ދެ އަހަރުގެ ކުއްޖަކާ ބެހުނު މުނިކާފަ ޖަލުގައި މަރުވެއްޖެ

ދެ އަހަރުގެ ކުއްޖަކަށް ޖިންސީ ގޯނާކުރި އެ ކުއްޖާގެ މުނިކާފަ ހަސަން ދީދީ ހައްޔަރުކޮށްގެން ގެންދަނީ: އޭނާ ވަނީ މިއަދު ޖަލުގައި މަރުވެފައި --- ފޮޓޯ/ސޯޝަލް މީޑިއާ

މުއިއްޒު އިބްރާހިމް، މިހާރު

09 ސެޕްޓެމްބަރ 2023 - 14:23

3 comments

ގއ. ކަނޑުހުޅުދޫގައި ދެ އަހަރުގެ ކުއްޖަކަށް ޖިންސީ ގޯނާކުރި މައްސަލާގައި އުމުރަށް ޖަލަށްލާފައިވާ އެ ކުއްޖާގެ މުނިކަފާ ޖަލުގައި މަރުވެއްޖެ އެވެ.

ޖެނުއަރީ، 2020 ގައި ދެ އަހަރުގެ ކުއްޖަކަށް އެ ކުއްޖާގެ މުނިކާފަ ހަސަން މޫސާ ދީދީ އާއި ކާފަ އިބްރާހިމް ދީދީ ޖިންސީ ގޯނާކުރި މައްސަލާގައި އެ ދެ މީހުން އުމުރަށް ޖަލަށްލާން ކްރިމިނަލް ކޯޓުން ހުކުމްކުރީ މިދިޔަ އަހަރު އެވެ. ހަސަން ދީދީގެ އުމުރަކީ 85 އަހަރެވެ.

ކަރެކްޝަންސް އިން ބުނީ ހަސަން ދީދީ މިއަދު މަރުވީ ހުޅުމާލޭ ޖަލުގައި ހުކުމް ތަންފީޒު ކުރަމުން ދަނިކޮށް ހިތް ހުއްޓިގެން ކަމަށެވެ. އަދި އޭނާއަކީ އުމުރުން ދުވަސްވުމުގެ ސަބަބުން ޖަލުގައި ވެސް ހިނގާ ނޫޅެވޭތީ އެނދުމަތިވެފައި އޮންނަ މީހެއް ކަމަށް ވެސް ކަރެކްޝަންސް އިން ބުންޏެވެ.

ދެ އަހަރުގެ ކުއްޖާއަށް ޖިންސީ ގޯނާކުރި މައްސަލާގެ އިތުރުން އެހެން ކުއްޖެއްގެ ކައިރިން ޖިންސީ އަމަލެއް ހިންގަން އެދުނު މައްސަލައެއްގައި ދޮޅު މަހުގެ ޖަލު ހުކުމެއް ކްރިމިނަލް ކޯޓުން އިއްވި އެވެ. އެ މައްސަލައަށް މުޅި ރާއްޖޭގެ ސަމާލުކަން ހުއްޓި އަދި ޖިންސީ ގޯނާއާ ދެކޮޅަށް ބޮޑެތި މުޒާހަރާތަކެއް ކުރި އެވެ.