގައި ނުހިފަހައްޓައިފި ނަމަ އޭގެ ހިތި ނަތީޖާ އާއި އަސަރު އެންމެންނަށް ވެސް ތަހައްމަލް ކުރަން ޖެހޭނެ އެވެ. އަދި އިލެކްޝަންސް ކޮމިޝަނުން ދިން މިންވަރެއްގައި ހިފައިފި ނަމަ އެ މިންވަރަށް މާދަމާ ނޫނެކޭ ބުނުމުގެ އެއްވެސް ހަމައެއް ނެތް ކަމަށް ވެސް ވިދާޅުވި އެވެ.
"ރައީސް ނަޝީދާއި ރާއްޖޭގެ ސިޔާސީ ލީޑަރުންގެ ބާތިލްކުރެވިފައިވާ ކެންޑިޑެސީތަކާއި ނުހައްގު ހުކުމްތަކަށް ނޫނެކޭ ބުނެ ފްރީ އެންޑް ފެއާ އިންކްލޫސިވް އިލެކްޝަނަކަށް ދިއުމަށް މި ދަނޑިވަޅުގައި މިސްރާބު ޖަހަން ލާޒިމް،" އަލީ ވަހީދު ވިދާޅުވި އެވެ.
އޭނާ ވިދާޅުވީ ރައްޔިތުންގެ ތެރޭގައި މަގްބޫލް ލީޑަރުންނަށް ހުކުމް އިއްވައިގެން ކެންޑިޑެސީތައް ބޭނުން މީހުން ޕާޓީތަކުގައި ވެސް ތިބި ކަމަށެވެ. ވާދަނުކޮށް ޖަރީމާ ހިންގައިގެން ކުރި ހޯދަން ރާވާ އެކަހަލަ މީހުން ހުރިހާ ދިމާލަކުން ވެސް ބަލިކުރަން ޖެހޭ ކަމަށް ވިދާޅުވި އެވެ.
"ވަކި ބަޔަކަށް ހުކުމް އައިސް، ދައުވާ އުފުލި، ޖަލަށް ލެވި، އަރުވާ ލެވި އަނެއް ބަޔަކު ކަހާތަން ހިރުވާ ވެސް ނުލާ ކަމާ މެދު ވިސްނާލުމުން މި ދެންނެވި އެއްޗެއް ސާފުވާނެ،" ތަފްސީލް ނުދެއްވައި އަލީ ވަހީދު ވިދާޅުވި އެވެ.
އަދާލަތު ޕާޓީން އިންތިހާބު ބޮއިކޮޓް ކުރި ނަމަވެސް އެމްޑީޕީގެ ވިސްނުމަކީ އިންތިހާބުގައި ބައިވެރިވުމެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
އަސްލަމް
12 January 2017
އަލީ ވަހީދު ތިޔަ ދައްކަނީ ހުންއަންނާނެކަމަށް ރަޖާލުން ފަދަ ކަމެއްގެ ވާހަކަ. އިންތިހާބަށް ޞައްޙަކަން ނުވަތަ ނޫންކަން އެނގޭނޭ އަދި އިންތިހާބު ބޭއްވިގެންތާއެވެ. ތިޔަ މަނިކުފާނު ޕާތީގެ ވެރިކަމުގައިވެސް އިންތިހާބު ލަސްވިއެވެ. އޭރު ލަސްވެގެން ޞައްހަކަމެއް ނުގެއްލެއެވެ. ލަސްވުމަކީ ޤާނޫނީ ޞައްހަކަން ގެއްލޭނެކަމެކޭ ބުނުމުގައި ޤާނޫނީ އެއްވެސް ހުއްޖަތެއް ނެތެވެ. ކޮސް ނުގޮވާށެވެ. ވެގެން އުޅޭ ގޮތަކީ އެން.ޑީޕީ ބުނާގޮތަށް ފުއްގަޑު މޮޑޭނެ ބަޔަކު އިލެކްސަނުގައި ނެތީމަ ކިޔާ ލަވައެކެވެ. އެކަން އެގޮތަށް އޮތް ނަމަ އެވަރެއް ނެތީސް އެވެ.
