އުދަ އަރާނެ ކަމަށް ލަފާކުރާތީ މުޅި ރާއްޖެ އަށް ހުދު އެލާޓް ނެރެފި

އުދަ އަރާނެ ކަމަށް ލަފާކޮށް މުޅި ރާއްޖެއަށް މިއަދު ހުދު އެލާޓް ނެރެފި އެވެ.

މެޓު އޮފީހުން ބުނީ މިއަދުގެ މެންދުރު 1:30 އިން ހަވީރު 5:00 އާ ދޭތެރޭގައި އުދައަރާނެ ކަމަށް ލަފާކުރެވޭ ކަމަށެވެ. އެހެންވެ، އެ ވަގުތަށް މުޅި ރާއްޖެއަށް ވަނީ ހުދު އެލާޓު ނެރެފަ އެވެ.

އުދަ އަރާނެ ކަމަށް މޫސުމާ ބެހޭ އިދާރާ އިން ލަފާކޮށްފައި ވާތީ މެންދުރު 1:30 އިން ހަވީރު 5:00 އާ ދޭތެރޭގައި ސިނަމާލެ ބްރިޖާއި ހައިވޭގައި ދަތުރުކުރާއިރު ސަމާލުވާން ފުލުހުން ވެސް ވަނީ އިލްތިމާސްކޮށްފަ އެވެ.

"މި ވަގުތުތަކުގައި، ދަތުރުތައް ކުރެއްވުމަށް ހަތަރު ފުރޮޅުލީ އުޅަނދު ބޭނުންކުރައްވާ،" ފުލުހުންގެ އިލްތިމާސްގައި ވެ އެވެ.

މޫސުމާ ބެހޭ ގައުމީ އިދާރާއިން ވަނީ ހއ. އަތޮޅުން ފެށިގެން އދ. އަތޮޅުގެ ރަށްތަކާ ހަމައަށް ބޯކޮށް ވާރޭވެހޭނެ ކަމަށް ލަފާކޮށްފަ އެވެ.

އެ އޮފީހުން ބުނީ އެ ސަރަހައްދުތަކަށް ހެނދުނު 10:45 އިން ހަވީރު 4:30 އާ ދޭތެރޭގައި ބޯކޮށް ވާރޭވެހި، ގުގުރުމާއެކު ވިލާގަނޑުގައި 40 މޭލަށް ވައިގަދަވާނެތީ ހުދު އެލާޓު ނެރެފައިވާ ކަމަށެވެ.