ދިޔަވަރު ބޮޑުވި ގަޑީގައި މާލޭގެ ރާޅުގަނޑު ސަރަހައްދަށް މިއަދު އުދަ އަރަނީ.-- ފޮޓޯ: ފަޔާޒް މޫސާ | މިހާރު
21 ޖުލައި 2024 - 16:19
އުދަ އަރާނެ ކަމަށް ލަފާކޮށްފައިވާތީ، ސިނަމާލެ ބްރިޖުމަތިން ދަތުރުކުރާ މީހުން ސަމާލުކަން ދިނުމަށް ފުލުހުން މިއަދު އެދިއްޖެ އެވެ.
ސޯޝަލް މީޑިއާގައި ފުލުހުން ކުރި ޕޯސްޓެއްގައި ބުނީ، ކ. އަތޮޅުން ފެށިގެން އައްޑުއާ ހަމައަށް އުދަ އެރުމުގެ ފުރުސަތު އޮތް ކަމަށް މެޓު އޮފީހުން ލަފާކޮށްފައިވާ ކަމަށެވެ. އެހެންވެ، ސިނަމާލެ ބްރިޖާއި އެ ބްރިުގެ ހައިވޭއިން ދަތުރުކުރާ މީހުން ސަމާލުކަން ދިނުމަށް ފުލުހުން އެދުނެވެ.
ރަށްރަށުގެ ގޮނޑުދޮށް ކައިރީގައި ދިރިއުޅޭ މީހުން މުދަލާއި ގެދޮރުގެ ރައްކާތެރިކަމަށް ފިޔަވަޅުތައް އެޅުމަކީ ވެސް ފުލުހުންގެ އިލްތިމާސެކެވެ.
އަދި ރަށްރަށުގައި ވެސް ގޮނޑުދޮށާ ކައިރި ހިސާބުތަކުގައި ދިރިއުޅުއްވާ ފަރާތްތަކުން މުދަލާއި ގެދޮރުގެ ސަލާމަތާއި ރައްކާތެރިކަމަށް އަޅަންޖެހޭ ފިޔަވަޅުތައް އެޅުއްވުމަށް އިލްތިމާސްކުރަން.
— Maldives Police (@PoliceMv) July 21, 2024
މެޓް އޮފީހުން ނެރުނު ވައިޓް އެލާޓްގައި ބުނީ މިއަދު މެންދުރު ފަހު 1:15 އާއި ހަވީރު 5:15 އާ ދެމެދުގައި ކ. އަތޮޅުން ފެށިގެން އައްޑޫގެ ރަށްތަކަށް އުދަ އެރުމުގެ ފުރުސަތު ބޮޑު ކަމަށެވެ. އެއީ މިއަދު ދިޔަވަރު އެންމެ ބޮޑުވާ ވަގުތެވެ.
އެ އޮފީހުން އާންމު ކޮށްފައިވާ މައުލޫމާތުތަކުން އެނގޭ ގޮތުގައި މިއަދު ދިޔަވަރު އެންމެ ބޮޑުވާ ގަޑީގައި މެދުރާއްޖެތެރޭގެ އަތޮޅުތަކަށް ލޮނުގަނޑު 2.8 ފޫޓަށް އުފުލޭނެ އެވެ. ދެކުނުގެ އަތޮޅުތަކަށް 3.2 ފޫޓަށް ލޮނުގަނޑު އުފުލޭނެ ކަމަށް ވަނީ ލަފާކޮށްފަ އެވެ.
ފާއިތުވި އަހަރުތަކުގައި ރަށްރަށަށް އުދަ އަރައި ވަރަށް ބޮޑެތި ގެއްލުންތައް ލިބިފައިވެ އެވެ. ސިނަމާލެ ބްރިޖާއި ހުޅުލެއާ ގުޅޭ ހިސާބަށް މިދިޔަ އަހަރު ވަރަށް ބޮޑަށް އުދަ އެރި އެވެ. އެ ސަރަހައްދަށް އެރި ބޮޑު ރާޅަކާ އެކު، އެވަގުތު އެތަނުން ދަތުރުކުރި ސައިކަލްތައް ކަހާލައިގެން ވެއްޓި، ވެހިކަލްތަކަށް ގެއްލުންވި އެވެ.
Copyright © 2024 Mihaaru · Terms and Conditions · Privacy Policy
ކޮމެންޓްތައް
ސަފިއްޔާ
22 July 2024
އަނެއްހެން އަލަށް އަރާ އެއްޗެއް ނޫން ދެއްތޯ؟
ޖަމީލުބެ
21 July 2024
އުދަ އަރަން ފެށިފަހުންތަ އެކަން އެންގީ؟