އދ.ގެ ސަލާމަތީ މަޖިލީސް: އެމިރޭޓްސް އިން ހުށަހެޅި ގަރާރު އެމެރިކާ އިން ވަނީ ވީޓޯކޮށް ގަރާރު ބާތިލުކޮށްފައި
10 ޑިސެމްބަރ 2023 - 11:58
އިޒްރޭލު ސިފައިން ފަލަސްތީނުގެ ޣައްޒާ އަށް ދެމުންދާ ހަމަލާތައް ވަގުތުން ހުއްޓައިލުމަށް ގޮވާލައި އެމިރޭޓްސް އިން ހުށަހެޅި ގަރާރު، މިދިޔަ ހުކުރު ދުވަހު އދ.ގެ ސަލާމަތީ މަޖިލީހުން ފާސްކުރަން ހުށަހެޅުމުން އެމެރިކާ އިން ވީޓޯގެ ބޭނުން ހިފައި އެ ގަރާރު ބާތިލުކޮށްލައިފި އެވެ.
ސަތޭކައެއްހާ ގައުމުގެ ތާއީދާ އެކު އެމިރޭޓްސް އިން އެ ގަރާރު ހުށަހެޅީ، ޣައްޒާ ހަނގުރާމަ ހުއްޓުވައިދިނުމަށް އެދި، އދ.ގެ ޗާޓަރުގެ 99 ވަނަ މާއްދާ އިން ލިބިދޭ އިޚްތިޔާރުގެ ދަށުން، އދ.ގެ ސެކްރެޓަރީ ޖެނެރަލް އެންޓޯނިއޯ ގުޓަރެސް، ސަލާމަތީ މަޖިލީހަށް މިދިޔަ ބުދަ ދުވަހު އެ މައްސަލަ ހުށަހެޅުއްވުމާ ގުޅިގެންނެވެ.
އެމެރިކާ އިން އެ ގަރާރު ވީޓޯ ކުރުމާ ގުޅިގެން ދުނިޔޭގެ ހުރިހާ ގައުމުތަކެއްހެން ގެންދަނީ އެމެރިކާ އަށް ފާޑު ކިޔަމުންނެވެ. އަދި އެމެރިކާ އިން އެ ގަރާރު ވީޓޯ ކުރުމާ ގުޅިގެން އިޒްރޭލުން ވަނީ އެމެރިކާ އަށް ޝުކުރު އަދާކޮށް ބަޔާނެއް ނެރެފަ އެވެ.
އެމިރޭޓްސްގެ ގަރާރަށް ސަލާމަތީ މަޖިލީހުގެ ޖުމްލަ 15 މެމްބަރުންގެ ތެރެއިން 13 މެމްބަރު ގައުމުން ތާއީދުކުރި އެވެ. ނަމަވެސް އެ ވޯޓުގައި އިނގިރޭސި ވިލާތް ބައިވެރިނުވެ އެވެ. އަދި އެމެރިކާ އިން ވީޓޯގެ ބޭނުން ހިފައި އެ ގަރާރު ބާތިލުކޮށްލުމުން، ޣައްޒާގެ އާންމު ރައްޔިތުންނާ ދެކޮޅަށް ހިންގާ ގަތުލުއާންމުތައް އިތުރަށް ފުޅާ ކުރުމަށް އިޒްރޭލަށް ވަނީ ބޮޑު ހިތްވަރެއް ލިބިފަ އެވެ.
ޣައްޒާގައި ކުރަމުންދާ ހަނގުރާމަ ވަގުތުން ހުއްޓައިލުމަށް ގޮވާލައި އެމިރޭޓްސް އިން ހުށަހެޅި ގަރާރުގައި ބުނެފައިވަނީ، ހަނގުރާމައިގައި ބައިވެރިވާ ދެ ފަރާތުން ވެސް ވަގުތުން ހަމަލާތައް ހުއްޓާލައި ބައިނަލްއަގުވާމީ ގާނޫނުތަކަށް ތަބާވުމަށެވެ. އަދި ހަނގުރާމައި ހުއްޓައިލުމުގެ އެއްބަސްވުން ތަންފީޒުކުރަމުންދާ ގޮތުގެ ރިޕޯޓް އދ.ގެ ސެކްރެޓަރީ ޖެނެރަލްގެ ފަރާތުން ސަލާމަތީ މަޖިލީހަށް ހުށަހެޅުމަށް ވެސް ގޮވާލާފައިވެ އެވެ.