އުމަރު
12 January 2017
އިންތިހާބަކީ ރައްޔިތުންގެ ލޮލުގައި އަދި ބޭރު ޤައުމުތަކުގެ ލޮލުގައި އަޅުވާ އަނދުނެއް، އިންތިހާބެއްގެ މިހާރު ބޭނުމެއްނެއް، އިންތިހާބުގައި ހޮވޭ މީހުންގެ އިތުބާރެއްނެއް، ފައިސާ ހުރިހައި އެއްޗަކީ އެފައިސާދީގެން ހުރިހައި އެއްޗެއްދަނީ ގަންނަމުން
ތަމެންވެސް
12 January 2017
އެމްޑީޕީ ގޮތަށް ތިޔާ ޖޭޕީ އަކީ ވެސް އެއީ ރައްޔިތުންނަށް ހެވާއި ލާބައާއި މަންފާ ކުރާނެ އުސޫލުން މިދިޔަ 12 އަހަރު އެއްކަމެއް ވެސް ކޮށްދީފައިވާ ބަޔެއް ނޫނެވެ. އެމެންގެ ކަމަކަށް އޮންނަނީ ޕްރޮޕެގެންޑާ ފެތުރުމެވެ. އެމެން ވެސް ނުޖެހޭނެ ކުރިމަތި ވަމުން އަންނަ ލޯކަލް ކައުންސިލު އިންތިޚާބުގައި ޕްރޮޕެގެންޑާ ފަތުރައިގެން ބައިވެރިވާން. އެމެން ވެސް ޖެހޭނީ ސިޔާސީ ދާއިރާ ދޫކޮށް ގްރައުންޑް ކުރަން އެވެ. ސަބަބަކީ އެ ޕާރޓީގެ ލީޑަރ ޕްރޮމިސް ވެފައިވަނީ އެޕާރޓީ ގްރައުންޑް ކުރަން. އެހެން ކަމަށްވާނަމަ އެމަގުން އެކަން ކުރަން ޖެހޭނެއެވެ. މީގައި އޮވެގެން ނުވާނެ އިތުރު އެއްވެސް އެކްސްކިއުޒެއް ވެސް އަދި އިތުުރު ޗޮއިސް އެއްވެސް. މިމަގުން މިކަން ހިނގަން ޖެހޭނެއެވެ. އެނިމުނީ އެވެ. ލޯކަލް ކައުންސިލް ތަކަށް މެމްބަރުން ހޮވަނީ އެއީ ސަރުކާރަށް ފަސޭހަ ކުރުމަށެވެ. އެހެން ކަމުން ކޮންމެހެން ނުޖެހޭނެ ސަރުކާރާއި ދެކޮޅު ޚިޔާލު ހުރި ޖޭޕީ އިން ލޯކަލް ކައުންސިލު އިންތިޚާބުގެ ތެރެއަށް ބޭނިގަންނާކަށް. އެއީ ތަމެންނާއި އަރާ އަރަ ފޯދިގެންވާ ކަމެއް ނޫނެވެ. ތަމެން ނަށް ވެސް ކުޑާ ކޮށް ސައިޒު އޮޅިގެން އުޅޭ ހެން ހާދަ މަމެންނަށް ހީވާން ފަށައިފިއޭ ދޯ. ކިހިނެއް ހަދަންވީ. ކުޑާ ކޮށް ފިއްތާލަންވީ ތޭ.
މެންޓަލިސްޓް
12 January 2017
ދެން ތިޔަކަމުގައި އަލީވަހީދުއަކަށް ގެއްލުމެށް ނެތްތާ ،،، އަލީވަހީދު ގަތް ހުރިހާ ގޯއްޗެއް އެބަހުރިނޫންތޯ ؟ ކައުންސިލް އޮތަސް ނެތަސް އެގޯތިތަށް ހުންނާނެނޫންތޯ ؟؟؟ ވީމާ ތިބޭފުޅާ ހަމަޖެހިލައިގެން ހުންނަވާ ،، އަލީވަހީދުއަކީ ނަސީބްވެރިއެއް ،،، މަތިން މަންނާއާޢި ސަލްވާ އައިހެން އަލީވަހީދުއަށް ވެސް ގޯތިގެދޮރާއ ފައިސާ އޮހުނީ ،،،، ވަރަށްވެދުން
އައްޔަ
12 January 2017
އަދާލަތުން އިންތިހާބު ކަޓް ކުރީ އެމީހުނަށް އެއްވެސް ކަންފުޅެއް ނުވާނެކަން ޔަގީންވީމަ ލަދުން ސަލާމަތްވުމަށް ހެދި ބޮލުގެއެއްޗެއް މުޅި ރާއްޖޭން 1ގޮޑި ލިބުނަސް ސާބަސް މިފަދަ ޕާޓީތަކަށްވެސް ދައުލަތުން ޚަރަދުކުރޭ ... އާ..
