ގްރޭޑް 10އިން މަތީގެ ދަރިވަރުން މާލެ އާއި އެކި ރަށްރަށުގެ މިސްކިތްތަކުގައި އިމާމުވެ ހުކުރު ކުރުމުގެ ހުއްދައަށް އެދުމުގެ ފުރުސަތު އިސްލާމިކް މިނިސްޓްރީން މިއަދު ހުޅުވާލައިފި އެވެ.
ދަރިވަރުން އިމާމުވެ ހުކުރު ނަމާދާއި ހުތުބާ ކިއުމުގެ ހުއްދަ މީގެ ކުރިން އިސްލާމިކް މިނިސްޓްރީން ނުދެ އެވެ. އެކަމަކު ގްރޭޑް 10، 11 އަދި 12 ނިންމާފައިވާ ދަރިވަރުން ހުކުރުކޮށް ހުތުބާ ކިޔުމުގެ ހުއްދަ ދޭން ނިންމާފައިވާކަން އިއްޔެ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވަނީ އިއުލާންކުރައްވައިފަ އެވެ.
މިނިސްޓްރީން މިއަދު ނެރުނު ބަޔާނެއްގައި ބުނީ އިމާމުވެ ހުކުރުކޮށް ހުތުބާ ކިއުމުގެ ހުއްދައަށް ހުށަހަޅާނީ އޮންލައިން ފޯމެއް މެދުވެރިކޮށް ކަމަށެވެ. އެ ފޯމް މިނިސްޓްރީގެ ވެބްސައިޓުން ލިބޭނެ އެވެ.
ފޯމާއެކު ހުށަހަޅަން ޖެހޭ ތަކެތި:
1. ދަރިވަރުގެ އައިޑީކާޑު ކޮޕީ
2. ތައުލީ ސެޓްފިކެޓްތަކުގެ ކޮޕީ
3. ގުރުއާން މުބާރާތުން ވަނަ ލިބިފައިވާނަމަ ލިބިފައިވާ ސެޓްފިކެޓްތަކުގެ ކޮޕީ
4. ސްކޫލްގައި އުޅޭނަމަ އެކަމުގެ ލިޔުން
5. 18 އަހަރު ނުވާނަމަ ބެލެނެވެރިޔާގެ އިއުތިރާޒެއް ނެތް ކަމުގެ ލިޔުން
ހުކުރު ކުރުމުގެ ހުއްދައަށް އެދި ހުށަހެޅުމުގެ ފުރުސަތު އަންނަ އަހަރުގެ ފެބްރުއަރީ މަހުގެ ނިޔަލަށް ވަނީ ހުޅުވާލައިފަ އެވެ.