އެމިރޭޓްސްގެ ގަރާރު އެމެރިކާ އިން ވީޓޯ ކޮށްލުމާ ގުޅިގެން، އދ.ގައި ހުންނަވާ އެމިރޭޓްސްގެ ސަފީރު މުހައްމަދު އަބޫ ޝަހާބް ވިދާޅުވީ އިންސާނީ އެހީތެރިކަން ފޯރުކޮށްދިނުމުގެ ގޮތުން ވެސް، ހަމަލާތައް ހުއްޓުވުމުގައި ސަލާމަތީ މަޖިލިސް ފެއިލްވެފައިވާ ކަމަށެވެ. އަދި މުޅި ދުނިޔޭގެ އާންމު ރައުޔާ ވެސް ޚިލާފަށް ސަލާމަތީ މަޖިލީހުން އަމަލުކުރާތީ ހިތާމަ ކުރައްވާ ކަމަށް ވެސް އޭނާ ވިދާޅުވި އެވެ.
އިޒްރޭލުގެ ހަމަލާތަކުގައި ކޮންމެ ދުވަހަކު ޝަހީދުވަމުންދާ އާންމު ރައްޔިތުންނާ މެދު ފަރުވާލެއް ނެތި، އެމެރިކާ ސަރުކާރުން ބުނެފައިވަނީ ވީޓޯގެ ބޭނުންކުރީ ހަމަލާތައް ހުއްޓާލައިފި ނަމަ، ހަމާސް އަށް އަނެއްކާ ވެސް ޣައްޒާގައި ފުރިހަމަ ބާރު ލިބިދާނެތީ ކަމަށެވެ. އަދި ހަމާސް އަށް ޣައްޒާގެ ބޭރު ލިބިއްޖެ ނަމަ، ފަލަސްތީނު ރައްޔިތުންނަށް އަމާން ދިރިއުޅުމެއް ފެށުމުގެ ފުރުސަތު އެ ޖަމާއަތުން ނުދޭނެ ކަމަށް ވެސް އެމެރިކާ އިން ބުންޏެވެ.
މިދިޔަ އޮކްޓޫބަރު މަހުގެ 7 ވަނަ ދުވަހު އިޒްރޭލު ސިފައިން ޣައްޒާއާ ދެކޮޅަށް ފެށި ހަނގުރާމަ އަށް މިއަދަށް 65 ދުވަސް ވީއިރު، އިޒްރޭލުގެ ހަމަލާތަކުގައި ޣައްޒާ އިން ޝަހީދުވި މީހުންގެ އަދަދު ވަނީ 17700 އަށް ވުރެ މަތިވެފަ އެވެ. އޭގެ ތެރޭގައި 7800 އަށް ވުރެ ގިނަ ކުޑަކުދިންނާއި 5100 އަށް ވުރެ ގިނަ އަންހެނުން ހިމެނެ އެވެ.
އަދި ޒަޚަމްވި މީހުންގެ އަދަދު 48780 އަށް ވުރެ މަތިވެފައިވާ އިރު، ވެއްޓިފައިވާ އިމާރާތްތަކުގެ ދަށުވެ ނުވަތަ ހަމަލާތަކުގައި ހަށިގަނޑު ކުދިކުދިވުމުގެ ސަބަބުން، ވީނުވީއެއް ނޭނގި ގެއްލިފައިވާ މީހުންގެ އަދަދު ވެސް މިހާރު ވަނީ 8500 އަށް ވުރެ މަތިވެފަ އެވެ.
އިޒްރޭލުން ޣައްޒާއާ ދެކޮޅަށް، އޮކްޓޫބަރު 7، 2023 ގައި ހަނގުރާމަ އިއުލާން ކުރީ، ހަމާސް ޖަމާއަތުގެ ހަނގުރާމަވެރިން އެއްގަމާއި ކަނޑާއި ވައިގެ މަގުން، ޔަހޫދީ އާބާދީތަކަށް އެ ދުވަހު އަރައިގަނެ ދިން ހަމަލާތަކުގައި 1200އެއްހާ މީހުން މަރައިލުމާ ގުޅިގެން ބަދަލު ހިފުމުގެ ގޮތުންނެވެ. އިޒްރޭލުން ބުނާ ގޮތުގައި "އެކަތައިގެ ކަނޑިތައް" ނަމުގައި ފެށި ހަނގުރާމައިގެ އަމާޒަކީ ހަމާސް ޖަމާއަތް ނައްތައިލުމެވެ.
Copyright © 2025 Mihaaru · Terms and Conditions · Privacy Policy
ކޮމެންޓްތައް
އިބުރާ
11 December 2023
އިޒުރޭލާއި އެބައިމީހުންނަށް މަދަދުވެރިވާ ފަރާތްތައް ފަޟީހަތްކުރައްވައި ބަލި ކުރައްވާންދޭވެ. އަދި ފަލަސްތީނު މުސްލިމުންނަށް ނަސްރާއި ކާމިޔާބާއި ފަލާޙް މިންވަރުކުރައްވާންދޭވެ!