އަލިދީދީއައްޑޫސިޓީ
12 January 2017
އަލީ ވަޙީދަށް މިކަމުގައި ހަމަ ތާއިދު ނުކޮށް ނުހުރެވިގެން މިކޮމެންޓު ލިޔެލީ. ކައުންސިލް ތަކުގެ ބާރު ކަނޑުވާލާފައި ރަށްރަށުގެ ހުރިހާ ކަމެއް ހައުސިންގ މިނިސްޓްރީ އަށް ނަގައި އެއީ އެޓޯލްސް މިނިސްޓްރީ ކަމުގައި ހަދައި ކޯޑިނޭޓަރުން (ކަތީބުން) ލައްވައިގެން މިހާޜު މުޅި ރާއްޖެ މިއޮތީ މުށުތެރެޔަށްލާފައި. ދެން ކޮންމެހެން ދުނިޔެއަށް ފްރީ އެންޑް ފެއަރ އިލެކްޝަނެއް ބޭއްވިކަން ދައްކަން ބާއްވާ އިންތިޚާބެއްގައި އެފަރާތަށް ޕްލަސް ޕޮއިންޓު ހޯދައިދޭން ދާ އޮހޮރައިގެން ނުނިދައި ތެޅުމުގެ ބޭނުމެއް ފަހެ އެބަ އޮތްތޯ؟ ރިޔާސީ އިންތިޚާބު ބޭނުމީ. ވައްސަލާމް! އަލީ ވަހީދަށް ހަމަ ތާއިދު!
ހުސައިން އާސިމް
12 January 2017
އަދާލަތު އުވާލާ މުޅި ޕާޓީގެ ނިމިދިޔުމަށްވެސް ތާއީދު
ޢެކޮއި
12 January 2017
ޢިންތިހާބުގައި ބައިވެރި ވާން ޖެހޭ ، ސަރުކާރުން ވަނީ ލާމަރުކަޒީ ނިޒާމުގެ ބާރު ކަނޑުވާލާ ގަޑުބަޑު ކޮއްފަ. ޢަނިޔާ ވެރި ވެއްޖެ، ސަރުކާރައް ނޫނެކޭ ބުނަން ބުނަން ތައްޔާރައް ތިބީ އެމްޑީޕީ މެންބަރުން އެކަންޏެއް ނޫން. ވަރައް ގިނަ ބައެއްގެ ހައްގު. ފުރުސަތު ދޫކޮއްލައިފީ ވިއްޔާ ފަހުން ބޮޑު ފިތުނަޔަކައް ބަދަލު ވެދާނެ، އިންސާފު ހޯދަން ދާނެ ތނެއް ނެއް.
ާއަލީ
12 January 2017
ބައިވެރި ވުން ރަނގަޅީ. މަންފާ ހުރީ އެގޮތުގާ. ގައުމުގެ ހައްގުގާ
މާލިމީ
11 January 2017
ވަރަށޤ ބަރާބަރު. އަލީ ވަހީދުގެ އަސްލަށް ރުޖޫއަވެއްޖެ. މޑޕ އިން އިންތިޚާބު ދޫކޮށްލާފައި ދެއަތް އުރާލައިގެން ތިބެންވީ. ހަމަ މިބީދައިން ރިޔާސީ އިންތިޚާބުވެސް ދޫކޮށްލަންވީ. ތިޔައީއޭ ފޮނިފޮނި ތޮއްޑޫ ކަރަޔަކީ. ސާބަހޭ ޕްރޮފެސަރ އަލީ ވަހީދު
ތޮއްޑޫ ކުއްޖާ
12 January 2017
ޢަލީ ވަހީދާއި ތޮއްޑުއާ އަޅުވާ ނުކިޔުއްވުން އެދެމެވެ.. ޢަލީވަހީދަކީ ހދ.ކުޅުދުއްފުށީ މީހެއް... ޢެޑްރެހަކީ ބަނދަރު...