ޖަލީލީ
11 December 2023
މީ ވެސް ދެން ހެއްވާ ކަމެއް ދޯ މިއޮއް ޑިމޮކުރަސީގެ ޒަމާނުގަ 100 ގައުމުން އެއްކޮޅަކަށް ވޯޓް ދީފަ، އެންމެ ގައުމަކުން އިދިކޮޅަށް ވޯޓު ދިނަސް އިދިކޮޅުގެ ބަސް މި ގަދަވަނީ. މިޔަށްވުރެ ވަކި ހުދުމުހުތާރު ގޮތެއް އޮންނާނެބާ. ޝައްކެއްވެސް ނެތް އ.ދ އަކީ އެމެރިކާ އާއި ހުޅަނގުން ބޭނުންވާ ގޮތަށް ދުނިޔޭގެ ގައުމުތަކަށް ބާރު ހިންގަން ހަދާފަ އޮތް ތަނެއް. އުވާލަން ޖެހޭ.
ކޮމެންޓޭ1
11 December 2023
ދުވާލަކު އެތައް ސަތޭކަ ބަޔަކު މަރާއިރު ވާކަމެއް ހަރާން ތި ގަރާރު ފާސް ކުރިއަސް ވާނީ ބޭގަރާރަކަށް ޑްރާމާ ކުޅުުގެ ބޭނުމެއް ނެތް. ހުޅަނގުން އެހީވެގެން ހިނގާ ޖަރީމާ ހުއްޓާ ނުލަންޔާ ހުރިހާ ގުޅުމެއް ކަނޑާލަންވީ އެއީ އެކަމު ކުރަން ކެރޭނެ ކަމެއް ނޫން
ހަޤީޤަތަކީ
10 December 2023
ތަނެއްގަ ދޭދޭ ބަޔަކު ހަނގުރާމައެއް ކުރަންޏާ އެމެރިކާއިން ބަލާނެ އެއަށް ދަރުއަޅާ އިތުރަށް ރޯކުރެވޭތޯ..މުޅިދުނިޔެއިން ހަނގުރާމަ ހުއްޓި ސުލްހަވެރިކަން ގާއިމުވެއްޖެނަމަ އެމެރިކާ ބަނޑަށް ޖެހޭނެ..ސްޓޮކްގަ ހުރި ހަތިޔާރު ކޮޅުގަ ދަބަރު ޖަހާ ބާދަގަނޑަށް ކިރާލަން ޖެހިދާނެތީ ހުންނަނީ ބިރުން ސިހިސިހި..އެހެންވެ އެހެނިހެން ގައުމުތަކުގަ ހަނގުރާމަ އެއް ފަށާނެ ކޮންމެވެސް ސަބަބެއް އުފަން ކުރުވަން މަސައްކަތްކުރާނެ..ހާއްސަކޮށް އެވެރިން ނުރުހޭ ގައުމުތަކުގަ.
ޚާޚާމް ޝާލޯމް ބިން ޒާއިދު
10 December 2023
އެމިރޭޓްސް އަކީ އިޒްރޭލު ހަނގުރާމައިގެ ބައިވެރިއެއް، ދެން މާ އިންސާނިއްޔަތު ބަޔަކަށްވާންވެގެން ކުރީބައިގައި އެމެރިކާ އާ މަޝްވަރާކޮށްފައި ހުށަހެޅި ބޭގަރާރެއްތިޔައީ
އެހެންޔާފަހެ
10 December 2023
"ހަމާސް އަށް ޣައްޒާގެ ބޭރު ލިބިއްޖެ ނަމަ، ފަލަސްތީނު ރައްޔިތުންނަށް އަމާން ދިރިއުޅުމެއް ފެށުމުގެ ފުރުސަތު އެ ޖަމާއަތުން ނުދޭނެ ކަމަށް ވެސް އެމެރިކާ އިން ބުންޏެވެ" އެހެންވީމާ އެ ފުރުސަތު ދޭން ވެގެން އިޒްރާއީލާ އެެރިކާ އެކުވެގެން ފަލަސްޠީނަށް ބޮމުގެ ވާރޭ އޮއްސަމުން އެދަނީ. ކިހާ އަމާން ދިރިއުޅުމެއްތޯ ފަލަސްޠީނުގެ ރައްޔިތުން މިހާރު އުޅެމުން އެދަނީ. އަދި ވޭތުވެދިޔަ 75 އަހަރުވެސް އުޅެފައިވަނީ...
ޢިހްސާސް
10 December 2023
އދ ބޮއިކޯޓް.. ބޭކާރުތަނެއް. އިންސާފަށް ލޯބިކުރާ ތަނެއްނޫން.
ވަޒީރު
10 December 2023
ވަކިވާންވީ. ބޭކާރު ތަނެއްތީހަމަ. ޔާމީނު ކުރީ އޭރުވެސް ރަގަޅައް، ގައުމުތަކަށް އަތްބޭނުން ނޫން ކަމެއް ކުރާތަނެއްނޫން.